ଇନ୍ଦୋର,୯।୧: ଇନ୍ଦୋରରେ ପ୍ରଭାସୀ ଭାରତୀୟ ଦିବସ ସମ୍ମିଳନୀରେ ମୁଖ୍ୟମନ୍ତ୍ରୀ ଶିବରାଜ ସିଂ ଚୌହାନ ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କୁ ସ୍ବାମୀ ବିବେକାନନ୍ଦଙ୍କ ସହ ତୁଳନା କରିଛନ୍ତି। ୧୭ତମ ପ୍ରଭାସ ଭାରତୀ ଦିବସ ଉଦ୍ଘାଟନୀ କାର୍ଯ୍ୟକ୍ରମକୁ ସମ୍ବୋଧିତ କରି ସେ କହିଛନ୍ତି, ନରେନ୍ଦ୍ର(ସ୍ବାମୀ ବିବେକାନନ୍ଦ) ହିଁ କହିଥିଲେ, ଭାରତ ମାତା ବିଶ୍ୱଗୁରୁ ପଦ ହାସଲ କରିବ। ଏହା ହେଉଛି ଆଉ ଜଣେ ନରେନ୍ଦ୍ର, ଯାହାର ନେତୃତ୍ୱରେ ସ୍ବାମୀ ବିବେକାନନ୍ଦଙ୍କ କଥା ବାସ୍ତବ ରୂପ ନେଉଛି। ପ୍ରଧାନମନ୍ତ୍ରୀ ନରେନ୍ଦ୍ର ମୋଦି ବସୁଧୈବ କୁଟୁମ୍ବକମ ସୂତ୍ରରେ ସମଗ୍ର ବିଶ୍ୱକୁ ବାନ୍ଧି ରଖିଛନ୍ତି। ମୋର ଇଚ୍ଛା ଭାରତ ତାଙ୍କ ନେତୃତ୍ୱରେ ଅନେକ କ୍ଷେତ୍ରରେ ବିଶ୍ୱକୁ ଆଗେଇ ନେବା ଉଚିତ୍।
ଶିବରାଜ ଆହୁରି ମଧ୍ୟ କହିଛନ୍ତି, ଆଜି ସମଗ୍ର ଦେଶ ପ୍ରଧାନମନ୍ତ୍ରୀଙ୍କ ପଛରେ ଛିଡା ହୋଇଛି। ଯେତେବେଳେ ପ୍ରଧାନମନ୍ତ୍ରୀ ସ୍ବଚ୍ଛ ଭାରତର ମନ୍ତ୍ର ଦେଇଥିଲେ ସେତେବେଳେ ଇନ୍ଦୋର ସ୍ବଚ୍ଛତାରେ ଛକା ମାରିଥିଲା। ପ୍ରଧାନମନ୍ତ୍ରୀ ଆତ୍ମନିର୍ଭରଶୀଳ ଭାରତର ମନ୍ତ୍ର ଦେବା ପରେ ମଧ୍ୟପ୍ରଦେଶ ଆତ୍ମନିର୍ଭରଶୀଳ ମଧ୍ୟପ୍ରଦେଶ ପାଇଁ ଏକ ରୋଡମ୍ୟାପ ପ୍ରସ୍ତୁତ କରିଥିଲା। ଭାରତକୁ ପାଞ୍ଚ ଟ୍ରିଲିୟନ ଡଲାର ଅର୍ଥନୀତି କରିବା ପାଇଁ ପ୍ରଧାନମନ୍ତ୍ରୀ ମନ୍ତ୍ର ଦେଇଛନ୍ତି, ଏଥିପାଇଁ ମଧ୍ୟପ୍ରଦେଶକୁ ୫୫୦ ବିଲିୟନ ଡଲାରର ଅର୍ଥନୀତି କରିବା ପାଇଁ ଆମେ ଏକ ରୋଡମ୍ୟାପ ପ୍ରସ୍ତୁତ କରିଛୁ।
