ଗାଜିଆବାଦ,୩୦।୬: ଦିଲ୍ଲୀର ଗାଜିପୁର ସୀମାରେ ଭାଜପା କର୍ମକର୍ତ୍ତା ଓ କୃଷକ ମୁହାଁମୁହିଁ। କେନ୍ଦ୍ରରେ ମୋଦି ସରକାରଙ୍କ ୩ଟି କୃଷି ଆଇନ ବିଲ୍ ବିରୋଧରେ ଦିଲ୍ଲୀ ସୀମାରେ ଆନ୍ଦୋଳନ କରୁଥିବା କୃଷକ ଓ ଭାଜପା କର୍ମକର୍ତ୍ତାଙ୍କ ମଧ୍ୟରେ ବୁଧବାର ହଙ୍ଗାମା ହୋଇଥିବା ଜଣାପଡ଼ିଛି। ଉଭୟ ପରସ୍ପରକୁ ଲାତ ବିଧା ମାରିଥିବା ଅଭିଯୋଗ ହୋଇଛି। ଏହି ଘଟଣାରେ ଉଭୟ ଗୋଷ୍ଠୀର ଲୋକ ଆହତ ହୋଇଥିବା ବେଳେ ଅନେକ ଗାଡ଼ି ଭଙ୍ଗାରୁଜା କରାଯାଇଛି। ସୂଚନାଯୋଗ୍ୟ, ଭାଜପାର ପ୍ରଦେଶ ମନ୍ତ୍ରୀ ଅମିତ ବାଲ୍ମିକୀ ପ୍ରଥମ ଥର ପାଇଁ ଗାଜିଆବାଦ ଆସିଥିଲେ। ଗାଜିପୁର ସୀମାରେ ଭାଜପା କର୍ମକର୍ତ୍ତା ତାଙ୍କୁ ସ୍ବାଗତ ଜଣାଇବା ପାଇଁ ବ୍ୟାଣ୍ଡ ବାଜା ସହ ଆନ୍ଦୋଳନ ସ୍ଥଳ ନିକଟରେ ଏକତ୍ରିତ ହୋଇଥିଲେ। ସେହି ସମୟରେ ବିକ୍ଷୋଭକାରୀ କୃଷକମାନେ କଳା ପତାକା ଦେଖାଇ ହଙ୍ଗାମା କରିଥିଲେ। ଏହାକୁ ନେଇ ଭାଜପା ନେତା ଓ କୃଷକଙ୍କ ମଧ୍ୟରେ ମାରପିଟ୍ ଆରମ୍ଭ ହୋଇଯାଇଥିଲା। ଏହାପରେ କୃଷକମାନେ ବାଡ଼ି ଓ ଢ଼େଲାରେ ଗାଡ଼ି ଉପରକୁ ଆକ୍ରମଣ କରିଥିଲେ। କୃଷକଙ୍କ ଆକ୍ରମଣ ଦେଖି ଅମିତ କୌଣସି ପ୍ରକାରେ ସେଠାରୁ ପଳାଇଯାଇଥିଲେ। କିନ୍ତୁ ପରେ କୃଷମମାନେ ଅନ୍ୟ ନେତାଙ୍କ ଗାଡ଼ି ଉପରକୁ ଆକ୍ରମଣ କରିଥିବା ବେଳେ ୭୦ରୁ ୮୦ଗାଡ଼ି ଭଙ୍ଗାରୁଜା କରାଯାଇଛି। ଅନ୍ୟପଟେ ଭାଜପା କର୍ମକର୍ତ୍ତା କୃଷକଙ୍କୁ ଗାଳିଗୁଲଜ ଓ ଦୁର୍ବ୍ୟବହାର କରିଥିବା ଅଭିଯୋଗ ହୋଇଛି।
