କୋଲକାତା,୨୦।୨: ଦିନିକିଆ ପରେ ଟି୨୦ ସିରିଜ୍ରେ ଓ୍ବେଷ୍ଟଇଣ୍ଡିଜକୁ ମୂଳପୋଛ କରିଛି ଟିମ୍ ଇଣ୍ଡିଆ। ରବିବାର ଅନୁଷ୍ଠିତ ତୃତୀୟ ତଥା ଅନ୍ତିମ ମ୍ୟାଚ୍ରେ ଓ୍ବେଷ୍ଟଇଣ୍ଡିଜକୁ ୧୭ ରନ୍ରେ ରୋହିତ ଶର୍ମାଙ୍କ ନେତୃତ୍ୱାଧୀନ ଭାରତୀୟ ଦଳ ହରାଇ ଦେଇଛି।
ଆମନ୍ତ୍ରଣ ପାଇ ପ୍ରଥମେ ବ୍ୟାଟିଂ କରିଥିବା ଟିମ୍ ଇଣ୍ଡିଆର ଟପ୍ ଅର୍ଡର ପୂରା ଫେଲ ମାରିଥିଲା। ଋତୁରାଜ ଗାଏକ୍ୱାଡ (୪), ଇଶାନ କିଷନ (୩୪), ଶ୍ରେୟାସ ଆୟାର (୨୫) ଓ ଅଧିନାୟକ ରୋହିତ ଶର୍ମା ୭ ରନ୍ କରି ଆଉଟ୍ ହୋଇଥିଲେ। ଏକଦା ଭାରତ ୧୪ ଓଭରରେ ୪ ଉଇକେଟ ହରାଇ ୯୩ ରନ୍ କରିଥାଏ। ସ୍ଥିତି ଅତ୍ୟନ୍ତ ଜଟିଳ ଥିବା ବେଳେ ଓ୍ବେଷ୍ଟଇଣ୍ଡିଆନ ବୋଲରଙ୍କୁ କାଉଣ୍ଟର ଆଟାକ କରିଥିଲେ ସୂର୍ଯ୍ୟକୁମାର ୬୫ ( ୧ ଚୌକା ଓ ୭ ଛକା) ଓ ଭେଙ୍କଟଶ ୩୫ (୪ ଚୌକା ଓ ୨ ଛକା)। ଦୁହେଁ ୫ମ ଉଇକେଟ ପାଇଁ ୯୧ ଯୋଡ଼ିଥିଲେ। ଫଳରେ ଭାରତ ୫ ଉଇକେଟ ହରାଇ ୧୮୪ ରନ୍ କରିଥିଲା।
ଜବାବରେ ଦୀପକ ଚହର ଇନିଂସ ଆରମ୍ଭରୁ ଓ୍ବେଷ୍ଟଇଣ୍ଡିଜକୁ ଡବଲ ଝଟକା ଦେଇଥିଲେ। ମଧ୍ୟକ୍ରମରେ ନିକୋଲାସ ପୁରନ ଓ ରବମାନ ପାଓ୍ବେଲ(୨୫) ତୃତୀୟ ଉଇକେଟ ଲାଗି ଦଳୀୟ ସ୍କୋରରେ ଯୋଡ଼ିଥିଲେ ୪୭ ରନ୍। ତା’ପରେ ଘରୋଇ ବୋଲରମାନେ କ୍ରମାଗତ ଉଇକେଟ ନେଇ ଓ୍ବେଷ୍ଟଇଣ୍ଡିଜକୁ ଠେଲି ଦେଇଥିଲେ ବ୍ୟାକଫୁଟ୍କୁ। କିନ୍ତୁ ଶେଷ ପର୍ଯ୍ୟନ୍ତ ଲଢ଼େଇ କରିଥିଲେ ଫୁଲ ଫର୍ମରେ ଥିବା ପୁରନ। ତାଙ୍କ ସହ ତାଳ ଦେଇଥିଲେ ରୋମାରିଓ ଶେଫର୍ଡ(୨୯)। ଦୁହେଁ ୩୨ ବଲରେ ୪୮ ରନ୍ ଯୋଡ଼ିଥିଲେ। ୧୮ତମ ଓଭରରେ ପୁରନ(୬୧ ରନ୍, ୮ ଚୌକା ଓ ୧ ଛକା)ଙ୍କ ଉଇକେଟ୍ ନେଇଥିଲେ ଶାର୍ଦ୍ଦୁଳ ଠାକୁର। ଶେଷରେ ଓ୍ବେଷ୍ଟଇଣ୍ଡିଜ ୯ ଉଇକେଟ ହରାଇ ୧୬୭ ରନ୍ କରିବାକୁ ସକ୍ଷମ ହୋଇଥିଲା।