ମୁମ୍ବାଇ,୧୦।୬: ମହାରାଷ୍ଟ୍ର ରାଜନୀତିରେ ଗତ କିଛି ଦିନ ହେବ ଉତ୍ତେଜନା ଦେଖାଦେଇଛି। ରାଜ୍ୟ ମୁଖ୍ୟମନ୍ତ୍ରୀ ଏକନାଥ ଶିନ୍ଦେଙ୍କ ନେତୃତ୍ୱରେ ଶିବସେନା ଏବଂ ଭାଜପା ମଧ୍ୟରେ ମତଭେଦ ଦେଖାଦେଇଛି। ଏହି ସମୟରେ ମୁଖ୍ୟମନ୍ତ୍ରୀ ଶିନ୍ଦେଙ୍କ ପୁଅ ତଥା ଏମ୍ପି ଶ୍ରୀକାନ୍ତ ଶିନ୍ଦେ ତାଙ୍କ ପଦରୁ ଇସ୍ତଫା ଦେବା ନେଇ ଚର୍ଚ୍ଚା ହେଉଛି।
ଶ୍ରୀକାନ୍ତ ଶିନ୍ଦେ ଖବରଦାତାମାନଙ୍କ ସହ କଥାବାର୍ତ୍ତା କରି କହିଛନ୍ତି ଯେ, ଡୋମ୍ବିବଲିର କିଛି ନେତା ସ୍ବାର୍ଥପର ରାଜନୀତି ପାଇଁ ଭାଜପା-ଶିନ୍ଦେ ଦଳ (ଗଠବନ୍ଧନ) ପାଇଁ ବାଧା ସୃଷ୍ଟି କରିବାକୁ ଚେଷ୍ଟା କରୁଛନ୍ତି। ସେ କହିଛନ୍ତି, ମୋର ପଦ ପାଇଁ କୌଣସି ଇଚ୍ଛା ନାହିଁ। ଭାଜପା-ଶିବସେନାର ବରିଷ୍ଠ ନେତୃତ୍ୱ ଯେଉଁ ପ୍ରାର୍ଥୀ ନିଷ୍ପତ୍ତି ନେବେ ମୁଁ ସମର୍ଥନ କରିବି।
ଶ୍ରୀକାନ୍ତ କହିଛନ୍ତି, ଆମର ଉଦ୍ଦେଶ୍ୟ ହେଉଛି କେନ୍ଦ୍ରରେ ଭାଜପା ସହ ସରକାର ଗଠନ କରିବା। ଯଦି କେହି ତାଙ୍କୁ ବିରୋଧ କରନ୍ତି, ଯଦି କେହି କ୍ରୋଧିତ ହୁଅନ୍ତି ଏବଂ ଗଠବନ୍ଧନରେ ବିଶୃଙ୍ଖଳା ହୁଏ, ତେବେ ମୁଁ ମୋ ପଦରୁ ଇସ୍ତଫା ଦେବାକୁ ପ୍ରସ୍ତୁତ ଅଛି।
ନିକଟରେ ଜଣେ ମହିଳାଙ୍କୁ ଅସଦାଚରଣ କରିଥିବା ଅଭିଯୋଗରେ ଭାଜପା କାର୍ଯ୍ୟକର୍ତ୍ତା ନନ୍ଦୁ ଯୋଶୀଙ୍କ ବିରୋଧରେ ଏଫ୍ଆଇଆର ପଞ୍ଜିକୃତ ହୋଇଥିଲା। ଏ ସମ୍ପର୍କରେ ନନ୍ଦୁ ଯୋଶୀ ଏବଂ ବହୁ କାର୍ଯ୍ୟକର୍ତ୍ତା ଅଭିଯୋଗ କରିଛନ୍ତି ଯେ ଡୋମ୍ବିବଲି ମାନପଡା ପୋଲିସ ଷ୍ଟେଶନରେ ଏଫ୍ଆଇଆର ପଞ୍ଜୀକରଣ ପଛରେ ଶିବସେନା ଅଛନ୍ତି।