ମାଲକାନଗିରି/ବାଲିମେଳା/ମାଥିଲି, (ଡି.ଏନ୍.ଏ.), ୨୦।୪: ସମ୍ବଲପୁରରେ ହନୁମାନ ଜୟନ୍ତୀ ଅବସରରେ ହୋଇଥିବା ହିଂସା ପ୍ରତିବାଦରେ ବୁଧବାର ବିଶ୍ୱ ହିନ୍ଦୁ ପରିଷଦ ଏବଂ ରାଷ୍ଟ୍ରୀୟ ସ୍ବୟଂ ସହାୟକ ସଂଘ ପକ୍ଷରୁ ଓଡିଶାର ୧୪ଟି ଜିଲାରେ ୧୨ ଘଣ୍ଟିଆ ବନ୍ଦ ଡାକରା ଦିଆଯାଇଥିଲା। ସେହି ଅନୁସାରେ ମାଲକାନଗିରି ଜିଲାରେ ଏହାର ପ୍ରଭାବ ଦେଖିବାକୁ ମିଳଛି। ସକାଳ ୬ଟାରୁ ବିଶ୍ୱ ହିନ୍ଦୁ ପରିଷଦ ଓ ରାଷ୍ଟ୍ରୀୟ ସ୍ବୟଂ ସହାୟକ ସଂଘ କର୍ମକର୍ତ୍ତାମାନେ ବିଭିନ୍ନ ଛକରେ ପିକେଟିଂ କରି ସହ ରାସ୍ତା ଅବରୋଧ କରି ବନ୍ଦ ପାଳନ କରିଥିଲେ। ଭାଜପା ଏହାକୁ ସମର୍ଥନ କରିଥିଲା। ମାଲକାନଗିରି ସହରରେ ସମସ୍ତ ଦୋକାନ ବଜାର ବନ୍ଦ ଥିଲା। ଗାଡି ଚଳାଚଳ ମଧ୍ୟ ବନ୍ଦ ରହିଥିଲା। ଫଳରେ ଅନେକ ଯାତ୍ରୀବାହୀ ବସର ଯାତ୍ରୀମାନେ ଅସୁବିଧାର ସମ୍ମୁଖୀନ ହେଇଥିଲେ। ଏଥିସହ ଜିଲାର ସମସ୍ତ ବ୍ୟାଙ୍କ, ସରକାରୀ ବେସରକାରୀ ସଂସ୍ଥା, ବିଦ୍ୟାଳୟ, ଉଚ୍ଚ ବିଦୟାଳୟ, ମହାବିଦୟାଳୟଗୁଡିକ ମଧ୍ୟ ବନ୍ଦ ରହିଥିବା ଦେଖିବାକୁ ମିଳିଥିଲା। ପୋଲିସ ପ୍ରଶାସନ ପକ୍ଷରୁ ବ୍ୟାପକ ସୁରକ୍ଷା ବ୍ୟବସ୍ଥା କରାଯାଇଥିଲା।
ବାଲିମେଳାରେ ମଧ୍ୟ ସକାଳ ୬ଟାରୁ ବିଶ୍ବହିନ୍ଦୁ ପରିଷଦ, ରାଷ୍ଟ୍ରୀୟ ସ୍ବୟଂସେବକ ସଂଘ ଓ ଭାଜପା କର୍ମୀମାନେ ବିଭିନ୍ନ ଛକରେ ପିକେଟିଂ କରି ସମସ୍ତ ଦୋକାନ ବଜାର, ବ୍ୟାଙ୍କ, ସରକାରୀ ଓ ବେସରାରୀ କାର୍ଯ୍ୟାଳୟଗୁଡିକ ବନ୍ଦ କରିବାକୁ ନିବେଦନ କରିଥିଲେ । ଫଳରେ ସମସ୍ତ ବ୍ୟବସାୟୀ ଏହାକୁ ସମର୍ଥନ ଜଣାଇ ସେମାନଙ୍କ ବ୍ୟବସାୟ ପ୍ରତିଷ୍ଠାନ ବନ୍ଦ ରଖିଥିଲେ। ସମସ୍ତ ସରକାରୀ,ବେସରକାରୀ କାର୍ଯ୍ୟାଳୟ ସହ ବ୍ୟାଙ୍କଗୁଡିକ ବନ୍ଦ ରହିଥିଲା। ବାଲିମେଳା ଭାଜପା ସଭାପତି ଶୁଭାଶିଷ କର, ଦିପକ ସାହୁ, ଗୌର ଖିଲ, ରବୀନ୍ଦ୍ର ନାୟକ, ମୁନା ବେହେରା, ବୈଶାଖ ବରାଡ଼ , ଲବ ଭୋଳ, ବରିଷ୍ଠ ନେତା ଅକ୍ଷୟ ବିଶ୍ୱାଳ, ମନୋଜ ନାୟକ, ଶିବଦତ୍ତ ସାହୁଙ୍କ ସମେତ ଅନ୍ୟମାନେ ବନ୍ଦରେ ସାମିଲ ହୋଇଥିଲେ।
ମାଥିଲିରେ ମଧ୍ୟ ୩୨୬ ନମ୍ବର ଜାତୀୟ ରାଜପଥ ଅବରୋଧ କରି ବନ୍ଦ ପାଳନ କରାଯାଇଥିଲା। ସ୍ଥାନୀୟ ଗାନ୍ଧୀ ଛକଠାରେ ରାସ୍ତା ଉପରେ ବାଇକ୍ ରଖି ରାସ୍ତାରୋକୋ କରାଯାଇଥିଲା। ଫଳରେ ଯାନବାହନ ଯାତାୟାତରେ ଅସୁବିଧା ହୋଇଥିଲା। ଗୋବିନ୍ଦପାଲି, ପାଙ୍ଗାମ ଓ କୋଟମେଟା ଗ୍ରାମରେ ମଧ୍ୟ ରାସ୍ତାରୋକୋ ହୋଇଥିଲା। ଜରୁରିକାଳୀନସେବାରେ ନିୟୋଜିତ ଗାଡ଼ିକୁ ଏଥିରୁ ବାଦ ଦିଆଯାଇଥିଲା। ଏହି ବନ୍ଦ ପାଳନରେ ବହୁ ଯୁବ ଗୋଷ୍ଠୀ ସାମିଲ ହୋଇଥିଲେ।