ନୂଆଦିଲ୍ଲୀ,୧୮ ।୫: ପାକିସ୍ତାନର ସହ ୧୯୭୧ରେ ହୋଇଥିବା ଲୋଙ୍ଗେୱାଲା ଯୁଦ୍ଧର ହିରୋ କର୍ନଲ ଧର୍ମବୀରଙ୍କର ସୋମବାର ଗୁରୁଗ୍ରାମରେ ପରାଲୋକ ହୋଇଛି । ୧୯୯୨-୧୯୯୪ ପର୍ଯ୍ୟନ୍ତ ପଞ୍ଜାବରେ ସେ କମାଣ୍ଡାଣ୍ଟ ଥିଲେ । କେବଳ ସେତିକି ନୁହେଁ ୧୯୯୭ରେ ଆସିଥିବା ବଲିଉଡ ଫିଲ୍ମ ବର୍ଡରରେ ଅକ୍ଷୟ ଖାନ୍ନା କର୍ନଲ ଧର୍ମବୀରଙ୍କ ଭୂମିକା ପ୍ଲେ କରିଥିଲେ ।
୧୯୭୧ରେ ହୋଇଥିବା ଯୁଦ୍ଧରେ କର୍ନଲ ଧର୍ମବୀର ଯୁବ ଅଫିସର ଥିଲେ । ପାକିସ୍ତାନ ସହ ହୋଇଥିବା ଲୋଙ୍ଗେୱାଲା ଯୁଦ୍ଧ ସମୟରେ ତାଙ୍କ ସତର୍କତା ସବୁବେଳେ ମନେ ରହିବ । ୪ ଡିସେମ୍ବରରେ ବର୍ଡର ପାଟ୍ରୋଲିଂ ସମୟରେ ସେ ଭାରତ ଆସୁଥିବା ପାକିସ୍ତାନ ଟ୍ୟାଙ୍କର ଶବ୍ଦ ଶୁଣିଥିଲେ । ସେତେବେଳେ ସେ କ୍ୟାପଟେନ ଥିଲେ । ଏହାର ସୂଚନା ସେ ସିନିୟର ଅଫିସରକଙ୍କୁ ଦେବା ସହ ଅତିରିକ୍ତ ସେନା ମୁତୟନ ପାଇଁ ଦାବି କରିଥିଲେ । ହେଲେ ଅତିରିକ୍ତ ସେନା ନ ଥିବାରୁ ଅଧିକାରୀଙ୍କ ନିର୍ଦ୍ଦେଶ କ୍ରମେ ସେ ଓ ତାଙ୍କର ୨୦-୨୨ ଜଣିଆ ଟିମ ପାକିସ୍ତାନ ସେନାଙ୍କ୍ୁ ସୀମାରୁ ହଟାଇବାକୁ ପ୍ରାଣପଣେ ଚେଷ୍ଟା କରିଥିଲେ । ପରଦିନ ସକାରେ ଭାରତୀୟ ବାୟୁସେନା ତାଙ୍କୁ ସାହାଯ୍ୟ କରିଥିଲା । ଏହି ଯୁଦ୍ଧରେ ପାକିସ୍ତାନରେ ୧୨ ଟ୍ୟାଙ୍କ, ୧୨ ଆଣ୍ଟି ଟ୍ୟାଙ୍କ ମିଶାଇଲ ମାଡରେ ନଷ୍ଟ ହେବାସହ ଭାରତ କିଛି ଟ୍ୟାଙ୍କକୁ ନିଜ କବଜାକୁ ନେଇ ଆସିଥିଲା । ପାକିସ୍ତାନର ପାଖାପାଖି ୧୦୦ ଯାନ ନଷ୍ଟ ହୋଇଯାଇଥିଲା । ଏହାପରେ ଯେତେବେଳେ ଭାରତୀୟ ଡିଭିଜନର ରେଜିମେଣ୍ଟ ଆଗକୁ ଆସିଲେ ସେତେବେଳେ ପାକିସ୍ତାନ ସେନା ପଛଘୁଞ୍ଚା ଦେଇଥିଲେ ବୋଲି କର୍ନଲ ଧର୍ମବୀର ଏକ ସାକ୍ଷାତ୍କାରରେ କହିଥିଲେ ।