ମୋନାକୋ,୨୯।୧୦(ଏପି): ପୁରୁଷ ୧୦୦ ମିଟର ବିଶ୍ୱ ଚାମ୍ପିୟନ ତଥା ଆମେରିକୀୟ ସ୍ପ୍ରିଣ୍ଟର ଖ୍ରୀଷ୍ଟିଆନ କୋଲମ୍ୟାନ ଡୋପିଂ କଣ୍ଟ୍ରୋଲ ନିୟମର ୩ଟି ଉଲ୍ଲଂଘନ କରି ଦୁଇ ବର୍ଷ ବାସନ୍ଦ ହୋଇଛନ୍ତି। ସେ ୨୦୨୨ ପର୍ଯ୍ୟନ୍ତ ବାସନ୍ଦ ହୋଇଛନ୍ତି ବୋଲି ଟ୍ରାକ୍ ଆଣ୍ଡ ଫିଲ୍ଡ ଆଥଲେଟିକ୍ସ ଇଣ୍ଟିଗ୍ରିଟି ୟୁନିଟ ତରଫରୁ କୁହାଯାଇଛି। ଫଳରେ ସେ ଆସନ୍ତାବର୍ଷ ଆୟୋଜନ ହେବାକୁଥିବା ଟୋକିଓ ଅଲିମ୍ପିକ୍ସ ନ ଖେଳିବା ନିଶ୍ଚିତ ହୋଇଛି।
ଗତ ମେ’ରୁ ପ୍ରତିଯୋଗିତାରୁ ସାମୟିକ ଭାବେ ୨୪ ବର୍ଷୀୟ କୋଲମ୍ୟାନ ବାସନ୍ଦ ହୋଇଥିଲେ। ଏହାର କିଛି ସପ୍ତାହ ପରେ ତାଙ୍କ ତ୍ରୁଟି ସମ୍ପର୍କରେ ସାର୍ବଜନୀନ କରାଯାଇଥିଲା। ୨୦୧୯ରେ ସଂଗ୍ରହ କରାଯାଇଥିବା ନମୁନାରେ ତାଙ୍କର ଏକାଧିକ ତ୍ରୁଟିଥିବା ଜଣାଯାଇଥିଲା। ହୋୟାର ଏବାଉଟ୍ ନିୟମ ଉଲ୍ଲଂଘନ ୧୨ ମାସ ମଧ୍ୟରେ ୩ଥର କଲେ ଜଣେ ଆଥଲେଟ୍ ଦୁଇବର୍ଷ ବାସନ୍ଦ ହୋଇଥାନ୍ତି। ଏବେ ବାସନ୍ଦାଦେଶ ବିରୋଧରେ ସେ କୋର୍ଟ ଅଫ୍ ଆର୍ବିଟ୍ରେଶନ ଫର ସ୍ପୋଟର୍ସ (କାସ)ରେ ଅପିଲ କରିପାରିବେ। କାତାରର ଦୋହାରେ ଅନୁଷ୍ଠିତ ୨୦୧୯ ବିଶ୍ୱ ଚାମ୍ପିୟନଶିପ୍ରେ ସେ ୧୦୦ ଓ ୪X ୧୦୦ ମିଟର ରିଲେ ରେସ୍ରେ ସ୍ବର୍ଣ୍ଣ ପଦକ ଜିତିଥିଲେ। ତେଣୁ ଟୋକିଓ ଅଲିମ୍ପିକ୍ସରେ ସେ ଟାଇଟଲ ହାସଲ କରିବେ ବୋଲି ଆଶା କରାଯାଉଥିଲା। ଲଣ୍ଡନରେ ଅନୁଷ୍ଠିତ ୨୦୧୭ ବିଶ୍ୱ ଚାମ୍ପିୟନଶିପ୍ରେ ସେ ଏହି ଦୁଇଟି ଇଭେଣ୍ଟରେ ରୌପ୍ୟ ପଦକ ଜିତିଥିଲେ। ପୂର୍ବରୁ ସେ ଥରେ ହୋୟାର ଏବାଉଟ୍ ନିୟମ ଉଲ୍ଲଂଘନ କରିଥିଲେ ଓ ଏହାକୁ ବାଦ୍ ଦେବା ଫଳରେ ସେ ଦୌଡିବାକୁ ସକ୍ଷମ ହୋଇଥିଲେ।