ଭୁବନେଶ୍ୱର, ୧୪।୬(ବ୍ୟୁରୋ): ଆଠଗଡ଼ ବନଖଣ୍ଡର ବଡ଼ମ୍ବା ରେଞ୍ଜରେ ମାଟି ତଳୁ ଦୁଇଟି ହାତୀ କଙ୍କାଳ ଜବତ ହୋଇଥିଲା। ଏହି ଦୁଇଟି ହାତୀ କଙ୍କାଳକୁ କ୍ରାଇମବ୍ରାଞ୍ଚ ଏସ୍ଟିଏଫ୍ ଗତ ୨ ଓ ୩ ତାରିଖରେ ଜେସିବି ଦ୍ୱାରା ଖୋଳି ବାହାର କରିଥିଲା। ଏହି ଘଟଣାରେ ବଡ଼ମ୍ବା ରେଞ୍ଜର, ଦୁଇଜଣ ଫରେଷ୍ଟର ଓ ଦୁଇଜଣ ଫରେଷ୍ଟଗାର୍ଡଙ୍କୁ ନିଲମ୍ବନ କରାଯାଇଥିଲା। ଆଉ ଜଣେ ଫରେଷ୍ଟର ଗିରଫ ଭୟରେ ଡିଏଫ୍ଓଙ୍କ ଅଫିସ ପାଚେରି ଡେଇଁ ଫେରାର ହୋଇଯାଇଥିଲେ। ତେବେ ସେ ଫେରାର ହୋଇଯାଇଥିଲେ ନା ତାଙ୍କୁ ଜାଣିଶୁଣି ଫେରାର କରାଇଦିଆଗଲା ତାହା ସନ୍ଦେହ ଘେରରେ ରହିଛି। ଆଠଗଡ଼ ବନଖଣ୍ଡ ଅଧୀନରେ ୫ଟି ରେଞ୍ଜ ରହିଛି। ସେଗୁଡ଼ିକ ହେଲା ଆଠଗଡ଼, ବଡ଼ମ୍ବା, ଖୁଣ୍ଟୁଣୀ, ନରସିଂହପୁର ପୂର୍ବ ଓ ପଶ୍ଚିମ। ଏଥିମଧ୍ୟରୁ ୪ଟି ବନାଞ୍ଚଳର ରେଞ୍ଜ ଅଧିକାରୀ ଏବେ ନିଲମ୍ବନରେ ଅଛନ୍ତି। ଏସବୁ ଘଟଣାକୁ ଦେଖିଲେ ଆଠଗଡ଼ ବନଖଣ୍ଡ ବନ୍ୟପ୍ରାଣୀଙ୍କ ପାଇଁ ଅସୁରକ୍ଷିତ ସ୍ଥାନ ବୋଲି ବନ୍ୟପ୍ରାଣୀ ବିଶେଷଜ୍ଞମାନେ କହୁଛନ୍ତି। ସବୁଠାରୁ ବଡ଼ କଥା ହେଲା, ଏତେ ସବୁ ପରେ ବି ୨୦୧୨ ସର୍କୁଲାରକୁ ବନବିଭାଗ ପାଳନ କରୁନାହିଁ। କାରଣ ଆଠଗଡ଼ ଡିଏଫ୍ଓଙ୍କ ବିରୋଧରେ ଏପର୍ଯ୍ୟନ୍ତ କୌଣସି କାର୍ଯ୍ୟାନୁଷ୍ଠାନ ନିଆଯାଇନାହିଁ ବୋଲି ବନ୍ୟପ୍ରାଣୀ ବିଶେଷଜ୍ଞ ବିଶ୍ୱଜିତ ମହାନ୍ତି କହିଛନ୍ତି।
ସୋମବାର ଓଡ଼ିଶା ବନ୍ୟପ୍ରାଣୀ ସମିତି ଓ ଆନିମଲ ୱେଲଫେୟାର ଟ୍ରଷ୍ଟ ଏକାମ୍ର ତରଫରୁ ଆୟୋଜିତ ମିଳିତ ଖବରଦାତା ସମ୍ମିଳନୀରେ ବିଶ୍ୱଜିତ ରାଜ୍ୟରେ ହାତୀ ଶିକାର ରୋକିବାରେ ବନ ବିଭାଗର ବିଫଳତାକୁ ସମାଲୋଚନା କରିଛନ୍ତି। ସେ କହିଛନ୍ତି, ଗତ ୧୨ବର୍ଷ ଭିତରେ ଓଡ଼ିଶାରେ ୯୪୭ଟି ହାତୀଙ୍କର ମୃତ୍ୟୁ ଘଟିଛି। ହାତୀ ମୃତ୍ୟୁ ଲୁଚାଇବା ପାଇଁ ବନ କର୍ମଚାରୀ ବିଭିନ୍ନ ଉପାୟ କରୁଛନ୍ତି। ହାତୀ ମୃତ୍ୟୁ ଘଟଣା ପାଇଁ ଡିଏଫ୍ଓ ଦାୟୀ ରହିବେ ବୋଲି ୨୦୧୨ରେ ରାଜ୍ୟ ବନ ବିଭାଗ ସର୍କୁଲାର ଜାରି କରିଥିଲା। କିନ୍ତୁ ଏହି ସର୍କୁଲାରକୁ ଅଦ୍ୟାବଧି ପାଳନ କରାଯାଇ ନାହିଁ। ସବୁଠି ତଳିଆ କର୍ମଚାରୀଙ୍କ ବିରୋଧରେ କାର୍ଯ୍ୟାନୁଷ୍ଠାନ ନିଆଯାଇ ବଡ଼ ଅଧିକାରୀଙ୍କୁ ଛାଡ଼ି ଦିଆଯାଉଛି ବୋଲି ବିଶ୍ୱଜିତ ପ୍ରକାଶ କରିଛନ୍ତି।