ନୂଆଦିଲ୍ଲୀ, ୨୧।୧୨: ଦେଶରେ କରୋନା ମହାମାରୀର ନୂଆ ଭାରିଆଣ୍ଟ ଯୋଗୁ ଆତଙ୍କ ସୃଷ୍ଟି ହୋଇଛି। ଏପରିସ୍ଥଳେ ଉତ୍ତରଭାରତ ସମେତ ଦେଶର ବହୁ ଅଞ୍ଚଳରେ ତାପମାତ୍ରା ହଠାତ୍ କମିବା ସହିତ ଶୀତ ଲହରୀ ଆରମ୍ଭ ହୋଇଛି। ଜାତୀୟ ରାଜଧାନୀ ଦିଲ୍ଲୀର ସଫଦରଜଙ୍ଗରେ ମଙ୍ଗଳବାର ସକାଳ ୮ଟା ୩୦ରେ ସର୍ବନିମ୍ନ ତାପମାତ୍ରା ୪ ଡିଗ୍ରୀ ସେଲସିୟସ ରେକର୍ଡ ହୋଇଛି। ପାଣିପାଗ ବିଶେଷଜ୍ଞମାନେ କହିଛନ୍ତି ଯେ ଦେଶର ବହୁ ଅଞ୍ଚଳରେ ତାପମାତ୍ରା ପୁଣି କମିବାର ସମ୍ଭାବନା ରହିଛି।
ଦେଶର ବହୁ ଅଞ୍ଚଳରେ ତୁଷାରପାତ ହେବାରେ ଲାଗିଥିବା ପାଣିପାଗ ବିଭାଗ ପକ୍ଷରୁ ସୂଚନା ପ୍ରଦାନ କରାଯାଇଛି। ପ୍ରବଳ ଥଣ୍ଡା ଯୋଗୁ ଦେହ ଥରିବା ସହିତ ଦାନ୍ତରେ ଦାନ୍ତ ବାଜିବା ସ୍ଥିତି ସୃଷ୍ଟି ହୋଇଛି।
ବଡ଼ଦିନ ବେଳକୁ ତାପମାତ୍ରା ବଢ଼ିବାର ସମ୍ଭାବନା ରହିଛି ବୋଲି ପାଣିପାଗ ବିଭାଗ ପକ୍ଷରୁ ପୂର୍ବାନୁମାନ କରାଯାଇଛି। ରାଜସ୍ଥାନ, ପଞ୍ଜାବ, ହରିୟାଣା, ମଧ୍ୟପ୍ରଦେଶ, ବିହାରରେ ତାପମାତ୍ରା କ୍ରମଶଃ କମିବାରେ ଲାଗିଛି। ଏହା ସହିତ ଶୀଲହର ଯୋଗୁ ଜୀବନ ଯାତ୍ରା ଠପ୍ ହୋଇଯାଇଛି। ହିମାଚଳ ପ୍ରଦେଶ, ହରିୟାଣା, ଚଣ୍ଡିଗଡ଼ ଏବଂ ଦିଲ୍ଲୀ, ପଶ୍ଚିମ ଉତ୍ତରପ୍ରଦେଶର କେତେକ ସ୍ଥାନରେ ସାଧାରଣ ତାପମାତ୍ରା ମାଇନସ୍ ଡିଗ୍ରୀ ସେଲସିୟସରେ ପହଞ୍ଚିଛି।
ଶୀତ ଲହରୀ ସହିତ ଘନ କୁହୁଡ଼ି ଯୋଗୁ ସମସ୍ୟା ଉପୁଜିବାରେ ଲାଗିଛି। ଲା ନିନା ପ୍ରଭାବରୁ ଚଳିତ ବର୍ଷ ଭାରତରେ ଶୀତଦିନର ତାପମାତ୍ରାରେ ଏଭଳି ହ୍ରାସ ପରିଲକ୍ଷିତ ହୋଇଥିବା ବିଶେଷଜ୍ଞ ମତପୋଷଣ କରିଛନ୍ତି। ଦେଶର ବହୁ ଅଞ୍ଚଳରେ ତୁଷାରପାତ ହେବାରେ ଲାଗିଥିବା ପାଣିପାଗ ବିଭାଗ ପକ୍ଷରୁ ସୂଚନା ପ୍ରଦାନ କରାଯାଇଛି।
