ମୁମ୍ବାଇ: ପ୍ରସିଦ୍ଧ ହାସ୍ୟ ଅଭିନେତ୍ରୀ ଭାରତୀ ସିଂ ଏବଂ ହର୍ଷ ଲାମ୍ବାଚିଆ ଖୁବ୍ଶୀଘ୍ର ପ୍ରଶଂସକଙ୍କୁ ଏକ ଖୁସି ଖବର ଦେବାକୁ ଯାଉଛନ୍ତି। ପ୍ରାୟତଃ ତାଙ୍କ ପ୍ରଶଂସକମାନେ ଭାରତୀଙ୍କୁ ପଚାରନ୍ତି ଯେ, ସେ କେବେ ଭଲ ଖବର ଦେବେ? ତେବେ ଭାରତୀ ପ୍ରଶଂସକମାନଙ୍କୁ ଭଲ ଖବର ଦେବାକୁ ଯାଉଛନ୍ତି। ହଁ, ଭାରତୀ ଏବଂ ହର୍ଷଙ୍କ ଘରେ ଖୁବ୍ଶୀଘ୍ର କୁଆଁକୁଆଁ ଡାକ ଶୁଭିବ।
ଏକ ସାକ୍ଷାତକାରରେ ଉଭୟଙ୍କ ଜଣେ ଘନିଷ୍ଠ ବନ୍ଧୁ ଭାରତୀ ଗର୍ଭବତୀ ଥିବା ଖବରକୁ ନିଶ୍ଚିତ କରିଛନ୍ତି। ବର୍ତ୍ତମାନ ସେ ଅଧିକ ବାହାରକୁ ଯାଉନାହାନ୍ତି ଏବଂ ସବୁକିଛି ବହୁତ କମ୍ ପ୍ରୋଫାଇଲରେ ରଖାଯାଇଛି। ଭାରତୀ କପିଲ ଶର୍ମାଙ୍କ ଶୋ’ରୁ ବି କିଛିଦିନ ବିରତି ନେଇଛନ୍ତି, ତେବେ ସେ ଖୁବ୍ଶୀଘ୍ର ଶୋ’କୁ ଫେରିବେ ବୋଲି କୁହାଯାଉଛି।
ଅନ୍ୟପକ୍ଷରେ ଏହି ଖବରକୁ ଭାରତୀ ଗ୍ରହଣ କରିନାହାନ୍ତି କି ମନା ବି କରିନାହାନ୍ତି। ସେ କହିଛନ୍ତି, ‘ମୁଁ ଏହାକୁ ଅସ୍ବୀକାର କରିବି ନାହିଁ କିମ୍ବା ନିଶ୍ଚିତ କରିବି ନାହିଁ। କିନ୍ତୁ ଯେତେବେଳେ ଉପଯୁକ୍ତ ସମୟ ଆସିବ, ମୁଁ ଖୋଲାଖୋଲି ଭାବରେ ଏହା ବିଷୟରେ କହିବି। ମୁଁ ଏହାକୁ ଲୁଚାଇ ପାରିବି ନାହିଁ, ଏହା ଲୁଚାଇବା କଥା ନୁହେଁ। ତେଣୁ ଯେତେବେଳେ ବି ମୁଁ ଏହାକୁ ପ୍ରକାଶ କରିବାକୁ ଚାହେଁ, ଏହାକୁ ସର୍ବସାଧାରଣରେ ପ୍ରକାଶ କରିବି।
