ଖଇରା, ୨।୧୧(ଡି.ଏନ.ଏ.): ବାଲେଶ୍ୱର ଜିଲା ଖଇରା ତହସିଲ ଅଧୀନ କୁପାରୀ ରାଜସ୍ବ ଓ ବର୍ତ୍ତନା ରାଜସ୍ବ କ୍ଷେତ୍ର ଅଧୀନରେ ପୂର୍ବରୁ ଖଣି ବ୍ୟବହାର କରୁଥିବା ଲିଜଧାରୀଙ୍କୁ ବିଭ୍ରାନ୍ତିକର ତଥ୍ୟ ପ୍ରଦାନ ପୂର୍ବକ ବେଆଇନ ଅର୍ଥ ଆଦାୟକୁ ନେଇ ଅସନ୍ତୋଷ ବଢିବାରେ ଲାଗିଛି ା ଏକ ଗୋଷ୍ଠୀ ନେତା ପ୍ରଶାସନକୁ ଧରି ଖଣି ଚଲାଇଦେବେ ବୋଲି କହି ବ୍ୟାପକ ଅର୍ଥ ଆଦାୟ କରୁଛନ୍ତି ା କିଛି ଖଣି ମାଲିକ ଏହାକୁ ସହଜ ଭାବେ ଗ୍ରହଣ କରି ଅର୍ଥ ପ୍ରଦାନ କରୁଥିବା ବେଳେ ଆଉ କିଛି ଖଣି ନିଲାମଧାରୀ ଭୟଭୀତ ହୋଇ ଅର୍ଥ ପ୍ରଦାନ କରୁଛନ୍ତି ା
ହେଲେ ସେମାନେ ନିଜ ନାମ ଗୋପନ ରଖି ବେଆଇନ ଭାବେ ଏହି ଅର୍ଥ ଆଦାୟକୁ ବନ୍ଦ କରିବାକୁ ଦାବି କରିଛନ୍ତି।
ଟ୍ରିବ୍ୟୁନାଲର ନିର୍ଦ୍ଦେଶକୁ ଠିକ୍ ଭାବେ ଅନୁଶୀଳନ କରିବା ପରିବର୍ତ୍ତେ ୨୦୧୯ରେ ତତ୍କାଳୀନ ତହସିଲଦାର ଖଣି ଖୋଳାକୁ ସମ୍ପୂର୍ଣ୍ଣ ରୂପେ ବନ୍ଦ କରିବା ସହ ୧୪୪ଧାରା ଜାରି କରିଥିଲେ। ଏବେ ନିକଟରେ ରାଜସ୍ବ ଓ ନିଜସ୍ବ ଜାଗା ଚିହ୍ନଟ କରି ହାତୀ ଚଲାପଥ ପାଇଁ ରାସ୍ତା ଛାଡି ରାଜସ୍ବ ଜମିରେ ଥିବା ଖଣିଗୁଡିକ ବ୍ୟବହାର କରିବାକୁ ମୟୂରଭଞ୍ଜ ଓ ବାଲେଶ୍ୱର ଡିଏଫ୍ଓ ସ୍ତରରେ ରିପୋର୍ଟ ରାଜ୍ୟ ମୁଖ୍ୟ ବନସଂରକ୍ଷକଙ୍କ ନିକଟକୁ ପଠାଯାଇଛି। ସେଠାରୁ ଅନୁମତି ପରେ କେନ୍ଦ୍ରୀୟ ବନ୍ୟଜନ୍ତୁ ସୁରକ୍ଷା ପରିଷଦ ଅନୁମତି ପରେ ଖଣି ଚାଲିପାରେ। ଏଥିପାଇଁ ପ୍ରଶାସନ ସ୍ତରରେ ବିଧି ବ୍ୟବସ୍ଥା ଅନୁଯାୟୀ କାର୍ଯ୍ୟ ହେବ ଏବଂ ସମୟସାପେକ୍ଷ ା ହେଲେ ଏହାକୁ ଆୟୁଧ କରି ଖଣି ଲିଜଧାରୀଙ୍କୁ ଭୁଲ୍ ତଥ୍ୟ ଦେଇ କେତେଜଣ ବ୍ୟକ୍ତି ବ୍ୟାପକ ଅର୍ଥ ଆଦାୟ କରୁଛନ୍ତି ା ଅନ୍ୟୁନ ୬୦ ଖଣି ଲିଜ୍ଧାରୀଙ୍କ ନିକଟରୁ ୬ହଜାର ଲେଖାଏଁ, ପ୍ରତ୍ୟେକ ଟ୍ରାକ୍ଟର ମାଲିକଙ୍କ ନିକଟରୁ ୫ଶହ ଲେଖାଏଁ ଏବଂ କ୍ରସର ମାଲିକଙ୍କ ନିକଟରୁ ୨୫ହଜାର ଲେଖାଏଁ କରି ଆଦାୟ କରାଯାଉଥିବା ଅଭିଯୋଗ ହୋଇଛି। ଯେଉଁମାନେ ନ ଦେବେ ସେମାନଙ୍କର ଖଣି ଲିଜ୍ ବାତିଲ କରାଯିବ ବୋଲି ଚେତାବନୀ ଦିଆଯାଉଥିବା ବହୁ ଖଣି ଲିଜ୍ଧାରୀ ଅଭିଯୋଗ କରିଛନ୍ତି ା ଏହା ବନ୍ଦ କରିବା ସହ ତଦନ୍ତ କରାଯାଇ ବିହିତ ପଦକ୍ଷେପ ଗ୍ରହଣ ପାଇଁ ଦାବି ହୋଇଛି ା