କରୋନା ସଂକ୍ରମଣ ଯୋଗୁ ସମଗ୍ର ବିଶ୍ୱରେ ଲକ୍ଡାଉନ୍ ଜାରିରହିଛି। କେତେକ ସ୍ଥାନରେ ଲକ୍ଡାଉନ୍ ଶେଷ ହୋଇଥିବା ବେଳେ ଆଉ କେଉଁଠି ଦ୍ୱିତୀୟ, ତୃତୀୟ ଥର ଲକ୍ଡାଉନ୍ ଜାରି କରାଯାଇଛି। ହେଲେ ଏମିତି ଏକ ଦେଶ ରହିଛି, ଯେଉଁଠାରେ ଲକ୍ଡାଉନ୍ ନିୟମ ନ ମାନିଲେ ଲୋକଙ୍କୁ ମୃତ୍ୟୁ ଦଣ୍ଡ ଦିଆଯାଉଛି। ଆଶ୍ଚର୍ଯ୍ୟର କଥା ହେଲା ସରକାର ମଧ୍ୟ ଏହି ଦଣ୍ଡକୁ ରୋକିବାରେ ବିଫଳ ହୋଇଛନ୍ତି।
କଲମ୍ବିଆରେ ସରକାରଙ୍କ ପକ୍ଷରୁ ସମଗ୍ର ଦେଶରେ ଲକ୍ଡାଉନ୍ ଜାରିରହିଛି। କିନ୍ତୁ ଏଠାର ଡ୍ରଗ୍ସ ମାଫିଆଆମେ ଅନ୍ୟ ଏକ ଲକ୍ଡାଉନ୍ ଘୋଷଣା କରିଛନ୍ତି। ଯେଉଁମାନେ ଏହି ଲକ୍ଡାଉନ୍କୁ ମାନୁ ନାହନ୍ତି ସେମାନେ ତାଙ୍କୁ ଗୁଳିକରି ହତ୍ୟା କରୁଛନ୍ତି। ବର୍ତ୍ତମାନ ପର୍ଯ୍ୟନ୍ତ ୮ଜଣଙ୍କୁ ଡ୍ରଗ୍ସ ମାଫିଆଆମେ ହତ୍ୟା କରିସାରିଲେଣି।
ଏକ ରିପୋର୍ଟ ଅନୁଯାୟୀ, ସଶସ୍ତ୍ର ଡ୍ରଗ୍ ମାଫିଆ ଗୋଷ୍ଠୀ ଲୋକଙ୍କୁ ହ୍ବାଟ୍ସ ଆପ୍ ଏବଂ ପାମ୍ପଲେଟ ମାଧ୍ୟମରେ ଲକ୍ଡାଉନ୍ ନିୟମକୁ କଡ଼ାକଡ଼ି ଭାବେ ମାନିବାକୁ କହୁଛନ୍ତି। ଏମାନେ ବିଶେଷକରି ଗ୍ରାମାଞ୍ଚଳର ଲୋକଙ୍କ ଉପରେ ଅତ୍ୟାଚାର କରୁଛନ୍ତି। ସବୁଠାରୁ ଖରାପ ଅବସ୍ଥା ରହିଛି ତୁମାକୋ ସହରର। ଏଠାରେ ମାଫିଆ ଏବଂ ପୋଲିସ ମଧ୍ୟରେ ଘଟୁଥିବା ହିଂସା ଖବର ଅଧିକ ସମୟରେ ଶୁଣିବାକୁ ମିଳିଥାଏ। ଡ୍ରଗ ମାଫିଆମାନେ ତୁମାକୋ ସହରବାସୀଙ୍କୁ ସନ୍ଧ୍ୟା ୫ଟା ପରେ ଘରୁ ବାହାରିବାକୁ ବାରଣ କରିଛନ୍ତି। ଏଥିସହ କେହି ନଦୀକୁ ମାଛ ଧରିବାକୁ ଯିବେ ନାହିଁ। ଏଥିରେ ଖିଲାପ କଲେ ଗୁଳିକରି ମାରିଦିଆଯିବ ବୋଲି ଧମକ ଦେଉଛନ୍ତି। ସହରର ସମସ୍ତ ପ୍ରବେଶପଥକୁ ସେମାନେ ସିଲ୍ କରିଦେଇଛନ୍ତି। କାହାକୁ କରୋନା ହୋଇଥିବା ସନ୍ଦେହ ହେଲେ ସେମାନେ ସଙ୍ଗେ ସଙ୍ଗେ ତାଙ୍କୁ ଗୁଳିକରି ହତ୍ୟା କରୁଛନ୍ତି। କଲମ୍ବିଆରେ ବର୍ତ୍ତମାନ ପର୍ଯ୍ୟନ୍ତ ୧.୬୦ ଲକ୍ଷ ଲୋକ କରୋନାରୋ ସଂକ୍ରମିତ ହୋଇଥିବା ବେଳେ ୫୬୨୫ ଜଣଙ୍କ ମୃତ୍ୟୁ ଘଟିଛି।