ଭୁବନେଶ୍ୱର,୨/୮: କ୍ରମାଗତ ଅନ୍ତର୍ଜାତୀୟ ବଜାରରେ ତୈଳ ଦର ହ୍ରାସ ପାଉଛି। ତା’ର ପ୍ରଭାବ ଭାରତୀୟ ବଜାରରେ ମଧ୍ୟ ଦେଖିବାକୁ ମିଳୁଛି। ବିଶେଷକରି ଗତ କିଛି ମାସ ହେବ ଦେଶରେ ତୈଳ ଉତ୍ପାଦଗୁଡ଼ିକର ମୂଲ୍ୟ ପରିବର୍ତ୍ତନ ହେଉଛି। ଏପରିକି କମର୍ସିଆଲ ଗ୍ୟାସ୍ ଏବଂ ବିମାନ ଇନ୍ଧନ ମୂଲ୍ୟ ହ୍ରାସ ପାଇଥିବା ବେଳେ ଘରୋଇ ଗ୍ୟାସ୍ ଏବଂ ପେଟ୍ରୋଲ- ଡିଜେଲର ମୂଲ୍ୟ ସ୍ଥିର ରହିଛି। ଦେଶର ପ୍ରମୁଖ ତୈଳ ବିପଣନ କମ୍ପାନୀର ସୂଚନା ଅନୁଯାୟୀ ଅଗଷ୍ଟ୧ ତାରିଖ ସୋମବାରଠାରୁ କମର୍ସିଆଲ ଗ୍ୟାସ୍ (୧୯ କି.ଗ୍ରା.) ଏଲ୍ପିଜି ସିଲିଣ୍ଡର ଉପରେ ୩୬ ଟଙ୍କା ହ୍ରାସ ପାଇଥିବା ବେଳେ ବିମାନ ଇନ୍ଧନର ମୂଲ୍ୟ ମଧ୍ୟ ୧୨% ହ୍ରାସ ଘଟିଛି। ଏହି ଦର ହ୍ରାସ ଯୋଗୁ ନୂଆଦିଲ୍ଲୀରେ କମର୍ସିଆଲ ଏଲ୍ପିଜି ସିଲିଣ୍ଡର ମୂଲ୍ୟ ୨୦୧୨.୫୦ ଟଙ୍କା ପରିବର୍ତ୍ତେ ୧,୯୭୬.୫୦ ଟଙ୍କାରେ ବିକ୍ରୟ କରାଯିବ। ସେହିପରି ଦେଶର ଅନ୍ୟ ପ୍ରମୁଖ ମହାନଗର ମୁମ୍ବାଇରେ ୧୯ କେଜି ସିଲିଣ୍ଡରର ଦର ୧୯୭୨.୫୦ ଟଙ୍କା ବଦଳରେ ୧୯୩୬.୫୦ ଟଙ୍କାରେ ପହଞ୍ଚତ୍ଛି। ସେହିଭଳି କୋଲକାତାରେ ଏହି ସିଲିଣ୍ଡର ଦର ୨୧୩୨ ଟଙ୍କା ପରିବର୍ତ୍ତେ ୨୦୯୫.୫୦ ଟଙ୍କାରେ ଏବଂ ଚେନ୍ନାଇରେ ୨୦୪୧ ଟଙ୍କାରେ ବିକ୍ରି କରାଯିବ ବୋଲି କମ୍ପାନୀ ପକ୍ଷରୁ ସୂଚନା ଦିଆଯାଇଛି। ଅପରପକ୍ଷରେ ଏଟିଏଫ୍ର ମୂଲ୍ୟ କିଲୋଲିଟର ପିଛା ୧୬,୨୩୨.୩୬ କିମ୍ବା ୧୧.୭୫% ହ୍ରାସ ପାଇ ୧୨୧,୯୧୫.୫୭ ଟଙ୍କାରେ ରହିଛି।