ଭୁବନେଶ୍ୱର,୨।୩(ବ୍ୟୁରୋ):ଓଏଲ୍ଏକ୍ସରେ ଗାଡି ବିକ୍ରି ପାଇଁ ବିଜ୍ଞାପନ ଦେଉଥିବା ଗାଡ଼ି ମାଲିକଙ୍କୁ ଯୋଗାଯୋଗ କରୁଥିଲେ। ଗାଡି ରେଟ୍ ଛିଡିବା ପରେ ଅଳ୍ପ କିଛି ଟଙ୍କା ଅଗ୍ରିମ ଦେଇ ବିଶ୍ୱାସ ଜନ୍ମାଉଥିଲେ। ପରେ ଟେଷ୍ଟ୍ ଡ୍ରାଇଭ୍ ଆଳରେ ଗାଡ଼ି ନେଇ ଚମ୍ପଟ ମାରୁଥିଲେ। ଉକ୍ତ ଗାଡ଼ିକୁ ଜିଲା ବାହାରକୁ ନେଇ ଅଧା ଦାମ୍ରେ ବିକ୍ରି କରୁଥିଲେ। ନିଜ ନାମ ବଦଳାଇ ରାଜଧାନୀର ବିଭିନ୍ନ ଅଞ୍ଚଳର ଲୋକଙ୍କୁ ଏମିତି ଚୂନ ଲଗାଉଥିଲେ। ଏଭଳି ଅଭିନବ ଉପାୟରେ ଗାଡ଼ି ଲୁଟ୍ କରୁଥିବା ଏହି ଚତୁର ଲୁଟେରାଙ୍କୁ ଶେଷରେ କମିଶନରେଟ୍ ପୋଲିସ ଗିରଫ କରିଛି। ସେ ହେଲେ ଗଞ୍ଜାମ ଜିଲା ଭଞ୍ଜନଗରର ଜଗା ଓରଫ ଅମିତ ପାତ୍ର। ପୋଲିସ ତାଙ୍କ ନିକଟରୁ ୧୧ ବାଇକ ଜବତ କରିଛି। ଜଗା ପୂର୍ବରୁ ମଧ୍ୟ ଗାଡି ଚୋରି କରି ଜେଲ ଯାଇଥିଲେ। ୨୦୧୯ରେ ପୋଲିସ ତାଙ୍କୁ ଗିରଫ କରିବା ସହ ୧୭ଟି ଗାଡି ଜବତ କରିଥିଲା। ତେବେ ଜେଲରୁ ଫେରିବା ପରେ ପୁଣି ଏହି କଳା ଧନ୍ଦା ଆରମ୍ଭ କରିଦେଇଥିଲେ ଜଗା।
ସୂଚନା ଅନୁଯାୟୀ, ଓଏଲ୍ଏକ୍ସ ମାଧ୍ୟମରେ ଟେଷ୍ଟ ଡ୍ରାଇଭ୍ ଆଳରେ ଗାଡ଼ି ଲୁଟ୍ ହେଉଥିବା ନେଇ ମାସେ ତଳେ ଭୁବନେଶ୍ୱରର ବିଭିନ୍ନ ସ୍ଥାନରୁ ଅଭିଯୋଗ ଆସିଥିଲା। ଏହାପରେ କମିଶନରେଟ୍ ପୋଲିସ ପକ୍ଷରୁ ତଦନ୍ତ ପାଇଁ ସ୍ପେଶାଲ ସ୍କ୍ବାଡ୍କୁ ନିର୍ଦ୍ଦେଶ ଦିଆଯାଇଥିଲା। ସବୁ ଲୁଟ୍ ସମାନ ଢଙ୍ଗରେ ହୋଇଥିବାରୁ ଏଥିରେ ଜଣେ ବ୍ୟକ୍ତି କିମ୍ବା ଗୋଟିଏ ଗ୍ୟାଙ୍ଗ୍ର ସମ୍ପୃକ୍ତି ଥିବା ପୋଲିସ ସନ୍ଦେହ କରିଥିଲା। ଏହାପରେ ପୋଲିସ ସିସିଟିଭି ଫୁଟେଜ ଓ ଫୋନ ନମ୍ବରକୁ ଟ୍ରାକିଂ କରି ଜଗାଙ୍କୁ ଚିହ୍ନଟ କରିଥିଲା। ଗଞ୍ଜାମସ୍ଥିତ ତାଙ୍କ ଘରେ ଥିବାବେଳେ ସ୍ପେଶାଲ ସ୍କ୍ବାଡ୍ ଚଢ଼ାଉ କରି ତାଙ୍କୁ ଧରି ଭୁବନେଶ୍ୱର ଆଣିଥିଲା।