ନୂଆଦିଲ୍ଲୀ: କଥାରେ ଅଛି ମନୋବଳ ଦୃଢ ଥିଲେ ପଙ୍ଗୁ ବି ଲଙ୍ଘିପାରେ ଗିରି। ଠିକ୍ ଏମିତି ଏକ ଦୃଶ୍ୟ ଏବେ ସୋସିଆଲ ମିଡିଆରେ ଭାଇରାଲ ହେବାରେ ଲାଗିଛି। ଛୋଟ ଝିଅଟିଏ ଗୋଟିଏ ଗୋଡ଼ରେ ବହୁ କଷ୍ଟରେ ପାହାଡ଼ ଚଢିବାର ଦୃଶ୍ୟ ବେଶ୍ ହୃଦୟସ୍ପର୍ଶୀ ହୋଇପାରିଛି। ଗୁଡ୍ ନ୍ୟୁଜ କରେସ୍ପଣ୍ଡେଣ୍ଟର ଟୁଇଟର ଆକାଉଣ୍ଟରେ ଏକ ଭିଜୁଆଲ ଶେୟାର କରାଯାଇଛି, ଯେଉଁଥିରେ ଏକ ଛୋଟ ଝିଅ ଗୋଟିଏ ଗୋଡରେ ବି ଏକ ପାହାଡିଆ ଉଚ୍ଚ ସ୍ଥାନକୁ ଉଠିବାକୁ ଚେଷ୍ଟା କରୁଛି। ଛୋଟ ଝିଅଟିର ନାଁ ଆଣ୍ଟୋନେଲା ବୋଲି ଟୁଇଟରରେ ଲେଖାଯାଇଛି। ଆଣ୍ଟୋନେଲାଙ୍କର ଗୋଟିଏ ଗୋଡ଼ ଥିବାରୁ ସେ ଏକ କୃତ୍ରିମ ଗୋଡ଼ ଲଗାଇଛନ୍ତି। ସେ ଏକ ପାହାଡିଆ ସ୍ଥାନର ଉପରକୁ ଚଢିବାକୁ ଉଦ୍ୟମ କରୁଥିବାବେଳେ ମାଆ ପଛରେ ଛିଡ଼ାହୋଇ ତାଙ୍କୁ ସାହସ ଦେଉଛନ୍ତି। ସେ ନିଶ୍ଚିତ ଉପରକୁ ଚଢିପାରିବ, ଆଦୌ ତଳକୁ ପଡିବ ନାହିଁ ବୋଲି ମାଆ ବାରମ୍ବାର କହୁଛନ୍ତି। ଏପରି ଶୁଣିବା ପରେ ଆଣ୍ଟୋନେଲାଙ୍କର ମନୋବଳ ବୃଦ୍ଧି ପାଉଛି ଏବଂ ସେ ଉପରକୁ ଉଠିବା ପାଇଁ ଚେଷ୍ଟା କରୁଛନ୍ତି। ବାରମ୍ବାର ଚେଷ୍ଟା କରି ଶେଷରେ ଉପରକୁ ଚଢିଯାଇ ବହୁତ ଖୁସି ହୋଇ ଯାଉଛନ୍ତି। ଭିଡିଓଟି ଟୁଇଟରରେ ଖୁବ ଭାଇରାଲ ହେଉଛି। ଲୋକେ ଏହାକୁ ହଜାର ହଜାର ସଂଖ୍ୟାରେ ରିଟୁଇଟ୍, ଲାଇକ୍ କରିବା ସହିତ କମେଣ୍ଟ ବି ଦେଇଛନ୍ତି।
