କେନ୍ଦୁଝର,୨୫।୧୨ (ନରେଶ ଚନ୍ଦ୍ର ପଟ୍ଟନାୟକ): ବୟସ ମାତ୍ର ଅଢେଇ ବର୍ଷ। ମନ୍ତ୍ରପାଠ, ସାଧାରଣ ଜ୍ଞାନ ହେଉ ଅବା ଦେଶର ଜାତୀୟ ପ୍ରତୀକ କିମ୍ବା ବିଶିଷ୍ଟ ବ୍ୟକ୍ତି ବିଶେଷଙ୍କ ନାମକୁ ପ୍ରାଞ୍ଜଳ ଭାବେ କହି ପାରନ୍ତି ସେ। ଆଉ ନିଜ ବିଚକ୍ଷଣ ବୁଦ୍ଧି ଏବଂ ଅଦ୍ଭୁତ ସ୍ମରଣଶକ୍ତି ପାଇଁ ଇଣ୍ଡିଆ ବୁକ୍ ଅଫ୍ ରେକର୍ଡ-୨୦୨୪ ଆଚିଭର୍ସ ହୋଇଛନ୍ତି କେନ୍ଦୁଝର ସହର ପାର୍କ ଲାଇନ ନିବାସୀ ପୂର୍ଣ୍ଣିମା ସେନାପତି ଏବଂ ଯୁବ ଇଞ୍ଜିନିୟର ମାନସ ରଂଜନ ରଣାଙ୍କ ପୁଅ ଆର. ରୁଦ୍ରାଂଶ।
ଭଲ ଭାବେ ପାଟି ଫିଟି ନଥୁବା ବୟସରେ ନିଜ ବିଚକ୍ଷଣ ବୁଦ୍ଧି ପାଇଁ ଏତେ ବଡ ରେକର୍ଡ ହାସଲ କରିଥିବାରୁ ତାଙ୍କ ପରିବାରରେ ଖେଳିଯାଇଛି ଖୁସିର ମାହୋଲ। ମାତ୍ର ୧୦ ମାସର ହୋଇଥିବାବେଳେ ରଙ୍ଗବେରଙ୍ଗୀ ବହି ଦେଖ୍ ଖୁବ୍ ଖୁସି ହେବା ସହ ନୂଆ ନୂଆ ଜିନିଷ ଜାଣିବାକୁ ତାଙ୍କର ବେଶ୍ ଆଗ୍ରହ ହେଉଥିଲା। ପୁଅର ଆଗ୍ରହ ଦେଖି ମା’ ତାଙ୍କୁ ଖେଳ ଖେଳରେ ବିଭିନ୍ନ ବିଷୟରେ ଶିଖାଇବା ଆରମ୍ଭ କରିଥିଲେ। ଦୁଇ ବର୍ଷ ହେବା ବେଳକୁ ରୁଦ୍ରାଂଶ ୩୦ରୁ ଅଧିକ ପ୍ରକାରର ଫଳ, ଫୁଲ, ପରିବା, ଗୃହପାଳିତ ଓ ଜଙ୍ଗଲୀ ପଶୁ, ପକ୍ଷୀଙ୍କ ନାମ, ଯାନବାହନ, ପ୍ରଫେସନ, ବିଭିନ୍ନ ରଙ୍ଗ, ଆକାର, ଇଂରାଜୀ ବର୍ଣ୍ଣମାଳା ସହ ପ୍ରତି ଅକ୍ଷରରେ ଶବ୍ଦ, ଏକାଧିକ ମନ୍ତ୍ର, ୨୦ରୁ ଅଧିକ ଜାତୀୟ ପ୍ରତୀକ, ପରିବାରର ସଦସ୍ୟଙ୍କ ନାମ, ସପ୍ତାହର ସାତ ଦିନ, ରାଇମ୍ ମଧ୍ୟ କହି ପାରୁଥିଲେ।
ଇଣ୍ଡିଆ ବୁକ୍ ଅଫ୍ ରେକର୍ଡ ବିଷୟରେ ଜାଣିବା ପରେ ମାଆ ବାପା ପୁଅକୁ ଏଥିପାଇଁ ପ୍ରସ୍ତୁତ କରାଇଥିଲେ। ଜେଜେମା ସବିତାରାଣୀ, ଜେଜେବାପା ସୁରେଶ ଚନ୍ଦ୍ର ରଣା ଏବଂ ବଡ ଭଉଣୀ ସମାଇରା ମଧ୍ୟ ରୁଦ୍ରାଂଶଙ୍କୁ ଏହି ସବୁ ଶିଖୁବାରେ ସାହାଯ୍ୟ କରିଥିଲେ। ଇଣ୍ଡିଆ ବୁକ୍ ଅଫ୍ ରେକର୍ଡ-୨୦୨୪ରେ ତାଙ୍କ ନାମ ସ୍ଥାନିତ ହେବା ପରେ କୁନି ପୁଅର ସଫଳତା ପାଇଁ ପରିବାରକୁ ବିଭିନ୍ନ ମହଲରୁ ପ୍ରଶଂସାର ସୁଅ ଛୁଟୁଛି।