ଭୁବନେଶ୍ୱର,୧୩ା୯(ବ୍ୟୁରୋ):ଆସନ୍ତା ୧୬ ତାରିଖରେ କୁଆଖାଇ ନଦୀକୂଳ ଜରିପାଟଣା ନିକଟସ୍ଥ ବାଲିଯାତ୍ରା ପଡ଼ିଆରେ ହେବାକୁ ଥିବା ସୂର୍ଯ୍ୟକିରଣ ଶୋ’ ପାଇଁ ପ୍ରସ୍ତୁତି ଆରମ୍ଭ ହୋଇଛି। ଏଥିପାଇଁ ସୋମବାର ଗ୍ରାଉଣ୍ଡରେ ପୋଲିସ କମିଶନର ଏବଂ ଡିସିପି ସ୍ଥିତି ପରଖିଛନ୍ତି। ପ୍ରଦର୍ଶନୀ ସମୟରେ ସୁରକ୍ଷା ଏବଂ ଟ୍ରାଫିକ୍ ବ୍ୟବସ୍ଥା କିପରି ହେବ ସେନେଇ ପ୍ରସ୍ତୁତି ମଧ୍ୟ ଚାଲିଛି।
ଆଜାଦୀ କା ଅମୃତ ମହୋତ୍ସବ ଉପଲକ୍ଷେ ଆୟୋଜିତ ହେବାକୁ ଥିବା ବାୟୁସେନାର ସୂର୍ଯ୍ୟକିରଣ ଏୟାର ଶୋ’ ପାଇଁ ଏନ୍-୩୨ ବିମାନରେ ଇଣ୍ଡକ୍ସନ ଟିମ୍ ଭୁବନେଶ୍ୱର ଆସିଥିବାବେଳେ ୧୩ ତାରିଖରେ ୧୧ଟି ହକ୍ ବିମାନ ଆସିବ। ଏଥିରେ ୯ଟି ହକ୍ ବିମାନ ଅଂଶଗ୍ରହଣ କରିବ ଓ ୨ଟି ଷ୍ଟାଣ୍ଡବାଇ ରହିବ।
ଦର୍ଶକ ୪୫ ମିନିଟ୍ର ଏହି ଚିତ୍ତାକର୍ଷକ ଶୋ’ ଦେଖିବେ। ପାଣିପାଗକୁ ଦୃଷ୍ଟିରେ ରଖି ଯେକୌଣସି ଗୋଟିଏ ସମୟରେ ଏହି ଶୋ’ କରାଯିବ। ୪୫ ମିନିଟ୍ର ଏହି ଶୋ’ ପାଇଁ ପୂର୍ବାହ୍ନ ୧୦ରୁ ୧୧ଟା ଏବଂ ଅପରାହ୍ନ ୪ଟା ୧୫ରୁ ୫ଟା ୧୫ ସମୟ ଧାର୍ଯ୍ୟ କରାଯାଇଛି। ଏୟାର ଶୋ’ରେ ୮୦ରୁ ୯୦ ଜଣ ସଦସ୍ୟ ସାମିଲ ହେବେ। ଏଥିପାଇଁ ଏୟାର ଟ୍ରାଫିକ୍ କଣ୍ଟ୍ରୋଲର ଅନୁମତି ଦେବ। ଏହି ଶୋ’ ଦେଖିବା ପାଇଁ ରାଜ୍ୟପାଳ ଓ ମୁଖ୍ୟମନ୍ତ୍ରୀ ଯିବାର କାର୍ଯ୍ୟକ୍ରମ ରହିଛି।
ହାଇଟେକ୍ ଛକରୁ ଜରିପାଟଣା ରାସ୍ତାରେ କିଭଳି ଜାମ୍ ନ ହେବ ସେନେଇ ଟ୍ରାଫିକ୍ ପୋଲିସ ନଜର ରଖିବ। କୁଆଖାଇ ନଦୀପଠା ଓ ଅପର ପଟ ସୁରକ୍ଷା ଲାଗି ପୋଲିସ କର୍ମଚାରୀ ମୁତୟନ ହେବେ। ସେହିଭଳି ପୂର୍ତ୍ତ ବିଭାଗ ମାଟି ପକାଇ ସମତୁଲ କରିବା ସହ ପ୍ରସ୍ତୁତି ଜାରି ରଖିଛି। ଏୟାର ଶୋ’ ପାଇଁ ୧୫ ତାରିଖରେ ହେବ ଅଭ୍ୟାସ। ଭୁବନେଶ୍ବରରେ ଏପରି ଶୋ’ ହେଉଥିବାରୁ ଜରିପାଟଣା ଅଞ୍ଚଳ ଲୋକଙ୍କ ମନରେ ଉତ୍ସାହ ଦେଖିବାକୁ ମିଳିଛି। ଅନ୍ୟପକ୍ଷେ ଆସନ୍ତା ୧୮ ତାରିଖରେ ପୁରୀ ବେଳାଭୂମିରେ ଏହି ଶୋ’ ହେବ। ଭୁବନେଶ୍ବର, ପୁରୀ ପରେ ଆସାମର ଗୁଆହାଟୀରେ ମଧ୍ୟ ଏହି ଶୋ’ ଆୟୋଜନ କରାଯିବ।