ନୂଆଦିଲ୍ଲୀ, ୩।୨: କୃଷି ଆଇନକୁ ବିରୋଧରେ ଦେଶରେ ବିଭିନ୍ନ ଚାଷୀ ସଂଗଠନ ପକ୍ଷରୁ ଆନ୍ଦୋଳନ ଜାରି ରହିଛି। ଆନ୍ଦୋଳନକୁ ସମର୍ଥନ କରି ଆମେରିକା ପପ୍ ଷ୍ଟାର ରିହାନା, ପରିବେଶକର୍ମୀ ଗ୍ରେଟା ଥନବର୍ଗ, ପରିବେଶ କର୍ମୀ ଲିସିପ୍ରିୟା କଙ୍ଗୁଜମ୍, ପରିବେଶକର୍ମୀ ଜେମି ମାର୍ଗେଲିନ୍ ଏବଂ କାନାଡ଼ାର ୟୁଟ୍ୟୁବର ତଥା ଅଭିନେତ୍ରୀ ଲିଲିଙ୍କ ସମେତ ଅନ୍ୟମାନେ ନିଜ ନିଜ ଟୁଇଟର ହ୍ୟାଣ୍ଡେଲରେ ଭିନ୍ନ ଭିନ୍ନ ମତ ପୋଷଣ କରିଛନ୍ତି। ଏହାକୁ ନେଇ ଭାରତୀୟ ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ବୁଧବାର ଏକ ବିବୃତ୍ତି ଜାରି କରାଯାଇଛି। କୃଷକ ଆନ୍ଦୋଳନ ନେଇ ବିଦେଶରୁ ଟିପ୍ପଣୀ ସହ୍ୟ କରାଯିବ ନାହିଁ ବୋଲି ଏଥିରେ ଉଲ୍ଲେଖ ହୋଇଛି। ଆନ୍ଦୋଳନକୁ ସମର୍ଥନ କରି କୌଣସି ଆଜେଣ୍ଡା ଜାରି କରାଇବା ଗ୍ରହଣୀୟ ନୁହେଁ। ମନ୍ତବ୍ୟ ଦେବା ପୂର୍ବରୁ ତଥ୍ୟ ଏବଂ ପରିସ୍ଥିତିର ଯାଞ୍ଚ୍ କରାଇବା ଉପରେ ବହିର୍ବ୍ୟାପାର ମନ୍ତ୍ରଣାଳୟ ପକ୍ଷରୁ ଗୁରୁତ୍ୱାରୋପ କରାଯାଇଛି। ଏଭଳି ଏକ ସମ୍ବେଦନଶୀଳ ପ୍ରସଙ୍ଗରେ ଟୁଇଟ୍ ଅବା ହାଶ୍ଟ୍ୟାଗ୍ କରିବା ଦାୟିତ୍ୱପୂର୍ଣ୍ଣ ପଦକ୍ଷେପ ନୁହେଁ ବୋଲି ମନ୍ତ୍ରଣାଳୟ କହିଛି।