ଭୁବନେଶ୍ୱର,୨୮।୯(ଅଭୟ ଦାଶ): ରିଲାଏନ୍ସ ଫାଉଣ୍ଡେଶନର ଅଧ୍ୟକ୍ଷା ନୀତା ଏମ୍ ଅମ୍ବାନୀଙ୍କୁ ନିକଟରେ ଆଉ ଏକ ସମ୍ମାନଜନକ ପୁରସ୍କାରରେ ପୁରସ୍କୃତ କରାଯାଇଛି। ଉଲ୍ଲେଖଯୋଗ୍ୟ, ରୋଟାରି କ୍ଲବ ଅଫ୍ ବମ୍ବେ ପକ୍ଷରୁ ଆୟୋଜିତ ଏକ ସ୍ବତନ୍ତ୍ର ସମ୍ମାନ ସମାରୋହରେ ନୀତାଙ୍କୁ ୨୦୨୩-୨୪ ବର୍ଷ ପାଇଁ ସମ୍ମାନଜନକ ସିଟିଜେନ୍ ଅଫ୍ ମୁମ୍ବାଇ ଆୱାର୍ଡ ଦିଆଯାଇଛି। ବିଶେଷକରି ସ୍ବାସ୍ଥ୍ୟ, ଶିକ୍ଷା, କ୍ରୀଡ଼ା, କଳା ଏବଂ ସଂସ୍କୃତି କ୍ଷେତ୍ରରେ ଉଲ୍ଲେଖନୀୟ ଅବଦାନ ପାଇଁ ନୀତାଙ୍କୁ ଉପରୋକ୍ତ ସମ୍ମାନ ପ୍ରଦାନ କରାଯାଇଛି। ଏହି ପରିପ୍ରେକ୍ଷୀରେ ନୀତା କହିଛନ୍ତି, ଉକ୍ତ ସମ୍ମାନକୁ ମୁଁ ଅତ୍ୟନ୍ତ ବିନମ୍ରତାର ସହ ଗ୍ରହଣ କରୁଛି।
ଏପରିକି ଆମ ସହର ମୁମ୍ବାଇ ଓ ଏହାର ବାସିନ୍ଦାଙ୍କ ପାଇଁ ରୋଟାରି କ୍ଲବ ଅଫ୍ ବମ୍ବେର ଅତୁଳନୀୟ ଅବଦାନକୁ ସମ୍ମାନ ଜଣାଇଛୁ। ସେହିଭଳି ଜଣେ ରୋଟାରିଆନ ଭାବେ ଦୀର୍ଘ ୨୫ ବର୍ଷ ହେବ ମୁଁ ଆପଣମାନଙ୍କ ସାଙ୍ଗରେ ବିତାଇଛି। ସେହିପରି ଧୀରୁଭାଇ ଅମ୍ବାନୀ ୧୯୬୯ରେ ଜଣେ ଅନରାରି ରୋଟାରିଆନ ହେବା ପରଠାରୁ ଅମ୍ବାନୀ ପରିବାରର ରୋଟାରି ସହ ସମ୍ପର୍କ ଆରମ୍ଭ ହୋଇଥିଲା। ଉଲ୍ଲେଖଯୋଗ୍ୟ, ରିଲାଏନ୍ସ ଦ୍ୱାରା ମୁମ୍ବାଇଠାରେ ସୃଷ୍ଟି କରାଯାଇଥିବା ପ୍ରତିଟି ଅନୁଷ୍ଠାନ ମୁମ୍ବାଇ ସହର ସହ ଦୃଢ଼ ଭାବେ ସଂଯୁକ୍ତ ଏବଂ ମୁମ୍ବାଇର ଦର୍ଶନରେ ଅନୁପ୍ରାଣିତ ବୋଲି ନୀତା ବିସ୍ତୃତ ଭାବେ ଆଲୋକପାତ କରିଥିଲେ।