ଚଣ୍ଡିଗଡ଼,୧୪ ।୨: ପ୍ରଧାନମନ୍ତ୍ରୀ ନରେନ୍ଦ ମୋଦିଙ୍କ ଗସ୍ତକୁ ନେଇ ପୁଣି ବିବାଦ ଦେଖାଦେଇଛି । ମୋଦିଙ୍କ ଗସ୍ତ ଯୋଗୁ ପଞ୍ଜାବ ମୁଖ୍ୟମନ୍ତ୍ରୀ ଚରଣଜିତ ସିଂ ଚନ୍ନିଙ୍କ ହେଲିକପ୍ଟରକୁ ଉଡାଣ ଅନୁମତି ମିଳି ନ ଥିବା ଅଭିଯୋଗ ହୋଇଛି । ପ୍ରଧାନମନ୍ତ୍ରୀଙ୍କ ସୁରକ୍ଷା କାରଣରୁ ସୋମବାର ପଞ୍ଜାବରେ ନୋ ଫ୍ଲାଇଂ ଜୋନ ଘୋଷଣା କରାଯାଇଥିଲା । କିନ୍ତୁ ଚନ୍ନିଙ୍କୁ ଚଣ୍ଡିଗଡ଼ରୁ ହୋଶିୟାରପୁର ଯିବାର ଥିଲା । ସେଠାରେ ସେ ରାହୁଲ ଗାନ୍ଧୀଙ୍କ ରାଲିରେ ଯୋଗ ଦେଇଥାଆନ୍ତେ । ଏହି ବିବାଦକୁ ନେଇ ଚନ୍ନି କହିଛନ୍ତି, ରାଜନୀତି ଯୋଗୁ ତାଙ୍କ ହେଲିକପ୍ଟରକୁ ଉଡିବା ପାଇଁ ଅନୁମତି ମିଳିଲା ନାହିଁ । ତେବେ ପ୍ରଚାର କରିବାକୁ ଯିବାଲାଗି ନ ଦେବା ଠିକ୍ ନୁହେଁ । ଏହି ଘଟଣାକୁ ନେଇ ସୁନୀଲ ଜାଖଡ ହୋଶିୟାରପୁର ରାଲିରେ ମଞ୍ଚ ଉପରେ କହିଛନ୍ତି ମୁଖ୍ୟମନ୍ତ୍ରୀଙ୍କ ଆସିବା ସ୍ଥିର ହୋଇ ସାରିଥିଲା । ହେଲେ ଏହା ଦୁଖଦାୟକ ଯେ ତାଙ୍କୁ ଆସିବାକୁ ଅନୁମତି ଦିଆଗଲା ନାହିଁ । ଯଦି ନିର୍ବାଚନ କମିଶନ ଏହା ଉପରେ କିଛି ବିଚାର ନ କରିବେ ତେବେ ମୁଁ ଭାବିବି ଏହି ନିର୍ବାଚନ କେବଳ ଲୋକ ଦେଖାଣିଆ ।
ସୂଚନାଯୋଗ୍ୟ, ଏହା ପୂର୍ବରୁ ଜାନୁୟାରୀ ୫ରେ ଯେତେବେଳେ ମୋଦି ପଞ୍ଜାବ ଗସ୍ତରେ ଆସିଥିଲେ ବର୍ଷା ଯୋଗୁ ତାଙ୍କୁ ସଡ଼କ ପଥରେ ନିର୍ଦ୍ଧାରିତ ସ୍ଥାନରେ ପହଞ୍ଚିବାର ଥିଲା । ହେଲେ ହଠାତ୍ ତାଙ୍କୁ ବାଟରେ କେତେଜଣ ପ୍ରଦର୍ଶନକାରୀ ଅଟକାଇ ଦେଇଥିଲେ । ଫଳରେ ସେ ଖୁବ୍ ବିବ୍ରତ ହୋଇ ପଡିଥିଲେ । ୨୦ ମିନିଟ ପର୍ଯ୍ୟନ୍ତ ସେ ଏକ ଅସୁରକ୍ଷିତ ସ୍ଥାନରେ ଅଟକି ରହିଥିଲେ । ଏହାପରେ ପଞ୍ଜାବ ରାଜନୀତିରେ ଆସିଥିଲା ଉଷ୍ମତା ।
