ନୂଆଦିଲ୍ଲୀ,୨୩।୧୧(ଆଇଏଏନ୍ଏସ୍): ଜଳବାୟୁ ପରିବର୍ତ୍ତନ ପ୍ରଦର୍ଶନ ସୂଚକାଙ୍କ (ସିସିପିଆଇ-୨୦୨୩)ରେ ଭାରତ ୨ ପାଦ ଉପରକୁ ଉଠି ଅଷ୍ଟମ ସ୍ଥାନରେ ରହିଛି। ଜର୍ମାନ ଓ୍ବାଚ୍, ନ୍ୟୁ କ୍ଲାଇମେଟ୍ ଇନ୍ଷ୍ଟିଚ୍ୟୁଟ୍ ଏବଂ କ୍ଲାଇମେଟ୍ ଆକ୍ସନ ନେଟ୍ଓ୍ବର୍କ ପକ୍ଷରୁ ମଙ୍ଗଳବାର ଜାରି ସୂଚକାଙ୍କରେ ଏହି ବିଷୟ ପ୍ରକାଶ ପାଇଛି।
କପ୍୨୭ରେ ସଦ୍ୟ ପ୍ରକାଶିତ ସିସିପିଆଇ ରିପୋର୍ଟରେ ଉଲ୍ଲେଖ କରାଯାଇଛି ଯେ, ୪ ଛୋଟ ଦେଶ ଡେନ୍ମାର୍କ, ସୁଇଡେନ୍, ଚିଲି ଓ ମରକ୍କୋର ସ୍ଥାନ ଭାରତ ଉପରେ ରହିଛି। ପ୍ରଥମ, ଦ୍ୱିତୀୟ ଓ ତୃତୀୟ ସ୍ଥାନରେ କୌଣସି ଦେଶକୁ ରଖାଯାଇ ନାହିଁ। ତେଣୁ ସମସ୍ତ ବୃହତ୍ ଅର୍ଥନୀତି ମଧ୍ୟରେ ଭାରତ ମଜଭୁତ ସ୍ଥିତିରେ ରହିଥିବା ଆନୁଷ୍ଠାନିକ ଭାବେ କୁହାଯାଇଛି। ସେହିପରି ଜି୨୦ର ସର୍ବୋତ୍ତମ ୫ ରାଷ୍ଟ୍ର ମଧ୍ୟରେ ଭାରତର ସ୍ଥାନ ୧ ନମ୍ବରରେ ରହିଛି।
ଅନ୍ତର୍ଜାତୀୟ ଜଳବାୟୁ ରାଜନୀତିରେ ସ୍ବଚ୍ଛତାକୁ ତ୍ୱରାନ୍ବିତ କରିବା ଲକ୍ଷ୍ୟରେ ସିସିପିଆଇ କାର୍ଯ୍ୟ କରିଥାଏ। ଏଥିସହ ପ୍ରତ୍ୟେକ ଦେଶ ପକ୍ଷରୁ କରାଯାଉଥିବା ଜଳବାୟୁ ସୁରକ୍ଷା ଉଦ୍ୟମ ଓ ବିକାଶର ତୁଳନାମତ୍କ ଚିତ୍ର ଆଙ୍କିଥାଏ। ୨୦୦୫ ମସିହାରୁ ପ୍ରତିବର୍ଷ ପ୍ରକାଶ ପାଉଥିବା କ୍ଲାଇମେଟ୍ ଚେଞ୍ଜ ପରଫରମାନ୍ସ ଇଣ୍ଡେକ୍ସ ହେଉଛି ଏକ ସ୍ବାଧୀନ ନିରୀକ୍ଷଣକାରୀ ଟୁଲ୍, ଯାହା ଜରିଆରେ ୫୯ ରାଷ୍ଟ୍ର ଏବଂ ୟୁରୋପୀୟ ସଂଘ (ଇୟୁ)ର ଜଳବାୟୁ ସୁରକ୍ଷା ପ୍ରଦର୍ଶନକୁ ଟ୍ରାକ୍ କରାଯାଏ। ବୈଶ୍ୱିକ ସବୁଜଗୃହ (ଜିଏଚ୍ଜି) ଉତ୍ସର୍ଜନର ୯୨% ଏହି ୫୯ ରାଷ୍ଟ୍ରରେ ହୋଇଥାଏ। ଜଳବାୟୁ ସୁରକ୍ଷା ପ୍ରଦର୍ଶନର ସମୀକ୍ଷା ୪ଟି ବର୍ଗରେ କରାଯାଇଥାଏ। ଜିଏଚ୍ଜି ଉତ୍ସର୍ଜନ (୪୦%), ନବୀକରଣୀୟ ଶକ୍ତି (୨୦%), ଶକ୍ତି ବ୍ୟବହାର (୨୦%) ଏବଂ ଜଳବାୟୁ ନୀତି (୨୦%) ଆଧାରରେ ଦେଶଗୁଡ଼ିକର ସ୍କୋର ନିର୍ଦ୍ଧାରଣ କରାଯାଏ।