ଭୁବନେଶ୍ୱର,୭।୧(ବ୍ୟୁରୋ): କୋଭିଡ୍ ସଂକ୍ରମଣର ଦ୍ରୁତଗତି ଏବଂ ଓମିକ୍ରନ ଆକ୍ରାନ୍ତଙ୍କ ସଂଖ୍ୟା ବଢ଼ୁଥିବା ଦେଖି ରାଜ୍ୟ ସରକାର ଆସନ୍ତା ୭ ତାରିଖଠାରୁ କଟକଣାକୁ ଅଧିକ କଡ଼ାକଡ଼ି କରିଛନ୍ତି। ପ୍ରାଥମିକ ସ୍କୁଲଠାରୁ ଆରମ୍ଭ କରି ଯୁକ୍ତ ୨ ପର୍ଯ୍ୟନ୍ତ ଶିକ୍ଷାନୁଷ୍ଠାନକୁ ବନ୍ଦ ରଖିବାକୁ ଘୋଷଣା କରିଛନ୍ତି। ତେବେ ଦଶମ ପିଲାଙ୍କ ସମେଟିଭ ପରୀକ୍ଷା ଚାଲୁ ରହିବ। ଏନେଇ ସ୍କୁଲ ଓ ଗଣଶିକ୍ଷା ବିଭାଗ ପକ୍ଷରୁ ଗୁରୁବାର ବିଧିବଦ୍ଧ ଭାବେ ବିଜ୍ଞପ୍ତି ଜାରି କରାଯାଇଛି। ଉକ୍ତ ବିଜ୍ଞପ୍ତିରେ ଉଲ୍ଲେଖ କରାଯାଇଛି, ରାଜ୍ୟର ସମସ୍ତ ସରକାରୀ, ସରକାରୀ ଅନୁଦାନପ୍ରାପ୍ତ, ଘରୋଇ ଏବଂ ଅନ୍ୟ ବୋର୍ଡର ସ୍କୁଲଗୁଡିକରେ ଚାଲୁଥିବା ଷଷ୍ଠରୁ ଦ୍ୱାଦଶ ଶ୍ରେଣୀ ୭ ତାରିଖରୁ ବନ୍ଦ ରହିବ। ଦଶମ ଓ ଦ୍ୱାଦଶ ଶ୍ରେଣୀର କମ୍ ପିଲାଙ୍କୁ ନେଇ ଡାଉଟ୍ କ୍ଲିଅରିଂ କ୍ଲାସ କରାଯାଇପାରିବ। ହେଲେ ଏ ନେଇ ସେମାନେ ଅଭିଭାବକମାନଙ୍କ ଦସ୍ତଖତ ଆଣିବା ପରେ ପିଲାଙ୍କୁ କ୍ଲାସରେ ସାମିଲ କରାଯିବ। କୋଭିଡ୍ ନିୟମ ମାନି ସମେଟିଭ ପରୀକ୍ଷା ଜାରି ରଖିବାକୁ ବିଭାଗ ପକ୍ଷରୁ ଜାରି ବିଜ୍ଞପ୍ତିରେ ଉଲ୍ଲେଖ କରାଯାଇଛି।
