ଜଗତ୍ସିଂହପୁର ଅଫିସ, ୩୦ା୪: ଓକିଲମାନେ କାର୍ଯ୍ୟକ୍ଷମ ଥିବା ପର୍ଯ୍ୟନ୍ତ ମହକିଲଙ୍କଠାରୁ ପ୍ରାପ୍ୟ ପାଆନ୍ତି। କିନ୍ତୁ ଅବସର କିମ୍ବା ଅକ୍ଷମ ଆଦି ହୋଇଗଲେ ସେମାନଙ୍କ ରୋଜଗାର ମାଧ୍ୟମ ଏକପ୍ରକାର ବନ୍ଦ ହୋଇଯାଏ। ତେଣୁ ଓକିଲମାନଙ୍କ ପାଇଁ ସରକାର ପେନ୍ସନ ବ୍ୟବସ୍ଥା ଲାଗୁ କରନ୍ତୁ। ଜଗତ୍ସିଂହପୁର ଜଲା ଅଧିବକ୍ତା ପରିଷଦ ପକ୍ଷରୁ ମଧୁ ଜୟନ୍ତୀ ପାଳନ ଅବସରରେ ଅନୁଷ୍ଠିତ ସଭାରେ ମୁଖ୍ୟ ଅତିଥି ଭାବେ ଯୋଗଦେଇ ଖାଉଟି ଅଦାଲତର ଅଧ୍ୟକ୍ଷ ପ୍ରଭାସ କୁମାର ପାଢୀ ଏଭଳି ଦାବି କରିଛନ୍ତି। ପରିଷଦ ସଭାପତି ସୁବାସ ଚନ୍ଦ୍ର ମହାନ୍ତିଙ୍କ ପୌରୋହିତ୍ୟରେ ଅନୁଷ୍ଠିତ କାର୍ଯ୍ୟକ୍ରମରେ ଅନ୍ୟମାନଙ୍କ ମଧ୍ୟରେ ଜିଲା ଓକିଲ ସଂଘ ସଭାପତି ପ୍ରମୋଦ କୁମାର ସ୍ବାଇଁ, ସମ୍ପାଦକ ନଳିନୀ ରଞ୍ଜନ ମହାପାତ୍ର, ଖାଉଟି ଅଦାଲତ ସଭ୍ୟ ମଧୁସ୍ମିତା ସ୍ବାଇଁ, ଜିଲା ଓକିଲ ସଂଘ ପ୍ରାକ୍ତନ ସଭାପତି ଗଗନ ଦାଶ, ରାଜକିଶୋର ବେହେରା, ଯୁଧିଷ୍ଠିର ମିଶ୍ର ପ୍ରମୁଖ ଯୋଗଦେଇଥିଲେ। ଏହି ସମୟରେ ପରିଷଦ ଜିଲା କାର୍ଯ୍ୟକାରିଣୀ ସଦସ୍ୟ ଯଥା ବିବେକାନନ୍ଦ ନାୟକ, ଦେବପ୍ରୀତ ଦାସ, ରଞ୍ଜିତ କୁମାର ବେହେରା, ପର୍ଶୁରାମ ରାଉତ, ପ୍ରଦୀପ୍ତ କୁମାର ବିହାରୀ, ସତ୍ୟବ୍ରତ ପଣ୍ଡା ପ୍ରମୁଖ ଉପସ୍ଥିତ ରହି ରାଜ୍ୟ କାର୍ଯ୍ୟକାରିଣୀ ସଦସ୍ୟ ଲିଙ୍ଗରାଜ ମହାନ୍ତିଙ୍କ ସହ ଆଲୋଚନା କରିଥିଲେ। ଉକ୍ତ ସଭାରେ ସାରଦା ପ୍ରସାଦ ଦାସ ସ୍ବାଗତ ଭାଷଣ ଓ ଶେଷରେ ପରିଷଦ ସମ୍ପାଦକ ସଂଗ୍ରାମ କିଶୋର ନାୟକ ଧନ୍ୟବାଦ ଦେଇଥିଲେ।
