ଡେରାବିଶ,୨୪।୯(ବେବର୍ତା ଅଜୟ ଦାସ): କେନ୍ଦ୍ରାପଡ଼ା ସଦର ଥାନା ଅଧୀନ ଡେରାବିଶ ବ୍ଲକ ଯଅଁରାବାରିମୂଳ ପଞ୍ଚାୟତ ଯଅଁରାବାରିମୂଳ ଗ୍ରାମରେ ଶୁକ୍ରବାର ରାତିରେ ଗଣେଶମୂର୍ତ୍ତି ଭସାଣି ଶୋଭାଯାତ୍ରା ବେଳେ ଗୋଷ୍ଠୀ ସଂଘର୍ଷ ଘଟିଛି। ଏହାକୁ ନେଇ ଥାନାରେ ପୃଥକ୍ ପୃଥକ୍ ମାମଲା ରୁଜୁ ହୋଇଛି। ଏହି ଘଟଣାରେ ଗ୍ରାମର ଦୁଇଜଣ ଗୁରୁତର ହୋଇଛନ୍ତି। ଉଭୟଙ୍କୁ କଟକ ବଡ଼ ମେଡ଼ିକାଲ୍ରେ ଭର୍ତ୍ତି କରାଯାଇଛି। ଆହତ ଦ୍ୱୟ ହେଲେ ସୁବ୍ରତ ବଳ ଓ ସିଦ୍ଧାର୍ଥ ବଳ। ଗ୍ରାମର ଅନ୍ୟ କେତେଜଣ ଆହତ ହୋଇଥିବା ନେଇ ଥାନାରେ ଅଭିଯୋଗ ହୋଇଛି। ଖବର ପାଇ ଚାନ୍ଦୋଳ ଫାଣ୍ଡି ଅଧିକାରୀ ସୌମ୍ୟରଞ୍ଜନ ପାଣିଗ୍ରାହୀଙ୍କ ନେତୃତ୍ୱରେ ପୋଲିସ୍ ଟିମ୍ ପହଞ୍ଚତ୍ ପରିସ୍ଥିତିକୁ ନିୟନ୍ତ୍ରଣ କରିଥିଲେ। ଏହି ସମୟରେ ଗାଁର ଏକ ଘରେ ନିଆଁ ଲାଗିଯାଇଥିଲା। ଖବର ପାଇ ନିଶ୍ଚିନ୍ତକୋଇଲି ଅଗ୍ନିଶମ ବିଭାଗର କର୍ମଚାରୀମାନେ ପହଞ୍ଚତ୍ ନିଆଁକୁ ଆୟତ୍ତ କରିଥିଲେ।
ଗ୍ରାମର ଅନନ୍ତ ଚରଣ ବଳଙ୍କ ସ୍ତ୍ରୀ କୁସୁମ ଥାନାରେ କରିଥିବା ଅଭିଯୋଗ ଅନୁଯାୟୀ, ଶୁକ୍ରବାର ରାତି ୮ଟା ୩୦ରେ ଗାଁରେ ଚାଲିଥିବା ଗଣେଶ ଭସାଣି ଶୋଭାଯାତ୍ରା ବେଳେ ତାଙ୍କ ପୁଅ ଅନିରୁଦ୍ଧ ଘରକୁ ଫେରୁଥିଲେ। ହେଲେ ଗ୍ରାମର କେତେଜଣ ଯୁବକ ତାଙ୍କ ପୁଅଙ୍କୁ ଆକ୍ରମଣ କରିଥିଲେ। ନିଜ ଜୀବନ ବଞ୍ଚାଇବାକୁ ଅନିରୁଦ୍ଧ ଘରକୁ ପଳାଇ ଆସିଥିଲେ। ହେଲେ ଗାଁର କେତେଜଣ ଯୁବକ ବିଭିନ୍ନ ମାରଣାସ୍ତ୍ର ଧରି ତାଙ୍କ ଘରର ଗେଟ୍କୁ ବାଡ଼େଇ ଭାଙ୍ଗିଦେବା ସହ ୨ ବୋହୂ, ଝିଅ ଓ ନାତୁଣୀଙ୍କୁ ଆକ୍ରମଣ କରିବାକୁ ପଛେଇ ନ ଥିଲେ। ଏପରିକି ତାଙ୍କ ଘରକୁ ମଧ୍ୟ ଏହି ଅସାମାଜିକ ଯୁବକମାନେ ନିଆଁ ଲଗାଇ ଦେବା ସହ ପରିବାର ଲୋକଙ୍କୁ ଜୀବନରୁ ମାରିଦେବାକୁ ଧମକ ଦେଇଥିବା ଅଭିଯୋଗରେ ଦର୍ଶାଯାଇଛି। ଏହି ଅଗ୍ନିକାଣ୍ଡରେ ଘରର ଲକ୍ଷାଧିକ ଟଙ୍କାର ଆସବାବପତ୍ର ସମ୍ପୂର୍ଣ୍ଣ ପୋଡ଼ି ପାଉଁଶ ହୋଇଯାଇଛି। ଏ ନେଇ ଗ୍ରାମର ୨୧ ଜଣଙ୍କ ବିରୋଧରେ କୁସୁମ ଅଭିଯୋଗ କରିଛନ୍ତି।ଅପରପକ୍ଷେ ଗ୍ରାମର ସୁବ୍ରତ ବଳଙ୍କ ସ୍ତ୍ରୀ ମୋନିକା ଥାନାରେ ଦେଇଥିବା ଅଭିଯୋଗ ଅନୁଯାୟୀ, ଗଣେଶ ଭସାଣି ଶୋଭାଯାତ୍ରା ସମୟରେ ତାଙ୍କ ସ୍ବାମୀ ସୁବ୍ରତ ଛିଡ଼ା ହୋଇଥିଲେ। ଗ୍ରାମର ଯୁବକ ଅନିରୁଦ୍ଧ ରାସ୍ତାରେ କାହିଁକି ଛିଡ଼ା ହୋଇଛ ବୋଲି ତାଙ୍କୁ କହି ଅଶ୍ଳୀଳ ଭାଷାରେ ଗାଳିଗୁଲଜ କରିଥିଲେ।ଉପସ୍ଥିତ ଗ୍ରାମବାସୀ ବୁଝାଶୁଝା କରିଥିଲେ। ମାତ୍ର ଅନିରୁଦ୍ଧ ଫୋନ୍ ଯୋଗେ ତାଙ୍କ ବାପା ଅନନ୍ତଙ୍କ ସମେତ ତାଙ୍କ ପରିବାରର ୩ଜଣଙ୍କୁ ଘଟଣାସ୍ଥଳକୁ ଡକାଇ ବିଭିନ୍ନ ମାରଣାସ୍ତ୍ରରେ ସୁବ୍ରତଙ୍କୁ ଆକ୍ରମଣ କରିଥିଲେ। ଏଥିସହିତ ଅନିରୁଦ୍ଧଙ୍କ ପରିବାରର ମହିଳାମାନେ ଛାତ ଉପରୁ ଟେକା ପଥର ତାଙ୍କ ଉପରକୁ ଫୋପାଡ଼ି ଥିଲେ ବୋଲି ସେ ଅଭିଯୋଗରେ ଉଲ୍ଲେଖ କରିଛନ୍ତି। ଏହି ଆକ୍ରମଣରେ ତାଙ୍କ ସ୍ବାମୀ ସୁବ୍ରତ ଓ ଗ୍ରାମର ସିଦ୍ଧାର୍ଥ ବଳ ରକ୍ତାକ୍ତ ହୋଇଥିଲେ। ଉଭୟ ଅଭିଯୋଗକୁ ଭିତ୍ତିକରି ଥାନାରେ ୨ଟି ମାମଲା(ନଂ.୬୯୨/୨୩ ଓ ୬୯୩/୨୩) ରୁଜୁ କରାଯାଇଛି। ଘଟଣାର ଅଧିକ ତଦନ୍ତ କରାଯାଉଥିବା ସଦର ଥାନା ଅଧିକାରୀ ସରୋଜ କୁମାର ସାହୁ ସୂଚନା ଦେଇଛନ୍ତି।