ଖଣ୍ଡପଡା,୧୨ା୬(ସ୍ବ.ପ୍ର.): କାଳବୈଶାଖୀ ପ୍ରଭାବରେ ବର୍ଷା, ପବନ ଯୋଗୁ ଖଣ୍ଡପଡ଼ା ବ୍ଲ୍ଳକ ଅଧୀନ ୨୨ଟି ପଞ୍ଚାୟତରେ ଶନିବାର ଅପରାହ୍ନରେ ବ୍ୟାପକ କ୍ଷୟକ୍ଷତି ହୋଇଛି। ରାସ୍ତା କଡ଼ରେ ଥିବା ବଡ଼ ବଡ଼ ଗଛ ଓ ଡ଼ାଳ ଭାଙ୍ଗି ପଡ଼ିବା ଯୋଗୁ ଶତାଧିକ ଟିଣ, ଆଜବେଷ୍ଟସ ଛପର ଘର ଭାଙ୍ଗି ନଷ୍ଟ ହେବା ସହ ଗଁା ଗଣ୍ଡାରେ କଚ୍ଚା ଘରଗୁଡ଼ିକ କ୍ଷତିଗ୍ରସ୍ତ ହୋଇଥିଲା। ଏହାଛଡ଼ା ବିଭିନ୍ନ ଶିକ୍ଷାନୁଷ୍ଠାନ ମଧ୍ୟ ନଷ୍ଟ ହୋଇଥିବା ଜଣାଯାଇଛି। ଅଭାବ ଅନଟନରେ ଥିବା କ୍ଷତିଗ୍ରସ୍ତ ପରିବାରର ମେରୁଦଣ୍ଡ ଦୋହଲି ଯାଇଛି। ବାସଗୃହ ଗୁଡ଼ିକ ସଜାଡ଼ବା ନିମନ୍ତେ ଅର୍ଥର ଅଭାବ ଯୋଗୁ ବାସଗୃହ ଶୂନ୍ୟ ପରିବାର ସମସ୍ୟା ମଧ୍ୟରେ ଗତି କରୁଛନ୍ତି। କେଉଁଠି ଗଛର ଡ଼ାଳ ଭାଙ୍ଗି ପଡ଼ିଛି ତ କେଉଁଠି ବିଦ୍ୟୁତ୍ ଖୁଣ୍ଟ ଓ ଗଛ ଉପୁଡ଼ି ପଡ଼ି ଘର ଉପରେ ପଡିଛି।
ସୂଚନାଯୋଗ୍ୟ ରାସ୍ତାର ଉଭୟପାର୍ଶ୍ୱରେ ଥିବା ବିଭିନ୍ନ ଗଛ ଓ ଡାଳ ଭାଙ୍ଗି ବିଦ୍ୟୁତ ଖୁଣ୍ଟ ଓ ତାରରେ ପଡ଼ି ଖଣ୍ଡପଡା ବିଦ୍ୟୁତ ସେକ୍ସନର ୨ଟି ୧୧ କେଭି ଖୁଣ୍ଟ ଓ ୫ଟି ଏଲଟି ଲାଇନ ଖୁଣ୍ଟ ଭାଙ୍ଗି ପଡ଼ିଥିବା ବେଳେ ୨୨ ସ୍ପାନ ବିଦ୍ୟୁତ୍ ତାର ଛିଣ୍ଡି ଅସ୍ତବ୍ୟସ୍ତ ହୋଇପଡ଼ିଥିବା କନିଷ୍ଠ ଯନ୍ତ୍ରୀ ବିନୋଦ କୁମାର ମହାରଣା ସୂଚନା ଦେଇଛନ୍ତି। ସେହିପରି କଣ୍ଟିଲୋ ବିଦ୍ୟୁତ ସେକ୍ସନ ଅଧୀନ ବିଭିନ୍ନ ସ୍ଥାନରେ ଥିବା ୧୧ କେଭି ଲାଇନର ୧୫ଟି ଖୁଣ୍ଟ ଓ ୧୬ଟି ଏଲଟି ଲାଇନର ଖୁଣ୍ଟ ଭାଙ୍ଗି ପଡ଼ିଥିବା ବେଳେ ପ୍ରାୟ ୩୨ ସ୍ପାନ ବିଦ୍ୟୁତ୍ ଲାଇନ ତାର ନଷ୍ଟ ହୋଇଯାଇଥିବା ବିଦ୍ୟୁତ ସେକ୍ସନ କନିଷ୍ଠ ଯନ୍ତ୍ରୀ ରମେଶ କୁମାର ସାହୁଙ୍କଠାରୁ ସୂଚନା ମିଳିଛି। ଏଭଳି ଅଭାବନୀୟ ପରିସ୍ଥିତି ମଧ୍ୟରେ କାଳବୈଶାଖୀ ପ୍ରଭାବରେ କ୍ଷତିଗ୍ରସ୍ତ ପରିବାରବର୍ଗଙ୍କୁ ତୁରନ୍ତ ଚିହ୍ନଟ କରି କ୍ଷତିପୂରଣ ବାବଦରେ ଆର୍ଥତ୍କ ସହାୟତା ରାଶି ଯୋଗାଇ ଦେବା ନିମନ୍ତେ ଖଣ୍ଡପଡ଼ା ତହସିଲ ପ୍ରଶାସନ ଦୃଷ୍ଟି ଦେବାକୁ ଦାବି ହେଉଛି। ଶନିବାର ଓ ରବିବାର ଛୁଟି ଥିବାରୁ ପ୍ରଶାସନିକ ସ୍ତରରେ କ୍ଷୟକ୍ଷତିର ଆକଳାନ କରିବାରେ ବାଧକ ସୃଷ୍ଟି ହୋଇଛି। ତେବେ ରାଜସ୍ବ ନୀରିକ୍ଷକମାନେ ବିଭିନ୍ନ ଗ୍ରାମକୁ ଗସ୍ତ କରି କ୍ଷୟକ୍ଷତିର ଆକଳନ କରି ଜିଲା ପ୍ରଶାସନକୁ ତୁରନ୍ତ ରିପୋର୍ଟ ପ୍ରଦାନ କରିବାକୁ ସାଧାରଣରେ ଦାବି ହେଉଛି।