ଭୁବନେଶ୍ୱର, ୨୮।୧୦: ପ୍ରାଥମିକ ଆଲୁମିନିୟମ ଶିଳ୍ପ ବର୍ତ୍ତମାନ କୋଇଲା ସଙ୍କଟ ଦେଇ ଗତି କରୁଛି। ଏହି ସମସ୍ୟା ଯଦି ଦୂର କରା ନ ଯାଏ ତେବେ ଆଲୁମିନିୟମ ମୂଲ୍ୟ ଶୃଙ୍ଖଳାର ଅଂଶ ଥିବା ୫ ହଜାରରୁ ଅଧିକ କ୍ଷୁଦ୍ର ଏବଂ ମଧ୍ୟମ ଉଦ୍ୟୋଗ(ଏସ୍ଏମ୍ଇ) ବିପୁଳ ପରିମାଣର କ୍ଷତି ସହିବେ ବୋଲି ଇଣ୍ଡିଆନ ଇଣ୍ଡଷ୍ଟ୍ରିଆଲ ଭାଲ୍ୟୁ ଚେନ୍ କାଉନ୍ସିଲ (ଆଇଆଇଭିସିସି) ପକ୍ଷରୁ ଆଶଙ୍କା କରାଯାଇଛି।
ବୃହତ୍ ଆଲୁମିନିୟମ ଉତ୍ପାଦନକାରୀ ଏବଂ ତତ୍ ସମ୍ପର୍କିତ ମାନୁଫାକ୍ଚରିଂ ଶିଳ୍ପର ଯୋଗାଣ ଶୃଙ୍ଖଳରେ ୧ ହଜାର ଏସ୍ଏମ୍ଇ ଅଂଶ ହୋଇଥିବା ବେଳେ ପ୍ରାୟ ୪ ହଜାର ଏସ୍ଏମଇ ଆନୁଷଙ୍ଗିକ ଆଲୁମିନିୟମ ଉତ୍ପାଦନ ଓ ବଣ୍ଟନ କାର୍ଯ୍ୟକଳାପ ସହ ଜଡ଼ିତ ରହିଛନ୍ତି। ଭାରତରେ ଆଲୁମିନିୟମରେ କୌଣସି ବଡ଼ ବଜାର ବିଭ୍ରାଟ ଘଟିଥିଲେ ତାହାର ଉତ୍କଟ ଆର୍ଥିକ ପ୍ରଭାବ ଏହି କ୍ଷୁଦ୍ରସଂସ୍ଥାଗୁଡ଼ିକ ଉପରେ ପଡ଼ିଥାଏ। ଅର୍ଥନୀତିରେ ଦୃଢ଼ ସୁଧାର ହେଉଥିବା ବେଳେ ମହାମାରୀ ପରବର୍ତ୍ତୀ ସମୟରେ ସମଗ୍ର ଶିଳ୍ପରେ ଚାହିଦାରେ ହଠାତ୍ ବୃଦ୍ଧି ହୋଇଛି।
ଏଭଳି ଏକ ଗୁରୁତ୍ୱପୂର୍ଣ୍ଣ ସମୟରେ କୋଇଲାର ଅଭାବ ସହିତ ଯୋଗାଣରେ ସମସ୍ୟା ଆଲୁମିନିୟମ ନିର୍ମାଣକୁ ଗୁରୁତର ଭାବେ ପ୍ରଭାବିତ କରିଛି। ପ୍ରସ୍ତାବିତ ୧୫ ଦିନ ତୁଳନାରେ କୋଇଲା ଷ୍ଟକ୍ ମାତ୍ର ୧.୫-୫ ଦିନ ଭଳି ଚିନ୍ତାଜନକ ସ୍ତରକୁ ଖସିଯାଇଥିବାରୁ ଶିଳ୍ପସଂସ୍ଥାଗୁଡ଼ିକ ପରିଚାଳନା ବଜାୟ ରଖିବାକୁ ସଂଘର୍ଷ କରୁଛନ୍ତି। ନିଜର ବ୍ୟାପକ ବିଦ୍ୟୁତ୍ ଆବଶ୍ୟକତା ପୂରଣ କରିବା ଏବଂ କାରଖାନାର କାର୍ଯ୍ୟକୁ ଚାଲୁ ରଖିବା ଲାଗି ଶିଳ୍ପ କୌଣସି ବିକଳ୍ପ ପନ୍ଥା ପାଉନାହାନ୍ତି। ଆଲୁମିନିୟମ ନିର୍ମାଣ ହେଉଛି ଏକ ଅତ୍ୟଧିକ ବିଦ୍ୟୁତ୍ ଶକ୍ତି ଦରକାର କରୁଥିବା କାର୍ଯ୍ୟ ଏବଂ ଏକ ନିରନ୍ତର ଭିତ୍ତିକ ଶିଳ୍ପ ଯାହାକୁ ଆଡ୍ ହକ୍ ଶଟ୍ଡାଉନ୍ ଲାଗି ପ୍ରସ୍ତୁତ କରାଯାଇନାହିଁ। ପରିଚାଳନା ଜାରି ରଖିବା ଲାଗି ବିପୁଳ ନିବେଶରେ କାରଖାନା ଭିତରେ ସ୍ଥାପନ କରାଯାଇଥିବା ନିଜସ୍ବ ପାୱାର ପ୍ଲାଣ୍ଟ ଉପରେ ଏହି ଶିଳ୍ପ ନିର୍ଭରଶୀଳ। ବିଦ୍ୟୁତ୍ ଯୋଗାଣ ଓ ଆଲୁମିନିୟମ ଉପତ୍ାଦନ ଜାରି ରଖିବା ଲାଗି ଏହି ପାୱାର ପ୍ଲ୍ାଣ୍ଟଗୁଡ଼ିକୁ ଦ୍ରୁତ ଗତିରେ କୋଇଲା ଯୋଗାଣ ଆବଶ୍ୟକତା ରହିଥିବା ଆଇଆଇଭିସିସି କହିଛି।