ପାରାଦୀପ,୧୦ା୧(ସ୍ବ.ପ୍ର.): ଗତ ଡିସେମ୍ବର ୨୬ରେ ଉଦ୍ଧାର କରାଯାଇଥିବା ୨୦ ଜଣ ବାଂଲାଦେଶୀ ମତ୍ସ୍ୟଜୀବୀ ଓ ସେମାନଙ୍କ ବୋଟ୍କୁ ଭାରତୀୟ ତଟରକ୍ଷୀ ବାହିନୀ (କୋଷ୍ଟଗାର୍ଡ) ରବିବାର ବାଂଲାଦେଶ କୋଷ୍ଟଗାର୍ଡ ଟିମ୍କୁ ପ୍ରତ୍ୟର୍ପଣ କରିଛି। କୋଷ୍ଟଗାର୍ଡର ପାଟ୍ରୋଲିଂ ଜାହାଜ ସରୋଜିନୀ ନାଇଡୁ ସେମାନଙ୍କୁ ନେଇ ଆଇଏମ୍ବିଏଲ୍(ଇଣ୍ଟରନ୍ୟାଶନାଲ ମେରିଟାଇମ ବର୍ଡର ଲାଇନ)ଠାରେ ବାଂଲାଦେଶ କୋଷ୍ଟଗାର୍ଡର ସ୍ବାଧୀନ ବାଂଲା ଜାହାଜକୁ ହସ୍ତାନ୍ତର କରିଛି। ଏହି ସମୟରେ ସମସ୍ତ ମତ୍ସ୍ୟଜୀବୀଙ୍କ ସ୍ବାସ୍ଥ୍ୟାବସ୍ଥା ଠିକ୍ ଥିବା ଦର୍ଶାଯାଇଛି।
ପାରାଦୀପ-ଅସ୍ତରଙ୍ଗ ମଝି ସମୁଦ୍ର ସୀମାରେ ଉକ୍ତ ବାଂଲାଦେଶ ବୋଟ ଇତସ୍ତତଃ ବୁଲୁଥିବାବେଳେ ପାରାଦୀପର ୨ଟି ମାଛଧରା ଡଙ୍ଗା ତାକୁ ଉଦ୍ଧାର କରି ମାଛଧରା ବନ୍ଦର ପରିସରକୁ ଆଣିଥିଲା। ଉକ୍ତ ବୋଟ୍ରେ ଉପରୋକ୍ତ ମତ୍ସ୍ୟଜୀବୀମାନେ ଥିଲେ। ପରେ କୋଷ୍ଟଗାର୍ଡ ଓ ମେରାଇନ ପୋଲିସ ଏ ବିଷୟରେ ସବିଶେଷ ଯାଞ୍ଚ କରିଥିଲା। ଏଥିରୁ ଜଣାପଡ଼ିଥିଲା, ସମ୍ପୃକ୍ତ ବାଂଲାଦେଶ ବୋଟ୍ଟି ଯାନ୍ତ୍ରିକ ତ୍ରୁଟି ଯୋଗୁ ଭାରତୀୟ ସୀମାକୁ ପଶି ଆସିଥିଲା। ମତ୍ସ୍ୟଜୀବୀମାନଙ୍କୁ ମାନବିକତା ଆଧାରରେ ସମସ୍ତ ପ୍ରକାର ସହାୟତା ଯୋଗାଇ ଦିଆଯାଇଥିଲା।