ହାଇଦ୍ରାବାଦ, ୬।୨: କୌଣସି ଅଭିଯୋଗ ହେଲେ ଅଭିଯୁକ୍ତଙ୍କୁ ଥାନା ହାଜତରେ ଅଟକ ରଖାଯାଇଥାଏ। ତେବେ ତେଳଙ୍ଗାନାରେ ୨ ଗଞ୍ଜାଙ୍କୁ ୨୫ ଦିନ ଥାନା ହାଜତରେ ରହିବାକୁ ପଡ଼ିଛି। ଏହି ଘଟଣା ଏବେ ସୋସିଆଲ ମିଡ଼ିଆରେ ଭାଇରାଲ ହେବାରେ ଲାଗିଛି। ଗଞ୍ଜା ଲଢ଼େଇ ଅଭିଯୁକ୍ତମାନଙ୍କ ସହିତ ସେମାନଙ୍କୁ ଥାନା ହାଜତକୁ ଅଣାଯାଇଥିଲା। ଅଭିଯୁକ୍ତମାନେ ଜାମିନରେ ବାହାରକୁ ଆସିଥିବାବେଳେ ବିଚରା ଗଞ୍ଜା ହାଜତରେ ରହି ଯାଇଥିଲେ। ସ୍ଥାନୀୟ ଖମ୍ମମ ଜିଲାରେ ମିଦିଗୋଣ୍ଡା ଥାନାରେ ଗଞ୍ଜା ଅଟକ ରହିଛନ୍ତି। ଜାନୁୟାରୀ ୧୦ରେ ପୋଲିସ ୨ ଗଞ୍ଜା ସହିତ ୧୦ ଅଭିଯୁକ୍ତଙ୍କ ଥାନାକୁ ଆଣିଥିବା ଜଣାପଡ଼ିଛି। ଗଞ୍ଜା ଦୁଇଟିର କେହି ଦାବିଦାର ନ ଥିବାରୁ ଅସୁବିଧା ହେଉଥିବା ଥାନା ପକ୍ଷରୁ କୁହାଯାଇଛି। ସେମାନଙ୍କୁ କେହି ନ ନେଲେ ଶେଷ ନିଲାମ ଡକାଯିବ ବୋଲି ଥାନାର ଉଚ୍ଚ ଅଧିକାରୀ ସୂଚନା ଦେଇଛନ୍ତି।