ସାଓ ପାଉଲୋ,୧୭।୬(ଏପି): ଚଳିତ କୋପା ଆମେରିକା ଫୁଟ୍ବଲ ଟୁର୍ନାମେଣ୍ଟରେ କରୋନା ଆକ୍ରାନ୍ତ ବୃଦ୍ଧି ପରିଲକ୍ଷିତ ହୋଇଛି। ୩୩ ଜଣ ଖେଳାଳି ଓ ଷ୍ଟାଫ୍ଙ୍କ ସମେତ ମୋଟ ୫୨ଜଣ ସଂକ୍ରମିତ ହେବା କଥା ବ୍ରାଜିଲ ସ୍ବାସ୍ଥ୍ୟ ବିଭାଗ ସୂଚନା ଦେଇଛି। ପୂର୍ବରୁ ୪୧ଟି କେସ ଦେଖାଦେଇଥିଲା। ଏବେ ଟୁର୍ନାମେଣ୍ଟରୁ ଆଉ ୧୯ ଜଣ ଓ୍ବାର୍କର ବା ଶ୍ରମିକ ସଂକ୍ରମିତ ହୋଇଛନ୍ତି ବୋଲି ମନ୍ତ୍ରଣାଳୟ ତରଫରୁ କୁହାଯାଇଛି।
କିଛି ଶ୍ରମିକ ବ୍ରାସିଲିଆରେ ରହୁଛନ୍ତି। ବ୍ରାଜିଲ ତା’ର ପ୍ରଥମ ମ୍ୟାଚ୍ରେ ଭେନିଜୁଏଲାକୁ ୩-୦ ଗୋଲରେ ହରାଇଥିଲା। ସେହିପରି ଆର୍ଜେଣ୍ଟିନା- ଚିଲି ମ୍ୟାଚ୍ ୧-୧ ଗୋଲରେ ଅମୀମାଂସିତ ରହିଥିଲା। ଭେନିଜୁଏଲା ଦଳ କରୋନା ଯୋଗୁ ପ୍ରଭାବିତ ହୋଇଥିଲା। କେତେଜଣ ଖେଳାଳି ଓ ଷ୍ଟାଫ୍ ଏଥିରେ ସଂକ୍ରମିତ ହୋଇଥିଲେ। ବଲିଭିଆ ଦଳର ମଧ୍ୟ ୩ଜଣ ଖେଳାଳି ଏଥିପାଇଁ ବାଦ୍ ପଡିଥିଲେ।
ଷ୍ଟ୍ରାଇକର ମାର୍ସେଲୋ ମାର୍ଟିନ୍ସ କରୋନା ପଜିଟିଭ ବୋଲି ବଲିଭିଆ ଗଣମାଧ୍ୟମ ଖବର ପ୍ରକାଶିତ କରିଥିଲା। ମାର୍ଟିନ୍ସ ଏଥିପାଇଁ ଦକ୍ଷିଣ ଆମେରିକା ଫୁଟ୍ବଲ ପ୍ରଶାସନିକ ସଂସ୍ଥା କନ୍ମେବୋଲଙ୍କୁ ଦାୟୀ କରିଥିଲେ। କେବଳ ସେତିକି ନୁହେଁ କଲମ୍ବିଆ, ପେରୁ ଓ ବଲିଭିଆର କେତେଜଣ ଷ୍ଟାଫ୍ କରୋନା ପଜିଟିଭ ବୋଲି ଜଣାପଡିଛି। କୋପା ଆମେରିକାରେ ୧୦ଟି ଦଳ ଅଂଶଗ୍ରହଣ କରିଛନ୍ତି। ଆୟୋଜକ ବ୍ରାଜିଲରେ ବିଶ୍ୱର ସବୁଠାରୁ ଅଧିକ କରୋନା ମାମଲା ଦେଖିବାକୁ ମିଳିଛି। ଏଥିରେ ମୋଟ ୪, ୯୦,୦୦୦ ପ୍ରାଣ ହରାଇଛନ୍ତି। ପ୍ରଥମେ କୋପା ଆମେରିକା ଆର୍ଜେଣ୍ଟିନା ଓ କଲମ୍ବିଆରେ ଖେଳାଯିବାର କାର୍ଯ୍ୟକ୍ରମ ଥିଲା। ତେବେ ଶେଷ ମୁହୂର୍ତ୍ତରେ ଏହି ମେଗା ଇଭେଣ୍ଟକୁ ବ୍ରାଜିଲରେ ଆୟୋଜନ କରିବାକୁ ନିଷ୍ପତ୍ତି ନିଆଯାଇଥିଲା।
