ଭୁବନେଶ୍ୱର, ୧୧ା୧୦ (ସ୍ପୋଟର୍ସ ବ୍ୟୁରୋ)-ହିରୋ ଇଣ୍ଡିଆନ ସୁପର ଲିଗ୍ର ୭ମ ସଂସ୍କରଣ ପୂର୍ବରୁ ଦକ୍ଷିଣ ଆଫ୍ରିକୀୟ ମିଡ୍ଫିଲ୍ଡର କୋଲ୍ ଆଲେକ୍ଜାଣ୍ଡର ଓଡ଼ିଶା ଏଫ୍ସି ସହ ୨ବର୍ଷିଆ ଚୁକ୍ତି କରିଛନ୍ତି। କ୍ଲବ ତରଫରୁ ଶନିବାର ଘୋଷଣା କରାଯାଇଛି। କେପ୍ଟାଉନ୍ରେ ଜନ୍ମଗ୍ରହଣ କରିଥିବା ଆଲେକ୍ଜାଣ୍ଡର ଭାସ୍କୋଡାଗାମା, ଚିପ୍ପା ୟୁନାଇଟେଡ୍ ପୋଲେକ୍ୱାନେ ସିଟି ଏବଂ ସୁପର ସ୍ପୋର୍ଟ ୟୁନାଇଟେଡ୍ ଆଦି ବିଭିନ୍ନ କ୍ଲବ ତରଫରୁ ଖେଳିଛନ୍ତି। ତାଙ୍କୁ ବର୍ତ୍ତମାନ ୩୧ ବର୍ଷ ବୟସ। ସେ ଦକ୍ଷିଣ ଆଫ୍ରିକା ଜାତୀୟ ଦଳର ଜଣେ ସଦସ୍ୟ। ଗତବର୍ଷ ସାଉଥ ଆଫ୍ରିକାନ୍ ପ୍ରିମିୟର ଲିଗ୍ରେ ବିଦ୍ଭେଷ୍ଟ ଓ୍ବିଟ୍ସ ତରଫରୁ ତାଙ୍କ ପ୍ରଦର୍ଶନ ଉଲ୍ଲେଖନୀୟ ଥିଲା। ଓଡ଼ିଶା ଏଫ୍ସି ମୁଖ୍ୟ କୋଚ୍ ଷ୍ଟୁଆର୍ଟ ବାକ୍ସଟର କହିଛନ୍ତି, ସେ ବଫାନା ସହିତ ଥିବାବେଳେ କୋଲ୍ଙ୍କ ସହ କାର୍ଯ୍ୟ କରିଛନ୍ତି। ସେ ଜଣେ ଉଚ୍ଚକୋଟୀର ଖେଳାଳି। ଆମ ସମର୍ଥକଙ୍କ ସେ ପ୍ରିୟଭାଜନ ହୋଇ ପାରିବେ ବୋଲି ତାଙ୍କର ଦୃଢ ବିଶ୍ୱାସ। ଆଲକ୍ଜାଣ୍ଡର କହିଛନ୍ତି, କ୍ଲବର ସ୍ବତନ୍ତ୍ର ସମର୍ଥକଙ୍କ ବିଷୟରେ ମୁଁ ଅନେକ କିଛି ଶୁଣିଛି। ଚଳିତ ବର୍ଷ ଅବଶ୍ୟ ସେମାନଙ୍କୁ ଷ୍ଟାଡିୟମରେ ଦେଖିବାକୁ ମିଳିବନି। ଆମେ ପ୍ରଭାବୀ ପ୍ରଦର୍ଶନ ସହ ସେମାନଙ୍କୁ ଗର୍ବିତ କରିବାକୁ ଚେଷ୍ଟା କରିବୁ।