ସମ୍ବଲପୁର,୩ା୧୧(ବ୍ୟୁରୋ): ସମ୍ବଲପୁର ଜିଲାପାଳଙ୍କ ସମ୍ମିଳନୀ କକ୍ଷରେ ଗୁରୁବାର ଜିଲାସ୍ତରୀୟ ରବି ଧାନ ସଂଗ୍ରହ ପ୍ରସ୍ତୁତି ବୈଠକ ଅନୁଷ୍ଠିତ ହୋଇଯାଇଛି। ଜିଲାପାଳ ଅନନ୍ୟା ଦାସ ଏଥିରେ ଅଧ୍ୟକ୍ଷତା କରିଥିଲେ। ଜିଲାର କୁଚିଣ୍ଡା ଓ ରେଢାଖୋଲ ଉପଖଣ୍ଡରେ ଡିସେମ୍ବର ମାସରେ ପର୍ଯ୍ୟାୟକ୍ରମେ ଧାନ କ୍ରୟକେନ୍ଦ୍ର ଖୋଲିବାକୁ ପ୍ରଶାସନ ପକ୍ଷରୁ ନିଷ୍ପତ୍ତି ହୋଇଛି।
ପ୍ରଶାସନ ପକ୍ଷରୁ ପ୍ରଥମେ ଡିସେମ୍ବର ମାସରେ ମଣ୍ଡି ଖୋଲିବାକୁ ନିଷ୍ପତ୍ତି ନିଆଯାଇଥିଲା। ମିଲର୍ସମାନେ ମଧ୍ୟ ନିଜଆଡୁ ଡିସେମ୍ବର ୫ ତାରିଖରେ ମଣ୍ଡି ଖୋଲିବାକୁ ଦାବି କରିଥିଲେ। ହେଲେ ଏହାକୁ ନେଇ ଚାଷୀମାନେ ଅସନ୍ତୋଷ ବ୍ୟକ୍ତ କରିଥିଲେ। ସେମାନେ ଦର୍ଶାଇଥିଲେ, ବିଗତ ବର୍ଷଗୁଡିକରେ ନଭେମ୍ବର ପ୍ରଥମ ସପ୍ତାହରୁ ମଣ୍ଡି ଖୋଲାଯାଉଥିଲା। ହେଲେ ଚଳିତବର୍ଷ ଜାଣିଶୁଣି ଏଭଳି କରାଯାଉଛି। ଚାଷୀମାନେ ପଞ୍ଜୀକରଣ ସମୟରେ ନଭେମ୍ବର ୧ରୁ ୧୫ ଓ ୧୫ରୁ ୩୦ ତାରିଖ ଭିତରେ ବିକ୍ରି କରିବାକୁ ଦିନ ଧାର୍ଯ୍ୟ କରିଥିଲେ। ହେଲେ ସରକାର ମଣ୍ଡି ଖୋଲିବାରେ ବିଫଳ ହୋଇଛନ୍ତି। ଏଥିରେ ମିଲର୍ସମାନଙ୍କ ଲାଭ ହେବ। କୁଚିଣ୍ଡା ଓ ରେଢାଖୋଲ ଅଞ୍ଚଳରେ ପ୍ରାୟ ଧାନ ଅମଳ ହୋଇଯାଇଥିବା ବେଳେ ଜଳସେଚିତ ଅଞ୍ଚଳରେ ମଧ୍ୟ ଅମଳ ଆରମ୍ଭ ହୋଇଯାଇଛି। ଆଉ ପ୍ରାୟ ଏକମାସ ପରେ ମଣ୍ଡି ଖୋଲିବ। ଏତେଦିନ ଅମଳ ଧାନ ଗଚ୍ଛିତ ରଖିବା କଷ୍ଟକର ହେବ ବୋଲି ଚାଷୀମାନେ କହିଥିଲେ। ବହୁ ବାଦ ବିବାଦ ପରେ ଶେଷରେ ନଭେମ୍ବର ୨୫ରେ ସଦର ଉପଖଣ୍ଡରୁ ଧାନ ସଂଗ୍ରହ ଆରମ୍ଭ ହେବ ବୋଲି ସ୍ଥିର ହୋଇଥିଲା।