ଭୁବନେଶ୍ୱର, ୪।୯ (ବନ୍ଦନା ସେଠୀ): ଏକ ସାଧାରଣ ମଧ୍ୟବିତ୍ତ ପରିବାରରୁ ଆସି ନିଜକୁ ପ୍ରତିଷ୍ଠିତ କରିବାରେ ସଫଳ ହୋଇଛନ୍ତି ବର୍ତ୍ତମାନର ବିଏମ୍ସି କମିଶନର ବିଜୟ ଅମୃତା କୁଲାଙ୍ଗେ। ପ୍ରାଥମିକ ଶିକ୍ଷକରୁ ଚାକିରି ଜୀବନ ଆରମ୍ଭ କରିଥିବା କୁଲାଙ୍ଗେ ପରେ ଆଇଏଏସ୍ ପାଇ କଲେକ୍ଟର ହୋଇଥିଲେ। ଏହି ଯାତ୍ରା ସହଜସାଧ୍ୟ ନ ଥିଲେ ବି ଏହାକୁ ସଫଳ କରି ଦେଖାଇଛନ୍ତି ସେ। ବେଷ୍ଟ ଟିଚର୍, ବେଷ୍ଟ ସେଲ୍ଟାକ୍ସ ଇନ୍ସପେକ୍ଟର ଏବଂ ୩ଥର ବେଷ୍ଟ ତହସିଲ୍ଦାର ଆଓ୍ବାର୍ଡ ମଧ୍ୟ ପାଇଛନ୍ତି। ନିଜ ଜୀବନଯାତ୍ରା, ଆଉ ସଂଘର୍ଷମୟ ଅନୁଭୂତିକୁ ନେଇ ସେ ଲେଖିଛନ୍ତି ଆତ୍ମଜୀବନୀ ପୁସ୍ତକ ‘ଆଜିର ଦିନ ମୋର’। ବକୁଳ ଫାଉଣ୍ଡେଶନ ପକ୍ଷରୁ ରବିବାର ଅନୁଷ୍ଠିତ ‘ଇଣ୍ଟରାକ୍ସନ ଓ୍ବିଥ୍ ବିଜୟ ଅମୃତା କୁଲାଙ୍ଗେ’ କାର୍ଯ୍ୟକ୍ରମରେ କମିଶନର କୁଲାଙ୍ଗେ ନିଜ ଅନୁଭୂତି, ଘଟଣାବହୁଳ ଜୀବନ ସମ୍ପର୍କରେ ଆଲୋକପାତ କରିଥିଲେ। ଫାଉଣ୍ଡେଶନ ମୁଖ୍ୟ ସୁଜିତ୍ ମହାପାତ୍ରଙ୍କ ଅଧ୍ୟକ୍ଷତାରେ ବକୁଳ ଲାଇବ୍ରେରିରେ ଆୟୋଜିତ ଏହି କାର୍ଯ୍ୟକ୍ରମରେ ବହୁ ଲୋକଙ୍କ ସହ କମିଶନରଙ୍କ ମା’ ତାରାବାଈ କୁଲାଙ୍ଗେ ଓ ବାପା ଅମୃତା କୁଲାଙ୍ଗେ ଉପସ୍ଥିତ ରହି ପୁଅର ସଫଳ କାହାଣୀ ଶୁଣିଥିଲେ।
ଡାକ୍ତର ହେବାର ଇଚ୍ଛା ଥିଲେ ବି ଆର୍ଥିକ ସମସ୍ୟା ଥିବାରୁ ପ୍ରାଥମିକ ଶିକ୍ଷକ ଭାବେ ଚାକିରି ଜୀବନ ଆରମ୍ଭ କରିଥିଲେ ବିଜୟ ଅମୃତା କୁଲାଙ୍ଗେ। ଏକ ନିପଟ ମଫସଲରେ ତାଙ୍କର ପୋଷ୍ଟିଂ ହୋଇଥିଲା। ସେଠାରେ ଚଳିବା ପାଇଁ ସେ ଏକ ଅଖାରେ ଲୁଗାପଟା ସହିତ ଷ୍ଟୋଭ୍ ଓ ଖାଦ୍ୟ ସାମଗ୍ରୀ ନେଇଯାଇଥିଲେ। ତେବେ ପିଲାଙ୍କ ଭବିଷ୍ୟତ ଗଢ଼ିବା ଭିତରେ ନିଜ ଲକ୍ଷ୍ୟସ୍ଥଳରେ ପହଞ୍ଚତ୍ବାକୁ ଲାଗି ପଡିଥିଲେ। ଶିକ୍ଷକତା ପରେ ସେଲ୍ଟାକ୍ସ ଇନ୍ସପେକ୍ଟର ଓ ପରେ ତହସିଲଦାର ଭାବେ ଦାୟିତ୍ୱ ତୁଲାଇଥିଲେ। ସେ ସମୟରେ ତାଙ୍କ ସମ୍ମୁଖରେ ଥିବା ବିଭିନ୍ନ ସମସ୍ୟା, ଆହ୍ବାନ ସମ୍ପର୍କରେ ମଧ୍ୟ ସେ କହିଥିଲେ। ଏହାପରେ ୟୁପିଏସ୍ସି ପରୀକ୍ଷା ଦେବାପାଇଁ ମନସ୍ଥ କରିଥିଲେ। ତେବେ ଏଥିପାଇଁ ତାଙ୍କୁ ଛୁଟି ନେବାକୁ ମନ୍ତ୍ରୀଙ୍କ ପାଖକୁ ଯିବାକୁ ପଡିଥିଲା। ପ୍ରଥମେ ମନ୍ତ୍ରୀ ମନା କରିଥିଲେ ବି ପରେ ତାଙ୍କୁ ଡାକି ‘ଛୁଟି ନିଅ ମାତ୍ର କଲେକ୍ଟର ହୋଇ ଫେରିବ’ ବୋଲି କହିଥିଲେ, ଯାହାକୁ କୁଲାଙ୍ଗେ ସତ କରି ଦେଖାଇଥିଲେ। ବିନା କୌଣସି କୋଚିଂରେ ପ୍ରଥମ ଥରରେ ହିଁ ସେ ୟୁପିଏସ୍ସି ପାସ୍ କରିଥିଲେ। ସଫଳତା ପାଇବା ପରର ଅନୁଭୂତି କହିବା ସମୟରେ ସେ ଅତ୍ୟନ୍ତ ଭାବବିହ୍ବଳ ହୋଇପଡିଥିଲେ। ଏଥିସହ ତାଙ୍କ ମା’ ବାପାଙ୍କ ବିବାହ କିଭଳି ଏକ ଘଟଣାଚକ୍ରରେ ହୋଇଥିଲା ତାହା ମଧ୍ୟ ସେ ବଖାଣିଥିଲେ। କର୍ମମୟ ଜୀବନ ଭିତରୁ ସମୟ ବାହାର କରି ଫଟୋଗ୍ରାଫି କରିବା ତାଙ୍କର ଅନ୍ୟଏକ ନିଶା। ଖୁବ୍ଶୀଘ୍ର ସେ ତାଙ୍କର ଦ୍ୱିତୀୟ ବହି ଲେଖିବାକୁ ଯାଉଛନ୍ତି ବୋଲି କହିଥିଲେ। ଇଚ୍ଛାଶକ୍ତି ଓ ପରିବାରର ଆଶୀର୍ବାଦ ଥିଲେ କିପରି ସଫଳତା ମିଳେ ତାହା ତାଙ୍କଠାରୁ ଜାଣିବାକୁ ମିଳିଥିଲା।
