ପାରଳାଖେମୁଣ୍ଡି,୨୭।୯(ଗିରିଧାରୀ ପରିଛା):ଗଜପତି ଜିଲା ଗୋଷାଣି ବ୍ଲକ ସରଧାପୁର ପଞ୍ଚାୟତ ସଦରସ୍ଥିତ ଉଚ୍ଚ ବିଦ୍ୟାଳୟର ଉନ୍ନତୀକରଣ ନିମନ୍ତେ ଶ୍ରେଣୀଗୃହଗୁଡିକୁ ପ୍ରାୟ ଏକମାସ ହେଲା ଭାଙ୍ଗି ଦିଆଯାଇଛି। ଏହି କକ୍ଷଗୁଡିକୁ ମରାମତି କିମ୍ବା ପୁନଃନିର୍ମାଣ କରାଯାଉନାହିଁ। ଏପରି ସ୍ଥଳେ ବିଦ୍ୟାଳୟରେ ପଢୁଥିବା ଶତାଧିକ ଛାତ୍ରଛାତ୍ରୀଙ୍କ ଶିକ୍ଷାଦାନ ବ୍ୟବସ୍ଥାରେ ବାଧା ଉପୁଜୁଥିବା ଅଭିଭାବକ ଓ ଛାତ୍ରଛାତ୍ରୀଗଣ କହିଛନ୍ତି। ସରଧାପୁର ଗ୍ରାମଠାରେ ଥିବା ଉଚ୍ଚ ବିଦ୍ୟାଳୟରେ ପ୍ରଥମ ଶ୍ରେଣୀରୁ ଦଶମ ଶ୍ରେଣୀ ପର୍ଯ୍ୟନ୍ତ ଶହେରୁ ଉର୍ଦ୍ଧ ଛାତ୍ରାଛାତ୍ରୀ ପାଠ ପଢୁଛନ୍ତି। ଏହି ବିଦ୍ୟାଳୟ ଉପରେ ସରଧାପୁର, ଜଙ୍ଗଲପାଡୁ, ଏସ୍ଏନ୍ଡି ପେଣ୍ଠ, ଉତ୍ତରସେଲ୍ଲୀ ସମେତ ଆଖପାଖ ଗ୍ରାମାଞ୍ଚଳ ଏବଂ ସୀମାନ୍ତବର୍ତ୍ତୀ ଆନ୍ଧ୍ର ପ୍ରଦେଶ ଶ୍ରୀକାକୁଲମ ଜିଲା ଅନ୍ତର୍ଗତ ଗଙ୍ଗରାଜପୁରମ ପଞ୍ଚାୟତର ବିଭିନ୍ନ ଗ୍ରାମାଞ୍ଚଳର ପିଲାମାନେ ପଢୁଛନ୍ତି। ଗତ ଅଗଷ୍ଟ ମାସରେ ବିଦ୍ୟାଳୟର ଉନ୍ନତୀକରଣ ନିମନ୍ତେ ଶ୍ରେଣୀକକ୍ଷଗୁଡିକୁ ଭାଙ୍ଗି ପୁନଃ ନିର୍ମାଣ ପାଇଁ ନିର୍ଦ୍ଦେଶ ଦିଆଯାଇଥିଲା ବୋଲି ପୂର୍ବତନ ସରପଞ୍ଚ ତଥା ସ୍ଥାନୀୟ ବାସିନ୍ଦା ବାବୁ ରାଓ ପ୍ରକାଶ କରିଛନ୍ତି। ବ୍ଲକ ପ୍ରଶାସନର ନିର୍ଦ୍ଦେଶ ପ୍ରକାରେ ବିଦ୍ୟାଳୟର ୫ଟି ଶ୍ରେଣୀ କକ୍ଷରୁ ୪ଟି ଭାଙ୍ଗି ଦିଆଯାଇଥିଲା। ପ୍ରଥମ ଶ୍ରେଣୀରୁ ଦଶମ ଶ୍ରେଣୀ ପର୍ଯ୍ୟନ୍ତ ପଢୁଥିବା ପିଲାମାନେ ଗୋଟିଏ କକ୍ଷରେ ବସୁଛନ୍ତି । ଫଳରେ ଶିକ୍ଷାଦାନ ବ୍ୟବସ୍ଥାରେ ବାଧା ଉପୁଜିବା ସହ ପିଲାମାନେ କେଉଁ ବିଷୟ କିଏ ପଢୁଛି ଓ କିଏ ପଢାଉଛି ସେ ନେଇ ଦ୍ବନ୍ଦରେ ରହୁଥିବା ପ୍ରକାଶ କରିଛନ୍ତି। ପୂର୍ବତନ ସରପଞ୍ଚ ଶ୍ରୀ ରାଓଙ୍କ ସମେତ ଗ୍ରାମବାସୀ ଓ ଅଭିଭାବକମାନେ ବ୍ଲକ ପ୍ରଶାସନର ଦୃଷ୍ଟି ଆକର୍ଷଣ କରିଥିଲେ ମଧ୍ୟ କାର୍ଯ୍ୟ ଆରମ୍ଭ ହୋଇନଥିବା ଅବିଭାବକମାନେ ଜଣାଇଛନ୍ତି। ଯଦି ଏବେ ଶ୍ରେଣୀ କକ୍ଷଗୁଡିକର ନବୀକରଣ କରିବାର ନ ଥିଲା ତେବେ କାହିକି ଭାଙ୍ଗିବାକୁ ନିର୍ଦ୍ଦେଶ ଦିଆଯାଇଥିଲା? ବର୍ଷା ଦିନ ଜାଣି ଶୁଣି କେମିତି ଭାଙ୍ଗିବାକୁ ଓ କିଏ ନିର୍ଦ୍ଦେଶ ଦେଇଛି ଏ ନେଇ ପ୍ରଶ୍ନ ଉଠାଇଛନ୍ତି ଅଭିଭାବକ। ସେହିପରି ବିଦ୍ୟାଳୟର ଛାତ୍ରୀଛାତ୍ରୀମାନେ ଜଣାଇଛନ୍ତି ଯେ, ଗୋଟିଏ କକ୍ଷରେ ସମସ୍ତଙ୍କୁ ପାଠ ପଢାଯାଉଥିବା ଯୋଗୁଁ ଘୋର ଅସୁବିଧା ଉପୁଜୁଛି । କିଏ କାହାକୁ ପାଠ ପଢାଉଛନ୍ତି ତାହା ବୁଝା ପଡୁନି। ତେଣୁ ସ୍କୁଲର ଶ୍ରେଣୀ କକ୍ଷଗୁଡିକୁ ତୁରନ୍ତ ନିର୍ମାଣ କରାଯାଉ ବୋଲି ଜଣାଇଛନ୍ତି। ଏନେଇ ଗୋଷାଣି ବ୍ଲକ ସହକାରୀ ନିର୍ବାହୀ ଅଧିକାରୀ ନିହାର ନାଇକଙ୍କୁ ପଚରାଯିବାରୁ ଅତି ଶିଘ୍ର ନିର୍ମାଣ କାର୍ଯ୍ୟ ଆରମ୍ଭ କରାଯିବା କଥା କହିଛନ୍ତି ।