ଢେଙ୍କାନାଳ,୨୩ା୯(ରତନ ନାୟାର): ଢେଙ୍କାନାଳ ସହର ୧ନଂ. ୱାର୍ଡରେ ଥିବା ପୌର ଆୟୁର୍ବେଦିକ ଚିକିତ୍ସାଳୟ ବନ୍ଦ ହେବା ଆଶଙ୍କା ଦେଖାଦେଇଛି। ଏଠାରେ ଥିବା ଡାକ୍ତର ଅବସର ଗ୍ରହଣ କରିବାର ଦୀର୍ଘଦିନ ହୋଇଯାଇଥିଲେ ହେଁ ନୂତନ ଡାକ୍ତରଙ୍କୁ ନିଯୁକ୍ତି ଦିଆଯାଉ ନାହିଁ। ଏହାକୁ ଅଞ୍ଚଳବାସୀଙ୍କ ମଧ୍ୟରେ ତୀବ୍ର ଅସନ୍ତୋଷ ଦେଖାଦେଇଛି।
ପ୍ରକାଶ ଯେ, ୧୯୮୫ ଫେବୃୟାରୀ ୯ରେ ଏହି ଆୟୁର୍ବେଦିକ ଚିକିତ୍ସାଳୟ ସ୍ଥାପନ ହୋଇଥିଲା। ପ୍ରସିଦ୍ଧ କବିରାଜ ସ୍ବର୍ଗତ ବାଳକୃଷ୍ଣ ନନ୍ଦଙ୍କ ନାମରେ ଏହାର ନାମକରଣ କରାଯାଇ ବାଳକୃଷ୍ଣ ପୌର ଆୟୁର୍ବେଦିକ ଚିକିତ୍ସାଳୟ ରଖାଯାଇଥିଲା। ଏହି ୱାର୍ଡରେ ବହୁ ସଂଖ୍ୟାରେ ଆଦିବାସୀ ଓ ଗରିବ ଶ୍ରେଣୀର ଲୋକ ରହୁଥିବା ବେଳେ ଆର୍ଥିକ ଅବସ୍ଥା ଭଲ ନ ଥିବାରୁ ସେମାନେ ଉପଯୁକ୍ତ ଚିକିତ୍ସା ପାଇପାରୁ ନ ଥିଲେ। ଏପରି କି ଜିଲା ମୁଖ୍ୟ ଚିକିତ୍ସାଳୟ ପ୍ରାୟ ୬ କିଲୋମିଟର ଦୂରରେ ଥିବାରୁ ସେଠାକୁ ଯାଇ ଚିକିତ୍ସିତ ହେବା ସମ୍ଭବପର ହେଉ ନ ଥିଲା। ତେଣୁ ୧୯୮୪ ମସିହାରେ ପୌର ପରିଷଦ ବୈଠକରେ ଅନୁମୋଦନ ପରେ ଏହି ଓ୍ବାର୍ଡରେ ଆୟୁର୍ବେଦିକ ଚିକିତ୍ସାଳୟ ଖୋଲାଯାଇଥିଲା। ପୂର୍ବତନ ନଗରପାଳ ଶରତ ମିଶ୍ର, ଶ୍ରୀଧର ସାହୁ ଓ ସୁରେନ୍ଦ୍ର ମିଶ୍ର ତତ୍କାଳୀନ ପୌର ନିର୍ଦ୍ଦେଶକଙ୍କୁ ଦେଖାକରି ଆୟୁର୍ବେଦିକ ଚିକିତ୍ସାଳୟ ଖୋଲିବା ପାଇଁ ଦାବି କରିବା ପରେ ଏହା ସ୍ଥାପନ ପାଇଁ ବାଟ ମଧ୍ୟ ଖୋଲିଥିଲା। ଏହି ଚିକିତ୍ସାଳୟରେ ବହୁ ସଂଖ୍ୟାରେ ରୋଗୀ ଚିକିତ୍ସିତ ହେଉଥିଲେ। ହେଲେ କାର୍ଯ୍ୟରତ ଡାକ୍ତର ଅବସରଗ୍ରହଣ କରିବା ପରେ ନୂଆ ଡାକ୍ତରଙ୍କୁ ନିଯୁକ୍ତି ଦିଆଯାଇନାହିଁ ା ଫଳରେ କିଛି ମାସ ହେଲା ଏଠାରୁ ଚିକିତ୍ସାସେବା ମିଳୁପାରୁ ନାହିଁ। ତେଣୁ ଏହି ସ୍ବାସ୍ଥ୍ୟ ଅନୁଷ୍ଠାନ ବନ୍ଦ ହୋଇଯିବା ସମ୍ଭାବନା ସୃଷ୍ଟି ହୋଇଛି। ପୌର କର୍ତ୍ତୃପକ୍ଷ ଏଥିପ୍ରତି ତୁରନ୍ତ ଦୃଷ୍ଟି ଦେବାକୁ ପୂର୍ବତନ ନଗରପାଳ ସୁରେନ୍ଦ୍ର ମିଶ୍ର ଦାବି କରିଛନ୍ତି। ଏ ସମ୍ପର୍କରେ ପୌର ଉପାଧ୍ୟକ୍ଷ ପ୍ରକାଶ ଚନ୍ଦ୍ର କୁଅଁର କହିଛନ୍ତି, ଏହି ଆୟୁର୍ବେଦିକ ଚିକିତ୍ସାଳୟର ଗୁରୁତ୍ୱ ରହିଛି। ଏହା ଉପରେ ଅଞ୍ଚଳବାସୀ ନିର୍ଭରଶୀଳ ଥିବାରୁ କାର୍ଯ୍ୟକ୍ଷମ କରାଯିବା ଜରୁରୀ। ତେଣୁ ସୋମବାର ନିର୍ବାହୀ ଅଧିକାରୀଙ୍କ ସହ ଆଲୋଚନା ପରେ ପଦକ୍ଷେପ ନିଆଯିବ।