ନାଗପୁର, ୬। ୩: ମହାରାଷ୍ଟ୍ର ନାଗପୁରରୁ ଏକ ଚାଞ୍ଚଲ୍ୟକର ଘଟଣା ସାମ୍ନାକୁ ଆସିଛି। ଜଣେ ନାବାଳିକା ୟୁଟ୍ୟୁବ ଦେଖି ସନ୍ତାନ ପ୍ରସବ କରିବା ପରେ ନବଜାତକର ତଣ୍ଟିଚିପି ହତ୍ୟା କରିଛନ୍ତି। ଶୁକ୍ରବାର ନାବାଳିକା ଜଣକ ଘରେ ଏକୁଟିଆ ଥିବାବେଳେ ୟୁଟ୍ୟୁବ୍ ଦେଖି ଏକ କନ୍ୟା ସନ୍ତାନ ପ୍ରସବ କରିଥିଲେ। ପଡ଼ୋଶୀ ନବଜାତକର କାନ୍ଦ ଶୁଣି ଘଟଣା ସମ୍ପର୍କରେ କାଳେ ଜାଣିଯିବେ ସେ ନେଇ ବେଲ୍ଟରେ ଶିଶୁର ଗଳାଚିପି ନାବାଳିକା ହତ୍ୟା କରିଥିବା ପୋଲିସ କହିଛି। ଇନ୍ଷ୍ଟାଗ୍ରାମ ଜରିଆରେ ଠାକୁର ନାମକ ଜଣେ ଯୁବକଙ୍କ ସଂସ୍ପର୍ଶରେ ନବମ ଶ୍ରେଣୀ ଛାତ୍ରୀ ଆସିଥିଲେ। ସେମାନଙ୍କ ମଧ୍ୟରେ ଶରୀରିକ ସମ୍ପର୍କ ଗଢ଼ିଉଠିବା ପରେ ନାବାଳିକା ଗର୍ଭଧାରଣ କରିଥିବା ଜଣାପଡ଼ିଛି। ନାବାଳିକାଙ୍କ ମା’ ଏକ ମଲ୍ରେ କାମ କରୁଥିବାବେଳେ ଶୁକ୍ରବାର ଘରକୁ ଫେରିବା ପରେ ସେ ଘର ଜାରିଆଡ଼େ ରକ୍ତ ଦାଗ ଦେଖିବାକୁ ପାଇଥିଲେ। ନାବାଳିକା ତାଙ୍କ ମା’ଙ୍କୁ ବାଟବଣା କରିବାକୁ ଯାଇ ସେ ସବୁ ମାସିକ ଋତସ୍ରାବର ରକ୍ତ ଦାଗ ବୋଲି କହିଥିଲେ। କିନ୍ତୁ ତାଙ୍କର ସନ୍ଦେହ ଦୂର ହୋଇ ନ ଥିଲା। ବହୁ ପଚାରାପଚରି କରିବା ପରେ ନାବାଳିକା ଶେଷରେ ସବୁ ସତ କହିଦେଇଥିଲେ। ମା’ ତୁରନ୍ତ ନାବାଳିକାଙ୍କୁ ମାୟୋ ଡାକ୍ତରଖାନା ଚିକିତ୍ସା ପାଇଁ ନେଇଥିଲେ। ସେଠାରେ ଡାକ୍ତରଖାନା କର୍ତ୍ତୃପକ୍ଷ ଏହାର ସୂଚନା ସ୍ଥାନୀୟ ପୋଲିସକୁ ଦେଇଥିଲେ। ନବଜାତକର ମୃତଦେହକୁ ଏକ ବ୍ୟାଗ୍ରେ ଭର୍ତ୍ତି କରି ଘରଛାତ ଉପରେ ରଖିଥିବାବେଳେ ପୋଲିସ ମୃତଦେହକୁ ପୋଷ୍ଟମର୍ଟମ୍ ପାଇଁ ପଠାଇଦେଇଛି। ନାବାଳିକା ଘଣ୍ଟା ଘଣ୍ଟା ଫୋନ୍ରେ ଚାଟିଂ କରୁଥିବା ନେଇ ମା’ ତାଙ୍କ ଫୋନ୍ଟିକୁ କିଛିଦିନ ପୂର୍ବେ ଭାଙ୍ଗି ଦେଇଥିଲେ। ତେବେ ନାବାଳିକା ଜଣକ ଉକ୍ତ ଯୁବକଙ୍କ ବିଷୟରେ ବେଶି କିଛି ଜାଣି ନ ଥିବା ପୋଲିସକୁ କହିଛନ୍ତି। ଅନ୍ୟପାକ୍ଷେ ଫୋନ୍ ଭାଙ୍ଗିଯିବା ଯୋଗୁ ସମ୍ପୃକ୍ତ ଯୁବକଙ୍କ ନମ୍ବର ମଧ୍ୟ ପୋଲିକୁ ମିଳିପାରି ନାହିଁ। ତେବେ ସାଇବର ଏକ୍ସପର୍ଟଙ୍କ ସହାୟତା କ୍ରମେ ପୋଲିସ ଘଟଣାର ତଦନ୍ତ ଚଳାଇଛି। ବଳାତ୍କାର ଓ ନବଜାତକର ଦୁର୍ଘଟଣାଜନିତ ମୃତ୍ୟୁ ନେଇ ପୋଲିସ ପକ୍ଷରୁ ଏକ ମାମଲା ରୁଜୁ କରାଯାଇଛି।