ଜି.ଉଦୟଗିରି,୨୮ା୩: ଜି.ଉଦୟଗିରି ପଞ୍ଚାୟତ ସମିତି ରଟିଙ୍ଗିଆ ଅଞ୍ଚଳବାସୀ ବିଭିନ୍ନ ଦାବି ନେଇ ସୋମବାର ପଞ୍ଚାୟତ ସମିତି କାର୍ଯ୍ୟାଳୟରେ ପହଞ୍ଚି ବିକ୍ଷୋଭ ପ୍ରଦର୍ଶନ କରିବା ସହ ତୁରନ୍ତ ସମସ୍ୟା ସମାଧାନ ନିମନ୍ତେ ବିଡିଓଙ୍କୁ ଦାବିପତ୍ର ପ୍ରଦାନ କରିଥିଲେ। ଜି.ଉଦୟଗିରି ପଞ୍ଚାୟତ ସମିତି ଅନ୍ତର୍ଗତ ରଟିଙ୍ଗିଆ ସମିତି ସଭ୍ୟ ତଥା ପଞ୍ଚାୟତ ସମିତି ଉପାଧ୍ୟକ୍ଷ ଏନ.ଲୁକ, ସମାଜିକକର୍ମୀ ହୃଷୀକେଶ ପ୍ରଧାନ ଓ ରଟିଙ୍ଗିଆ ସରପଞ୍ଚ ବିଷ୍ଣୁଦେବ ପ୍ରଧାନଙ୍କ ନେତୃତ୍ୱରେ ରଟିଙ୍ଗିଆ ପଞ୍ଚାୟତବାସୀ ବିଦ୍ୟୁତ୍ ବିଭାଗ କାର୍ଯ୍ୟାଳୟ ଘେରିଥିଲେ। ଉକ୍ତ ଦାବି ଗୁଡିକ ମଧ୍ୟରେ ନେଟୱର୍କ ସମସ୍ୟା ସମାଧାନ, ଭତ୍ତା ସମସ୍ୟା ସମାଧାନ, ବିଦ୍ୟୁତ୍ କାଟ ପ୍ରତି ଦୃଷ୍ଟି ଦେବା, ଜି.ଉଦୟଗିରି ଶ୍ରୀରାମପଦାଠାରୁ ଡକ୍ରିଙ୍ଗିଆ ଭାୟା ରଟିଙ୍ଗିଆ ରାସ୍ତାକୁ ପ୍ରଧାନମନ୍ତ୍ରୀ ସଡକ ଯୋଜନାରେ ତୁରନ୍ତ ମରାମତି କରିବା ଓ ସାଧାରଣ ବଣ୍ଟନ ବ୍ୟବସ୍ଥାର ସମାଧାନ କରିବା। ଉକ୍ତ ଦାବୀ ଗୁଡିକର ସମାଧାନ ତୁରନ୍ତ ନ ହେଲେ ଆଗକୁ ପଞ୍ଚାୟତବାସୀ ଆନ୍ଦୋଳନାତ୍ମକ ପନ୍ଥା ଗ୍ରହଣ କରିବେ ବୋଲି ଚେତାବନୀ ଦେଇଛନ୍ତି। ନେଟୱର୍କ ସମସ୍ୟା ସମାଧାନ ନିମନ୍ତେ ବିଏସ୍ଏନ୍ଏଲ ସହ ବିକଳ୍ପ ଭାବେ ଜିଓ ଟାୱାର ନିର୍ମାଣ ନିମନ୍ତେ ପୂର୍ବରୁ ଜନଶୁଣାଣି ସମୟରେ ଲୋକେ ଅଭିଯୋଗ କରିଥିଲେ । କିନ୍ତୁ ଏହାର କୌଣସି ସମାଧାନ ହୋଇ ନ ଥିଲା ବୋଲି ଅଞ୍ଚଳବାସୀ କହିଛନ୍ତି।