ପୁରୀ ଅଫିସ,୨୫ା୧୧: ମୁଖ୍ୟମନ୍ତ୍ରୀ ପୁରୀ ଗସ୍ତବେଳେ ତାଙ୍କ କାରକେଡ୍କୁ ଅଣ୍ଡାମାଡ଼ କରିବା ଅଭିଯୋଗରେ ପୁରୀ ପୋଲିସ ୩ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ପୁରୀ ଜିଲା ଭାଜପା ଯୁବମୋର୍ଚ୍ଚା ସଭାପତି ଜୟନ୍ତ କୁମାର ଦାସ, ପ୍ରଦୀପ ପରିଡ଼ା ଓ ବିଭୂତି ଭୂଷଣ ରଥ। ପୋଲିସ ସେମାନଙ୍କ ବିରୋଧରେ ଆଇପିସି ଧାରା ୨୯୪, ୩୪୧, ୩୫୩, ୩୩୨, ୩୩୬, ୫୦୬ ଓ ନଂ.୩୪/୨୧ରେ ମାମଲା ରୁଜୁ କରିଛି। କୋର୍ଟରେ ଜାମିନ ନାମଞ୍ଜୁର ହେବା ପରେ ସେମାନଙ୍କୁ ଜେଲକୁ ନିଆଯାଇଛି। ଅନ୍ୟପଟେ ଅଭିଯୁକ୍ତ ପୋଲିସ ହେଫାଜତରେ ଥିବାବେଳେ ତାଙ୍କ ସହ ଦୁର୍ବବ୍ୟହାର ସହ ମାରପିଟ୍ ହୋଇଥିବା ଅଭିଯୋଗ ଆଣିଛନ୍ତି। ପୋଲିସ ମାଡ଼ରେ ଜୟନ୍ତଙ୍କର କାନ ଫାଟି ଯାଇଛି। ଅଭିଯୁକ୍ତମାନଙ୍କ ଓକିଲ ବିଚାରପତିଙ୍କ ସମ୍ମୁଖରେ ଶରୀରରେ ହୋଇଥିବା କ୍ଷତସ୍ଥାନ ଦେଖାଇଥିବା ବେଳେ ପୋଲିସ କିଭଳି ଅମାନବୀୟ ବ୍ୟବହାର କରିଥିଲା ତାହା ଜଣାଇଥିଲେ। ଏ ନେଇ ଯୁବମୋର୍ଚ୍ଚା ସଭାପତି ଦାଶ କହିଛନ୍ତି, ପ୍ରଥମେ ତାଙ୍କୁ ଘଟଣାସ୍ଥଳରୁ ଉଠାଇ ନେବା ପରେ ପୋଲିସ କୁମ୍ଭାରପଡ଼ା ଥାନାକୁ ନେଇଥିଲେ। ଏହାପରେ ପୁରୀ ସହରର ବିଭିନ୍ନ ଆଇଆଇସି ଓ ପୋଲିସ ଅଧିକାରୀମାନେ ତାଙ୍କୁ ପ୍ଲାଷ୍ଟିକ ପାଇପରେ ମାଡ଼ ମାରିବା ସହ ତାଙ୍କ ସ୍ତ୍ରୀଙ୍କ ନାମରେ ଅଶ୍ଳୀଳ କଥା କହିଥିଲେ। ଏହାକୁ ଜୟନ୍ତ ବିରୋଧ କରିବାରୁ ଅଧିକ ମାଡ଼ ମାରିଥିଲେ। ପରେ ତାଙ୍କୁ ସେଠାରୁ ମେରାଇନ୍ ଡ୍ରାଇଭ୍ ଓ ପରେ ରାମଚଣ୍ଡୀ ଥାନା ନିଆଯାଇଥିଲା। ଅନ୍ୟପକ୍ଷରେ ଜୟନ୍ତ ଓ ତାଙ୍କ ସହଯୋଗୀଙ୍କ ଗିରଫ ପରେ ପୁରୀ ସହରରେ ଯୁବମୋର୍ଚ୍ଚା ଉତ୍ତେଜନାପୂର୍ଣ୍ଣ ପରିସ୍ଥିତି ସୃଷ୍ଟି କରିଥିଲା। ଅଠରନଳା ଛକଠାରେ ୨ ଘଣ୍ଟାରୁ ଊର୍ଦ୍ଧ୍ୱ ସମୟ ଧରି ରାସ୍ତାରୋକୋ କରାଯାଇଥିବା ବେଳେ ପୁରୀ ଭୁବନେଶ୍ୱର ମୁଖ୍ୟରାସ୍ତାରେ ଚଳାଚଳ ଠପ୍ ହୋଇଥିଲା। ସେହିଭଳି କୁମ୍ଭାରପଡ଼ା ଥାନା ସମ୍ମୁଖରେ ଜିଲା ଭାଜପା ସମସ୍ତ ନେତୃବୃନ୍ଦ ଉପସ୍ଥିତ ରହି ଟାୟାର ଜାଳି ରାସ୍ତାରୋକୋ ସହ ଧାରଣା ଦେଇଥିଲେ। ଏହି ଧାରଣାରେ ବିଧାୟକ ଜୟନ୍ତ କୁମାର ଷଡ଼ଙ୍ଗୀ, ବିଧାୟକ ଲଳିତେନ୍ଦ୍ୁ ବିଦ୍ୟାଧର ମହାପାତ୍ର, ପ୍ରଭାତୀ ପରିଡ଼ା, ରବି ମଲ୍ଲିକ, ପ୍ରଭଞ୍ଜନ ମହାପାତ୍ର, ସୁରଥ ବିଶ୍ୱାଲ, ଆଶ୍ରିତ ପଟ୍ଟନାୟକ, ବିରଞ୍ଚ ତ୍ରିପାଠୀ ଓ ଓମପ୍ରକାଶ ମିଶ୍ର ପ୍ରମୁଖ ଉପସ୍ଥିତ ଥିଲେ।
