ଚେନ୍ନାଇ,୧୦।୧୧ : ଜାତୀୟ ତଦନ୍ତ ଏଜେନ୍ସି (ଏନଆଇଏ) ପକ୍ଷରୁ ଗୁରୁବାର ତାମିଲନାଡୁର ୪୫ ଟି ସ୍ଥାନରେ ଏକକାଳୀନ ଚଢ଼ାଉ ଆରମ୍ଭ କରିଛି। ଦୀପାବଳି ଅବସରରେ କୋଏମ୍ବାଟୁରରେ ଏକ ମନ୍ଦିର ବାହାରେ କାର ବୋମା ବିସ୍ଫୋରଣ ଘଟଣାକୁ ନେଇ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି।
କାର୍ ବୋମା ବିସ୍ଫୋରଣରେ ଅଭିଯୁକ୍ତ ମାନବ ବୋମା ଜାମିଶା ମୁବିନ (୨୯) ଙ୍କ ମୃତ୍ୟୁ ହୋଇଛି। ସ୍ବରାଷ୍ଟ୍ର ମନ୍ତ୍ରଣାଳୟ ଏହି ଘଟଣାର ତଦନ୍ତକୁ ଏନଆଇଏକୁ ହସ୍ତାନ୍ତର କରିଛି। କାରରେ ଥିବା ଏଲପିଜି ସିଲିଣ୍ଡର ବିସ୍ଫୋରଣ ହୋଇଥିଲା। ଘଟଣାସ୍ଥଳରୁ ନଖ, ମାର୍ବଲ ଏବଂ ଛୋଟ ଛୋଟ ସିସା ଖଣ୍ଡ ମିଳିଥିଲା। ଏହାକୁ ସିଲିଣ୍ଡରରେ ଭରି ବିସ୍ଫୋରଣ କରିବାର ଏକ ବଡ ଷଡଯନ୍ତ୍ର ରଚାଯାଇଥିବା ଦାବି କରାଯାଇଥିଲା, କିନ୍ତୁ ଏହା ବିଫଳ ହୋଇଥିଲା। ୨୩ ଅକ୍ଟୋବର ସକାଳେ ଏହି ବିସ୍ଫୋରଣ ହୋଇଥିଲା।
ତାମିଲନାଡୁ ପୋଲିସର ସହଯୋଗରେ ଏନଆଇଏ ଅଧିକାରୀମାନେ ଏକକାଳୀନ ଚଢ଼ାଉ ଆରମ୍ଭ କରିଛନ୍ତି। କୋଟାମାଡୁ, ପୋନଭିଜା ନଗର, ରଥିନପୁରୀ ଏବଂ ଉକଡାମ ପରି ଅଞ୍ଚଳରେ ବୋମା ବିସ୍ଫୋରଣ ଘଟଣା ସହ ସମ୍ପୃକ୍ତ ସନ୍ଦିଗ୍ଧଙ୍କ ଘରେ ଏହି କାର୍ଯ୍ୟାନୁଷ୍ଠାନ ଗ୍ରହଣ କରାଯାଇଛି। କେନ୍ଦ୍ରୀୟ ଅନୁସନ୍ଧାନ ଏଜେନ୍ସି ଏନଆଇଏ ଏହି ମାମଲାରେ ପଞ୍ଜୀକୃତ ହେବାର ପ୍ରାୟ ୧୫ ଦିନ ପରେ ଏହି ପଦକ୍ଷେପ ନେଇଛି।
କେନ୍ଦ୍ର ସ୍ବରାଷ୍ଟ୍ର ମନ୍ତ୍ରଣାଳୟର କାଉଣ୍ଟର ଆତଙ୍କବାଦ ଏବଂ କାଉଣ୍ଟର ରେଡିକାଲାଇଜେଷ୍ଟଶନ (ସିଟିସିଆର) ଡିଭିଜନ ଏହି ଘଟଣାର ତଦନ୍ତ ପାଇଁ ନିର୍ଦ୍ଦେଶ ଜାରି କରିଛି। ତାମିଲନାଡୁର ମୁଖ୍ୟମନ୍ତ୍ରୀ ଏମ.କେ ଷ୍ଟାଲିନ ଏହି ମାମଲାର ଏନଆଇଏ ଯାଞ୍ଚ ପାଇଁ ସୁପାରିଶ କରିବାର ଗୋଟିଏ ଦିନ ପରେ ଏହି ପଦକ୍ଷେପ ଗ୍ରହଣ କରାଯାଇଛି। କୋଏମ୍ବାଟୁର ଉକଡାମ ଅଞ୍ଚଳରେ କାର ସିଲିଣ୍ଡର ବିସ୍ଫୋରଣ ସହ ସମ୍ପୃକ୍ତ ମାମଲାର ତଦନ୍ତ ଏନଆଇଏକୁ ହସ୍ତାନ୍ତର କରିବାକୁ ସିଏମ ଷ୍ଟାଲିନ ଗୃହ ମନ୍ତ୍ରଣାଳୟକୁ ସୁପାରିଶ କରଥିଲେ। ଏହା ସହିତ ସେ କୋଏମ୍ବାଟୁରରେ ସୁରକ୍ଷା ସୁନିଶ୍ଚିତ କରିବାକୁ ତାମିଲନାଡୁ ପୋଲିସକୁ ନିର୍ଦ୍ଦେଶ ଦେଇଛନ୍ତି।