ନୂଆଦିଲ୍ଲୀ,୧୦।୧ : ସରକାରୀ ଚାକିରି ଏବଂ ପ୍ରତିଯୋଗିତାମୂଳକ ପରୀକ୍ଷା ପାଇଁ ପ୍ରସ୍ତୁତି ପ୍ରଦାନ କରୁଥିବା କୋଚିଂ ପ୍ରତିଷ୍ଠାନଗୁଡିକ ସେମାନଙ୍କ ବିଜ୍ଞାପନରେ ଶତପ୍ରତିଶତ ସଫଳତା କିମ୍ବା ଚାକିରି ପାଇଁ ଚୟନ ହୋଇଥିବା ଦାବି କରିପାରିବେ ନାହିଁ। କୋଚିଂ ସେକ୍ଟରରେ ବିଭ୍ରାନ୍ତିକର ବିଜ୍ଞାପନକୁ ରୋକିବା ପାଇଁ କେନ୍ଦ୍ରୀୟ ଉପଭୋକ୍ତା ସୁରକ୍ଷା ପ୍ରାଧିକରଣ (ସିସିପିଏ) ନିର୍ଦ୍ଦେଶାବଳୀ ପ୍ରସ୍ତୁତ କରିଛି।
ସିସିପିଏ ମୁଖ୍ୟ କମିଶନର ରୋହିତ କୁମାର ସିଂଙ୍କ ଅଧ୍ୟକ୍ଷତାରେ ବିଭ୍ରାନ୍ତିକର ବିଜ୍ଞାପନ ରୋକିବା ଏବଂ ନିୟନ୍ତ୍ରଣ କମିଟିର ବୈଠକରେ ଏହି ଡ୍ରାଫ୍ଟ ନିର୍ଦ୍ଦେଶାବଳୀ ପ୍ରକାଶ ପାଇଛି। ଏହା କୋଚିଂ ପ୍ରତିଷ୍ଠାନଗୁଡ଼ିକୁ ସଫଳତା ହାର ଏବଂ ଚାକିରି ପାଇଁ ମନୋନୀତ ହୋଇଥିବା ଛାତ୍ରୀଛାତ୍ର ସଂଖ୍ୟା ଉପରେ ମିଥ୍ୟା ଦାବି କରିବାକୁ ବାରଣ କରିବ। ଡ୍ରାଫ୍ଟ ଅନୁଯାୟୀ, ସୂଚନାର ଫଣ୍ଟ ଆକାର ଦାବି / ବିଜ୍ଞାପନରେ ବ୍ୟବହୃତ ସମାନ ହେବ। ବିଜ୍ଞାପନର ଏକ ପ୍ରତିଷ୍ଠିତ ତଥା ସହଜରେ ଦୃଶ୍ୟମାନ ସ୍ଥାନରେ ଏହିପରି ସୂଚନା ଦେବାକୁ ପଡିବ। ଯଦି କୌଣସି କୋଚିଂ ପ୍ରତିଷ୍ଠାନ ବିଭ୍ରାନ୍ତିକର ବିଜ୍ଞାପନ କରେ, ତେବେ ଗ୍ରାହକ ସୁରକ୍ଷା ଆଇନ, ୨୦୧୯ ଅନୁଯାୟୀ ଜରିମାନା ଆଦାୟ କରାଯିବ।
ଡ୍ରାଫ୍ଟ ଅନୁଯାୟୀ କୋଚିଂ ପ୍ରତିଷ୍ଠାନକୁ ସମସ୍ତ ଆବଶ୍ୟକୀୟ ସୂଚନା ପ୍ରଦାନ କରିବାକୁ ପଡିବ। ଏଥିରେ, ସଫଳ ପ୍ରାର୍ଥୀ, ପଦ, ପାଠ୍ୟକ୍ରମ, ଏହାର ଅବଧି ବିଷୟରେ ଉଲ୍ଲେଖ କରିବାକୁ ପଡିବ । ପ୍ରାର୍ଥୀ ଫି ପ୍ରଦାନ କରିଛନ୍ତି ନା ମାଗଣା କୋଚିଂ ନେଇଛନ୍ତି ତାହା ମଧ୍ୟ ଉଲ୍ଲେଖ କରିବାକୁ ପଡିବ। କୋଚିଂ ପ୍ରତିଷ୍ଠାନଗୁଡିକ ଦ୍ୱାରା ବିଭ୍ରାନ୍ତିକର ବିଜ୍ଞାପନ ବିରୁଦ୍ଧରେ ସିସିପିଏ ସ୍ବତଃପ୍ରବୃତ୍ତ ଭାବେ କାର୍ଯ୍ୟାନୁଷ୍ଠାନ ଗ୍ରହଣ କରିଥିଲେ। ଏହି ପରିପ୍ରେକ୍ଷୀରେ, ସିସିପିଏ ୩୧ ଟି କୋଚିଂ ପ୍ରତିଷ୍ଠାନକୁ ନୋଟିସ ଜାରି କରିଛି ଏବଂ ୯ଟି ଉପରେ ଜରିମାନା ଲାଗୁ କରିଛି ।