ପିପିଲି,୨୬।୯(ସ୍ବ.ପ୍ର.): ସିଫା ନିକଟ ୨ଟି ବ୍ଲକରେ ‘ରଙ୍ଗିନ ମାଛ ଗାଁ’ ପ୍ରତିଷ୍ଠା କରାଯିବ। କୌଶଲ୍ୟାଗଙ୍ଗସ୍ଥିତ ଆଇସିଏଆର୍-ସିଫାରେ ଥିବା ଖୋର୍ଦ୍ଧା କୃଷିବିଜ୍ଞାନ କେନ୍ଦ୍ରରେ ରଙ୍ଗିନ ମାଛଚାଷ ମାଧ୍ୟମରେ ‘ମହିଳାଙ୍କ ଅର୍ଥନୈତିକ ସଶକ୍ତୀକରଣ’ ଶୀର୍ଷକ ୩ଦିନିଆ ପ୍ରଶିକ୍ଷଣ ଶିବିରର ଶନିବାର ଉଦ୍ଯାପନୀ ସଭାରେ ସିଫା ନିର୍ଦ୍ଦେଶକ ଡ. ସରୋଜ ସ୍ବାଇଁ ଯୋଗଦେଇ ଏହା କହିଛନ୍ତି। ସେ କହିଲେ, ସମ୍ପ୍ରତି ରଙ୍ଗିନ ମାଛ ଚାଷ କୃଷି ବ୍ୟବସାୟରେ ପରିଣତ ହୋଇଛି। ଚାଷୀଙ୍କ ଏକ ବିକଳ୍ପ ରୋଜଗାରର ମାଧ୍ୟମ ହୋଇଛି। ରଙ୍ଗିନ ମାଛ ପାଳନ, ଆକ୍ୱାରିୟମ୍ ନିର୍ମାଣ ଓ ଏହାର ଡିଜାଇନ୍, ଆକ୍ୱାଟିକ୍ ପ୍ଲାଣ୍ଟଚାଷ, ଜୀବନ୍ତ ଖାଦ୍ୟ ଚାଷ ଇତ୍ୟାଦି କ୍ଷେତ୍ରରେ ଏହାର ପରିସର ବୃଦ୍ଧି ପାଇଁ ସହାୟକ ହେଉଛି ବୋଲି କହିଥିଲେ। ପ୍ରାରମ୍ଭରେ ଏସ୍ଏମ୍ଏସ୍ ଅଜୟ ଦାଶ ସ୍ବାଗତ ଭାଷଣ ଦେଇଥିଲେ। ଶିବିରରେ ରଙ୍ଗିନ ଜଳଜୀବ ପାଳନ ଏବଂ ଏଥିରେ ଉଦ୍ୟୋଗ ପ୍ରତିଷ୍ଠା, ପାଣିର ଗୁଣାମତ୍କ ମାନ ପରିଚାଳନା, ରଙ୍ଗିନ ମାଛଚାଷ ଓ ପ୍ରଜନନ, ଅଣ୍ଡା ପ୍ରଦାନକାରୀ ମାଛଙ୍କ ପ୍ରଜନନ ଏବଂ ଖାଦ୍ୟ ପ୍ରସ୍ତୁତି ଉପରେ ପ୍ରଶିକ୍ଷଣ ଦିଆଯାଇଥିଲା। ସିଫା ବୈଜ୍ଞାନିକ ଡ. ସୁନୀଲ ଅଇଲ ଆକ୍ୱାରିୟମ୍ ନିର୍ମାଣ ଉପରେ ସ୍ବତନ୍ତ୍ର ପ୍ରଶିକ୍ଷଣ ପ୍ରଦାନ କରିଥିଲେ। ବାଲିଅନ୍ତା ଓ ଭୁବନେଶ୍ୱର ବ୍ଲକ୍ର କୃଷିମିତ୍ର, ପ୍ରାଣୀମିତ୍ର ଆଦି ୧୫ ଜଣ ସମ୍ପ୍ରସାରଣ କର୍ମଚାରୀ ଏହି ପ୍ରଶିକ୍ଷଣ ନେଇଥିଲେ। କୃଷିବିଜ୍ଞାନ କେନ୍ଦ୍ର ମୁଖ୍ୟ ଡ. ଏସ୍. ଏସ୍. ଗିରିଙ୍କ ତତ୍ତ୍ୱାବଧାନରେ ଏବଂ ସୁକାନ୍ତି ବେହେରା, ଡ. ହରପ୍ରିୟା ନାୟକ ଓ ପ୍ରଜ୍ଞାନ ରଞ୍ଜନ ସାହୁଙ୍କ ସଂଯୋଜନାରେ କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା।