ନୂଆଦିଲ୍ଲୀ, ୪।୧: ଗତ ଆର୍ଥିକ ବର୍ଷ ଅପେକ୍ଷା ଚଳିତ ଆର୍ଥିକ ବର୍ଷର ୩ୟ ତ୍ରୈ ମାସିକ ଶେଷ ସୁଦ୍ଧା ଦେଶର କୋଇଲା ଉତ୍ପାଦନ ବୃଦ୍ଧି ପାଇଥିବା କୋଲ ଇଣ୍ଡିଆ ପକ୍ଷରୁ କୁହାଯାଇଛି। ଏପରିକି ୨୦୨୨-୨୩ ବର୍ଷର ପ୍ରଥମ ୯ମାସ (ଏପ୍ରିଲରୁ ଡିସେମ୍ବର) ମଧ୍ୟରେ ଦେଶରେ କୋଇଲା ଉପତ୍ାଦନ ୧୬% (୧୬.୩୯)ରୁ ଅଧିକ ବୃଦ୍ଧି ଘଟି ପ୍ରାୟ ୬୦୮ (୬୦୭.୯୭) ମିଲିୟନ୍ ଟନ୍ରେ ପହଞ୍ଚତ୍ଛି। ବିଶେଷ କରି ୨୦୨୧-୨୨ ବର୍ଷର ସମାନ ଅବଧି ମଧ୍ୟରେ ଦେଶର କୋଇଲା ଉତ୍ପାଦନ ୫୨୨ (୫୨୨.୩୪) ମିଲିୟନ୍ ଟନରୁ ଅଧିକ ରହିଥିଲା ହେଲେ ୨୦୨୨-୨୩ ଆର୍ଥିକ ବର୍ଷରେ ଏହି ସଂଖ୍ୟା ବୃଦ୍ଧି ପାଇଥିବା ମଙ୍ଗଳବାର କେନ୍ଦ୍ର କୋଇଲା ମନ୍ତ୍ରଣାଳୟ ପକ୍ଷରୁ ସୂଚନା ଦିଆଯାଇଛି। ଉଲ୍ଲେଖଯୋଗ୍ୟ, କୋଲ୍ ଇଣ୍ଡିଆ ଲିମିଟେଡ଼୍ ଉତ୍ପାଦନରେ ୧୫.୮୨% ବୃଦ୍ଧି ପାଇଛି। ଚଳିତ ଆର୍ଥିକ ବର୍ଷରେ ଡିସେମ୍ବର ସୁଦ୍ଧା ୪୭୯.୦୫ ନିୟୁତ ଟନ୍ ଶୁଖଲା ଇନ୍ଧନ ଉତ୍ପାଦନ ରେକର୍ଡ କରାଯାଇଛି। ଦେଶରେ ବନ୍ଦ ହୋଇ ପଡିରହିଥିବା କୋଇଲା ବ୍ଲକ୍ ଗୁଡ଼ିକର ଖଣି କ୍ଷମତା ଅଧିକ ବ୍ୟବହାର ହେତୁ କୋଇଲା ଉତ୍ପାଦନରେ ବୃଦ୍ଧି ପାଇଛି। ସୂଚନାଯୋଗ୍ୟ,କୋଇଲା ଉତ୍ପାଦନ କ୍ଷମତା ବୃଦ୍ଧି କରିବା ପାଇଁ ୧୪୧ଟି ନୂତନ କୋଇଲା ବ୍ଲକ୍ ନିଲାମ ପାଇଁ ରଖାଯାଇଛି ବୋଲି କୋଇଲା ମନ୍ତ୍ରଣାଳୟ ପକ୍ଷରୁ କୁହାଯାଇଛି।
