ବ୍ରହ୍ମପୁର ଅଫିସ,୨୯ା୯: ବୈଦ୍ୟନାଥପୁର ପୋଲିସ ଜଣେ ଅପହୃତା ଛାତ୍ରୀଙ୍କୁ ଆନ୍ଧ୍ରପ୍ରଦେଶର ହାଇଦ୍ରାବାଦରୁ ଉଦ୍ଧାର କରିଛି। ଛାତ୍ରୀଙ୍କୁ ଅପହରଣ କରି ହାଇଦ୍ରାବାଦରେ ଏକ ଭଡା ଘରେ ରଖି ବଳାତ୍କାର କରିଥିବା ଅଭିଯୋଗରେ ଅଭିଯୁକ୍ତ ଅଳୟ ବେହେରା (୨୮)ଙ୍କୁ ପୋଲିସ ଗିରଫ କରିଛି। କୋର୍ଟରେ ପୀଡିତାଙ୍କ ବୟାନ ରେକର୍ଡ କରାଯାଇଛି। ପରେ ମେଡିକାଲରେ ଉଭୟଙ୍କ ଡାକ୍ତରୀମାଇନା କରାଯାଇଥିଲା। କୋର୍ଟ ନିର୍ଦ୍ଦେଶରେ ପୀଡ଼ିତା ଏବେ ତାଙ୍କ ମା’ଙ୍କ ପାଖରେ ଥିବାବେଳେ ମାମଲା ନଂ.୨୩୩/୨୧ରେ ଅଭିଯୁକ୍ତ ଅଳୟଙ୍କୁ କୋର୍ଟ ଚାଲାଣ କରାଯାଇଛି।
ଘଟଣାରୁ ପ୍ରକାଶ, ଗତ ୫ ତାରିଖରେ ଯୁକ୍ତ ଦୁଇରେ ପଢୁଥିବା ଛାତ୍ରୀ ଜଣକ ନିଖୋଜ ଥିବାନେଇ ବୈଦ୍ୟନାଥପୁର ଥାନାରେ ଅଭିଯୋଗ ହୋଇଥିଲା। ଗତ ୨୪ତାରିଖରେ ଅଭିଯୁକ୍ତ ସମ୍ପୃକ୍ତା ନାବାଳିକା ଛାତ୍ରୀଙ୍କ ସହ ମିଶି ହାଇଦ୍ରାବାଦରେ ଉଠାଇଥିବା ଏକ ଫୋଟୋ ତାଙ୍କ ସାଙ୍ଗ ପାଖକୁ ପଠାଇଥିଲେ। ଉକ୍ତ ଫଟୋଟି ଛାତ୍ରୀଙ୍କ ବାପାଙ୍କୁ ସାଙ୍ଗ ଜଣକ ପଠାଇଥିଲେ। ପୋଲିସ ଏହା ଜାଣିବା ପରେ ତଦନ୍ତ ଆରମ୍ଭ କରିଥିଲା। ସାଇବର ପୋଲିସ ଜରିଆରେ ଅପହରଣକାରୀଙ୍କ ମୋବାଇଲ ନମ୍ବର ଟ୍ରାକିଂ କରି ବୈଦ୍ୟନାଥପୁର ଥାନା ପୋଲିସ ହାଇଦ୍ରାବାଦରେ ପହଞ୍ଚି ଛାତ୍ରୀଙ୍କୁ ଉଦ୍ଧାର କରିବା ସହ ଅପହରଣକାରୀଙ୍କୁ କାବୁ କରିଥିଲା।
