ବେଜିଂ,୨୩ା୭: ଟେକ୍ସାସ୍ର ହ୍ୟୁଷ୍ଟନ ସହରରେ ଥିବା ବାଣିଜି୍ୟକ ଦୂତାବାସ ୭୨ ଘଣ୍ଟା ମଧ୍ୟରେ ବନ୍ଦ କରିବା ପାଇଁ ଚାଇନାକୁ ଆମେରିକା ନିର୍ଦ୍ଦେଶ ଦେଇଛି। ଆମେରିକାର ଏଭଳି ଅଚାନକ ପଦକ୍ଷେପକୁ ବେଜିଂ କଡ଼ା ସମାଲୋଚନା କରିବା ସହ ଏହାର ପ୍ରତିଶୋଧ ନେବା ଲାଗି ଚେତାବନୀ ଦେଇଛି। ଆମେରିକୀୟମାନଙ୍କ ବୌଦ୍ଧିକ ସମ୍ପତ୍ତି ଓ ଘରୋଇ ତଥ୍ୟର ସୁରକ୍ଷା ପାଇଁ ଚାଇନାକୁ ଏହାର ହ୍ୟୁଷ୍ଟନ କନ୍ସୁଲେଟ ବନ୍ଦ କରିବା ଲାଗି ନିର୍ଦ୍ଦେଶ ଦିଆଯାଇଥିବା ଆମେରିକା ପରରାଷ୍ଟ୍ର ବିଭାଗ ମୁଖପାତ୍ର ମୋର୍ଗାନ ଓର୍ଟାଗସ୍ କହିଛନ୍ତି। ପରରାଷ୍ଟ୍ର ସଚିବ ମାଇକ ପମ୍ପିଓଙ୍କ କୋପେନହାଗେନ୍ ଗସ୍ତ ବେଳେ ଖବରଦାତାମାନଙ୍କୁ ସୂଚନା ଦେଇ ମୋର୍ଗାନ କହିଥିଲେ, ଭିଏନା ଚୁକ୍ତିନାମା ଅନୁଯାୟୀ ଦେଶର ଆଭ୍ୟନ୍ତରୀଣ ବ୍ୟାପାରରେ ବାହାର ରାଷ୍ଟ୍ର ହସ୍ତକ୍ଷେପ କରିପାରିବ ନାହିଁ।
ଚାଇନାର ଉହାନ ସହରରେ କରୋନା ଭୂତାଣୁ ସୃଷ୍ଟି ହୋଇଥିବାବେଳେ ବେଜିଂ ଏ ସମ୍ପର୍କିତ ସୂଚନାକୁ ଗୋପନ ରଖିବା ଯୋଗୁ ଏହି ମହାମାରୀ ସାରା ବିଶ୍ୱକୁ ବ୍ୟାପିଗଲା। ଏଥିରେ ଆମେରିକା ସର୍ବାଧିକ କ୍ଷତିଗ୍ରସ୍ତ ହୋଇଥିବାବେଳେ ଏଥିପାଇଁ ବାରମ୍ବାର ଚାଇନାକୁ ଦାୟୀ କରିଆସୁଛି। ସେବେଠାରୁ ବେଜିଂ ଓ ଓ୍ବାଶିଂଟନ ମଧ୍ୟରେ ସମ୍ପର୍କ ଗୁରୁତର ପ୍ରଭାବିତ ହୋଇଛି। ହ୍ୟୁଷ୍ଟନ ବାଣିଜି୍ୟକ ଦୂତାବାସ ବନ୍ଦ ଲାଗି ଆମେରିକାର ଏକପାଖିଆ ନିଷ୍ପତ୍ତି ଅଭୂତପୂର୍ବ ପଦକ୍ଷେପ ବୋଲି ଚାଇନା ବହିର୍ବ୍ୟାପାର ମନ୍ତ୍ରଣାଳୟ ମୁଖପାତ୍ର ଓ୍ବାଙ୍ଗ୍ ଓ୍ବେନବିନ୍ କହିଛନ୍ତି। ଆମେରିକା ଏହାର ଏକତରଫା ନିଷ୍ପତ୍ତିକୁ ତୁରନ୍ତ ବାତିଲ କରିବା ପାଇଁ ବେଜିଂ ଅନୁରୋଧ କରିଛି। ଯଦି ଆମେରିକା ଭୁଲ୍ ମାର୍ଗରେ ଯିବା ପାଇଁ ଚାହୁଁଥାଏ ତେବେ ଚାଇନା ମଧ୍ୟ ଏହାର ଦୃଢ଼ ଜବାବ ଦେବ ବୋଲି ଓ୍ବାଙ୍ଗ୍ ଚେତାବନୀ ଦେଇଛନ୍ତି।