କଟକ ଅଫିସ,୨୦ା୧: କଟକ ମହାନଗର ନିଗମ(ସିଏମ୍ସି)ର ସ୍ବତନ୍ତ୍ର ଯନ୍ତ୍ରୀ ବିଭାଗ ରହିଛି। ସେଥିରେ ନିର୍ବାହୀ ଯନ୍ତ୍ରୀଠାରୁ ଆରମ୍ଭ କରି ସହକାରୀ ଯନ୍ତ୍ରୀ, କନିଷ୍ଠ ଯନ୍ତ୍ରୀ ରହିଛନ୍ତି। ସହରର ବିଭିନ୍ନ ଉନ୍ନତିମୂଳକ ପ୍ରକଳ୍ପ ପାଇଁ ଏହି ବିଭାଗ କାର୍ଯ୍ୟ କରିଥାଏ। ମାତ୍ର ସିଏମ୍ସି ନିକଟରେ ଉକ୍ତ ବିଭାଗ ଥାଇ ମଧ୍ୟ ବିଭିନ୍ନ ପ୍ରକଳ୍ପ କାର୍ଯ୍ୟ ସରକାରୀ ସଂସ୍ଥାକୁ ଦିଆଯିବାକୁ ନେଇ ପବ୍ଲିକ ୱାର୍କ ଷ୍ଟାଣ୍ଡିଂ କମିଟି ବୈଠକରେ କର୍ପୋରେଟର ପ୍ରଶ୍ନ କରିଛନ୍ତି। ସିଏମ୍ସି ବିଜୁଭବନ ପରିସରରେ ପବ୍ଲିକ ୱାର୍କ ଷ୍ଟାଣ୍ଡିଂ କମିଟି ବୈଠକ ଗୁରୁବାର ଅନୁଷ୍ଠିତ ହୋଇଥିଲା। ଏଥିରେ କର୍ପୋରେଟରମାନେ ଯନ୍ତ୍ରୀମାନଙ୍କୁ ଘେରିଥିଲେ। ସହରରେ ୨ଟି ପ୍ରକଳ୍ପ ନିର୍ମାଣ ପାଇଁ ଓଡ଼ିଶା କ୍ଷୁଦ୍ର ଶିଳ୍ପ ନିଗମ(ଓଏସ୍ଆଇସି)କୁ କାର୍ଯ୍ୟାଦେଶ ଦିଆଯାଇଛି। ଯଦି ଓଏସ୍ଆଇସି ଏହି କାର୍ଯ୍ୟ କରିବ, ତେବେ ସିଏମ୍ସି ଯନ୍ତ୍ରୀ ବିଭାଗ କ’ଣ କରିବ ବୋଲି ୫୦ ନଂ. ୱାର୍ଡ କର୍ପୋରେଟର ସନ୍ତୋଷ ଭୋଳ ପ୍ରଶ୍ନ କରିଛନ୍ତି। ଏହାକୁ ନେଇ ହୋହଲ୍ଲା ହୋଇଥିଲା। ସେହିପରି ହକି ବିଶ୍ୱକପ୍ ଉଦ୍ଘାଟନୀ ଉତ୍ସବରେ ସହରର ସୌନ୍ଦର୍ଯ୍ୟକରଣ ପାଇଁ ୧୧ରୁ ୧୨ କୋଟି ଟଙ୍କା ଖର୍ଚ୍ଚ ହୋଇଥିବା ସିଏମ୍ସି ପକ୍ଷରୁ ତଥ୍ୟ ଦିଆଯାଇଛି। ହେଲେ କେଉଁ ବାବଦରେ କେତେ ଖର୍ଚ୍ଚ ହୋଇଛି, କେଉଁ ୱାର୍ଡରେ କେଉଁ ଏଜେନ୍ସି କାର୍ଯ୍ୟ କରିଛି ସେ ସମ୍ପର୍କରେ ସବିଶେଷ ତଥ୍ୟ ଉପସ୍ଥାପନ କରିବାକୁ କୁହାଯାଇଥିଲା। ଏଥିସହ ବାଲିଯାତ୍ରା ଖର୍ଚ୍ଚ ନେଇ ସ୍ବତନ୍ତ୍ର ଅଡିଟ୍ ରିପୋର୍ଟ ମିଳିବା ପରେ ବିଲ୍ କରାଯିବା ନେଇ କାଉନ୍ସିଲ ବୈଠକରେ ନିଷ୍ପତ୍ତି ନିଆଯାଇଥିବାବେଳେ ୨ଟି ବିଲ୍ ରିଲିଜ କରିବା ପାଇଁ ପ୍ରସ୍ତୁତ କରାଯାଇଛି। ଏହାକୁ କର୍ପୋରେଟରମାନେ ବିରୋଧ କରିଥିଲେ। ତେବେ ବୈଠକ ଆରମ୍ଭରୁ ଶେଷ ପର୍ଯ୍ୟନ୍ତ ହୋହାଲ୍ଲା ଦେଖିବାକୁ ମିଳିଥିଲା। ଏହି ବୈଠକରେ ଷ୍ଟାଣ୍ଡିଂ କମିଟି ଅଧ୍ୟକ୍ଷ ପ୍ରଦୀପ୍ତ କିଶୋର ଖୁଣ୍ଟିଆ, କର୍ପୋରେଟର ତାପସ ରଞ୍ଜନ ସାମନ୍ତରାୟ, ଚନ୍ଦନ କୁମାର ଜେନା, ବିକାଶ ରଞ୍ଜନ ବେହେରାଙ୍କ ସମେତ ଯନ୍ତ୍ରୀ ବିଭାଗର ସମସ୍ତ ଯନ୍ତ୍ରୀ ଉପସ୍ଥିତ ଥିଲେ।
