ଖୋର୍ଦ୍ଧା ଅଫିସ,୧୫ା୧୦: ଖୋର୍ଦ୍ଧା ଶିଳ୍ପାଞ୍ଚଳ ଫାଣ୍ଡି ଅନ୍ତର୍ଗତ ବରୁଣେଇସ୍ଥିତ ଏକ ଘରୋଇ କଲେଜରେ କାର୍ଯ୍ୟରତ ଜଣେ ଡ୍ରାଇଭରଙ୍କୁ ହତ୍ୟା ପରେ ପେଟ୍ରୋଲ ଢାଳି ଜାଳି ଦିଆଯାଇଥିବା ଅଭିଯୋଗ ହୋଇଛି। ମୃତକ ହେଲେ ନୟାଗଡ଼ ଜିଲା ଫତେଗଡ଼ ଥାନା ଶ୍ୟାମଘନପୁର ଅଞ୍ଚଳର ରାମକୃଷ୍ଣ ପାଢ଼ୀ(୩୧)। ଟାଉନ ଥାନା ପୋଲିସ ସାଇଣ୍ଟିଫିକ୍ ଟିମ୍ ସହ ଘଟଣାସ୍ଥଳରେ ପହଞ୍ଚି କଲେଜ ପାଚେରି ନିକଟ ରାସ୍ତାରୁ ଅର୍ଦ୍ଧଦଗ୍ଧ ଅବସ୍ଥାରେ ମୃତଦେହ ଜବତ କରି ବ୍ୟବଚ୍ଛେଦ ପାଇଁ ଜିଲା ମୁଖ୍ୟ ଚିକିତ୍ସାଳୟକୁ ପଠାଇଛି। ମୃତକଙ୍କ ବାପା ବିରୂପାକ୍ଷଙ୍କ ଅଭିଯୋଗକ୍ରମେ ପୋଲିସ ଏକ ହତ୍ୟା ମାମଲା(ନଂ.୫୦୮/୨୨) ରୁଜୁକରି କଲେଜର ସିକ୍ୟୁରିଟି ଗାର୍ଡ ବାଦଲ ସ୍ବାଇଁଙ୍କୁ ଅଟକ ରଖି ତଦନ୍ତ ଚଳାଇଛି।
ଅନୁଯାୟୀ, ରାମକୃଷ୍ଣ ଉକ୍ତ କଲେଜରେ ଗତ ଦୁଇବର୍ଷ ହେବ ଡ୍ରାଇଭର ଭାବେ କାର୍ଯ୍ୟ କରିଆସୁଥିଲେ। ଏହି ସମୟରେ ବାଦଲଙ୍କ ସହ ରାମକୃଷ୍ଣଙ୍କ ବନ୍ଧୁତା ବଢ଼ିଥିଲା। ଏପରି କି ବାଦଲ ରାମକୃଷ୍ଣଙ୍କ ବାପାଙ୍କଠାରୁ ୧ଲକ୍ଷ ଟଙ୍କା ଧାର ନେଇଥିଲେ। ପରବର୍ତ୍ତୀ ସମୟରେ ଧାର ଟଙ୍କା ମାଗିବାକୁ ନେଇ ବାଦଲ ଓ ରାମକୃଷ୍ଣଙ୍କ ମଧ୍ୟରେ ବଚସା ହୋଇଥିଲା। ଫଳରେ ବନ୍ଧୁତା ଧୀରେ ଧୀରେ ଶତ୍ରୁତାରେ ପରିଣତ ହୋଇଥିଲା। ଧାର ଟଙ୍କାକୁ ନେଇ ଉଭୟଙ୍କ ମଧ୍ୟରେ ଝଗଡ଼ା ହୋଇଥିବା ଏବଂ ଜୀବନରେ ମାରିଦେବାକୁ ବାଦଲ ଧମକ ଦେଉଥିବା ରାମକୃଷ୍ଣ ବାପାଙ୍କୁ ଜଣାଇଥିଲେ। ଗତ ୧୨ତାରିଖ ପରଠାରୁ ରାମକୃଷ୍ଣଙ୍କ ଫୋନ୍ ସୁଇଚ୍ ଅଫ୍ ଆସିବାରୁ ପରିବାର ଲୋକେ ଚିନ୍ତିତ ହୋଇପଡ଼ିଥିଲେ। ବିରୂପାକ୍ଷ କଲେଜକୁ ଆସି ପଚରାଉଚରା ବେଳେ ରାମକୃଷ୍ଣ ଗୁରୁବାରଠାରୁ କଲେଜକୁ ଆସି ନ ଥିବା ଏବଂ ଶୁକ୍ରବାର କଲେଜ ପାଚେରି ନିକଟରୁ ପୋଲିସ ଜବତ କରିଥିବା ଅର୍ଦ୍ଧଦଗ୍ଧ ମୃତଦେହ ତାଙ୍କ ପୁଅର ବୋଲି ଜାଣିବାକୁ ପାଇଥିଲେ। ରାମକୃଷ୍ଣଙ୍କୁ ଏକ ଧାରୁଆ ଅସ୍ତ୍ରରେ ଆକ୍ରମଣ କରି ହତ୍ୟା ପରେ ତାଙ୍କୁ କଲେଜ ନିକଟ ଜଙ୍ଗଲ ରାସ୍ତାକଡ଼ରେ ଫୋପାଡ଼ି ତାଙ୍କ ଦେହରେ ପେଟ୍ରୋଲ ଢାଳି ପୋଡ଼ିଦିଆଯାଇଛି। ଧାର ଟଙ୍କା ମାଗିବାରୁ ତାଙ୍କ ପୁଅଙ୍କୁ ବାଦଲ ହତ୍ୟା କରିଥିବା ବିରୂପାକ୍ଷ ଅଭିଯୋଗ କରିଛନ୍ତି। ଅନ୍ୟପକ୍ଷରେ ପୋଲିସ ସୂଚନା ମୁତାବକ, ଗତ ୧୨ତାରିଖ ରାତିରେ ଉଭୟ କଲେଜ ଛାତରେ ବସିଥିଲେ। ଏହି ସମୟରେ ରାମକୃଷ୍ଣ ଧାର ଟଙ୍କା ଦେବାକୁ ବାଦଲଙ୍କୁ କହିଥିଲେ। ଏନେଇ ଉଭୟଙ୍କ ମଧ୍ୟରେ ବଚସା ହୋଇଥିଲା। ପରେ ବାଦଲ ଏକ ମାରଣାସ୍ତ୍ରରେ ରାମକୃଷ୍ଣଙ୍କୁ ଆକ୍ରମଣ କରିଥିଲେ। ପରେ ତାଙ୍କୁ ଛାତରୁ କଲେଜ ପାର୍ଶ୍ୱ ଜଙ୍ଗଲ ରାସ୍ତାକୁ ଠେଲି ଦେଇଥିଲେ। ପ୍ରମାଣ ନଷ୍ଟ କରିବାକୁ ଶରୀରରେ ପେଟ୍ରୋଲ ଢାଳି ଜାଳିଦେଇଥିଲେ। ଖବରପାଇ ଶୁକ୍ରବାର ସକାଳେ ପୋଲିସ ଘଟଣାସ୍ଥଳରେ ପହଞ୍ଚି ମୃତଦେହ ଜବତ କରିଥିଲା।