ଲଣ୍ଡନ,୨୬।୬: ଫୁଟ୍ବଲ କୋଚ୍ ଗାରେଥ ସାଉଥଗେଟ୍ଙ୍କ କାର୍ଯ୍ୟକାଳ ବଢାଇବାକୁ ଚାହୁଁଛି ଇଂଲଣ୍ଡ। ଚଳିତ ୟୁରୋକପ୍ ଓ ଆସନ୍ତାବର୍ଷ କାତାରରେ ଆୟୋଜନ ହେବାକୁ ଥିବା ଫିଫା ବିଶ୍ୱକପ୍ରେ ଇଂଲଣ୍ଡର ପ୍ରଦର୍ଶନ ଯାହାହେଉ ନା କାହିଁକି ସାଉଥ୍ଗେଟ୍ ଆଉ କେତୋଟି ବର୍ଷ ଦାୟିତ୍ୱରେ ରହିବେ। ୨୦୨୨ ପରେ ମଧ୍ୟ ତାଙ୍କୁ କୋଚ୍ ଦାୟିତ୍ୱରେ ରଖିବାକୁ ଇଂଲଣ୍ଡ ଫୁଟ୍ବଲ ଆସୋସିଏଶନ (ଇଏଫ୍ଏ) ଚାହୁଁଛି। ସାଉଥଗେଟ୍ ଜଣେ ହାଇପ୍ରୋଫାଇ କୋଚ୍। ସେ ମଧ୍ୟ ତାଙ୍କ କାର୍ଯ୍ୟ ଭଲ ଭାବେ ସମ୍ପାଦନ କରୁଛନ୍ତି ବୋଲି ଆସୋସିଏଶନ ମୁଖ୍ୟ ମାର୍କ ବୁଲିଙ୍ଗହାମ ଶୁକ୍ରବାର କହିଛନ୍ତି। ସେ ଆଉ କେତେବର୍ଷ ଏହି ଦାୟିତ୍ୱରେ ରହିବେ ବୋଲି ଆସୋସିଏଶନ ତରଫରୁ ସ୍ପଷ୍ଟ କରାଯାଇଛି।
ମଙ୍ଗଳବାର ୟୁରୋକପ୍ ରାଉଣ୍ଡ ଅଫ୍ ୧୬ରେ ଇଂଲଣ୍ଡ ଜର୍ମାନୀକୁ ଭେଟିବ। ୫୦ ବର୍ଷୀୟ ସାଉଥଗେଟ୍ ୨୦୨୪ ପର୍ଯ୍ୟନ୍ତ ଦାୟିତ୍ୱରେ ରହିବେ ବୋଲି ଆଶା କରାଯାଉଛି। ଓ୍ବେମ୍ବଲି ଷ୍ଟାଡିୟମରେ ୟୁରୋକପର ସେମିଫାଇନାଲ ଓ ଫାଇନାଲ ଖେଳାଯିବ। ସାଉଥଗେଟ୍ଙ୍କ ତତ୍ତ୍ୱାବଧାନରେ ଇଂଲଣ୍ଡ ଗତ କେତେବର୍ଷ ହେବ ବେଶ୍ ସଫଳ ପ୍ରଦର୍ଶନ କରିଆସିଛି।