ରାୟପୁର,୪।୧୧: ଜଣେ ସହକାରୀ ପ୍ରଫେସରଙ୍କ ବିରୋଧରେ ଅଣାଯାଇଥିବା ଯୌନ ନିର୍ଯାତନା ଏଫଆଇଆର୍କୁ ଖଣ୍ଡନ କରି ଛତିଶଗଡ ହାଇକୋର୍ଟ କହିଛନ୍ତି, ‘ଯଦି ଛୁଟି ଚାହୁଁଛ, ଏକୁଟିଆ ଦେଖା କର’ ମନ୍ତବ୍ୟକୁ ଯୌନ ନିର୍ଯାତନା ସୂଚକ ଭାବେ ଗ୍ରହଣ କରାଯାଇ ପାରିବ ନାହିଁ।
ଭାରତୀୟ ଦଣ୍ଡବିଧି ସଂହିତା ଧାରା ୩୫୪-କ ଅନ୍ତର୍ଗତ ପ୍ରଫେସରଙ୍କ ବିରୋଧରେ ଅଭିଯୋଗ ଅଣାଯାଇଥିଲା। ଏନେଇ ପ୍ରଫେସରଙ୍କ ଆଇନଜୀବୀ ଯୁକ୍ତି ବାଢ଼ିଥିଲେ ଯେ, ଏକ୍ଷେତ୍ରରେ କୌଣସି ଶାରୀରିକ ସମ୍ପର୍କ କିମ୍ବା ଏସମ୍ପର୍କିତ କୌଣସି କାର୍ଯ୍ୟ ସମ୍ପୃକ୍ତ ପ୍ରଫେସର କରି ନାହାନ୍ତି। ଅବା ସେ ଯୌନ ସମ୍ପର୍କ ରଖିବା ଲାଗି ଅନୁରୋଧ ମଧ୍ୟ କରି ନ ଥିବା ଆଇନଜୀବୀ ଦର୍ଶାଇଥିଲେ। ତେଣୁ, ଆଇପିସିର ଧାରା ୩୫୪-କ ଅନୁଯାୟୀ କୌଣସି ଅପରାଧ ଅଭିଯୁକ୍ତଙ୍କ ବିରୋଧରେ ପ୍ରମାଣିତ ହେଉ ନାହିଁ।
ଏହି ପ୍ରସଙ୍ଗରେ ଅଭିଯୋଗର ବିଷୟବସ୍ତୁକୁ ବିଚାର କରି ବିଚାରପତି ନରେନ୍ଦ୍ର କୁମାର ବ୍ୟାସଙ୍କ ନେତୃତ୍ୱରେ ଗଠିତ ଖଣ୍ଡପୀଠ କହିଛନ୍ତି, ଯଦି ଆମେ ଅଭିଯୋଗର ବିଷୟବସ୍ତୁକୁ ଦେଖିବା ଯେଉଁଥିରେ ଅଭିଯୋଗକାରୀ ଉଲ୍ଲେଖ କରିଛନ୍ତି, ଅଭିଯୁକ୍ତ କହିଛନ୍ତି ଯେ ‘ ମ୍ୟାଡାମ୍ ଯଦି ତୁମେ ଛୁଟି ଚାହୁଁଛ, ମୋତେ ଏକୁଟିଆ ସାକ୍ଷାତ କର’। ଏହି ମନ୍ତବ୍ୟରୁ ଅନୁମାନ କରାଯାଇପାରିବ ନାହିଁ ଯେ ତାଙ୍କ ଉପରେ କୌଣସି ଯୌନ ନିର୍ଯାତନା ହୋଇଛି। ସେମାନଙ୍କ ବାର୍ତ୍ତାଳାପକୁ ନେଇ ଅଭିଯୋଗକାରୀଙ୍କ ଦ୍ୱାରା ଦାଖଲ ହୋଇଥିବା ଅଭିଯୋଗ ଆଇପିସିର ଧାରା ୩୫୪ (କ) (୪) ଅନୁଯାୟୀ ଅଭିଯୁକ୍ତଙ୍କୁ ଦୋଷୀ ସାବ୍ୟସ୍ତ କରିବା ପାଇଁ ପର୍ଯ୍ୟାପ୍ତ ପ୍ରମାଣ ନୁହେଁ।
ଅନୁସୂଚିତ ଜାତି ଏବଂ ଅନୁସୂଚିତ ଜନଜାତି (ପ୍ରିଭେନସନ ଅଫ ଆଟ୍ରୋସିଟିସ) ଆକ୍ଟ, ୧୯୮୯ ର ଧାରା ୩ (୧) (୧୨) ଅନୁଯାୟୀ କୋର୍ଟ ଏଫଆଇଆର୍କୁ ଖଣ୍ଡନ କରିଛନ୍ତି। ଅଭିଯୁକ୍ତ ପୀଡିତାଙ୍କୁ ଯୌନ ଶୋଷଣ କରିବା ଲାଗି ଏଭଳି କହିଥିବା ପ୍ରମାଣିତ ହୋଇ ପାରୁ ନାହିଁ କୋର୍ଟ କହିଛନ୍ତି। ସେ କହିଛନ୍ତି ଯେ, ଅଭିଯୋଗକାରୀ ଅନୁସୂଚିତ ଜାତି ସମ୍ପ୍ରଦାୟର ଏବଂ ଅଭିଯୁକ୍ତ ଭିନ୍ନ ସମ୍ପ୍ରଦାୟର। ଏହା ବ୍ୟତୀତ ଦାଖଲ ହୋଇଥିବା ଅଭିଯୋଗରେ ଅନ୍ୟ କୌଣସି ରେକର୍ଡରେ ନାହିଁ। ଅନୁସୂଚିତ ଜାତି ସମ୍ପ୍ରଦାୟର ହୋଇଥିବାରୁ ଅଭିଯୋଗକାରୀ ଅଭିଯୁକ୍ତଙ୍କ ବିରୋଧରେ ଏଭଳି ମାମଲା ଆଣିଥିବା କୋର୍ଟ କହିଛନ୍ତି।