ନୂଆଦିଲ୍ଲୀ,୧୩।୩: ଦ ନଜ୍ ସେଂଟର୍ ଫର୍ ସୋସିଆଲ ଇନୋଭେଶନ ଓ ଆଶୀର୍ବାଦ ପାଇପ୍ସ ପକ୍ଷରୁ ଭାରତ ସରକାରଙ୍କ ମୁଖ୍ୟ ବୈଜ୍ଞାନିକ ପରାମର୍ଶଦାତାଙ୍କ କାର୍ଯ୍ୟାଳୟ ସହଭାଗିତାରେ ଆଶୀର୍ବାଦ ୱାଟର ଚ୍ୟାଲେଞ୍ଜର ୭ଜଣ ଫାଇନାଲିଷ୍ଟଙ୍କ ନାମ ନିକଟରେ ଘୋଷଣା କରାଯାଇଛି। ବିଶେଷ କରି ଶ୍ରେଷ୍ଠ ୨୫ ୱାଟର ଇନୋଭେଟରଙ୍କ ମଧ୍ୟରୁ ଉକ୍ତ ଫାଇନାଲିଷ୍ଟମାନଙ୍କୁ ଚୟନ କରାଯାଇଛି।
ସୂଚନାଯୋଗ୍ୟ ୨୦୨୨ରେ ୧୪୦ଜଣ ଆବେଦନକାରୀଙ୍କ ମଧ୍ୟରୁ ଉପରୋକ୍ତ ପ୍ରତିଯୋଗୀଙ୍କୁ ସର୍ଟଲିଷ୍ଟ କରାଯାଇଥିଲା। ଯେଉଁମାନଙ୍କ ଉଦ୍ଭାବନଗୁଡିକ ମଧ୍ୟରେ ୱାଟର ଲିକେଜ୍ ଓ ବିତରଣ ପାଇଁ ସମାଧାନ, ବର୍ଜ୍ୟଜଳ ବିଶୋଧନ, ଜଳ ବିଶୁଦ୍ଧିକରଣ, ଜଳର ବାୟୁମଣ୍ଡଳୀୟ ଉପତ୍ାଦନ ଓ ଜଳ ଇକୋସିଷ୍ଟମଗୁଡିକୁ ସକ୍ଷମ କରିବା ଆଦି ସାମିଲ ରହିଥିଲା। ଏହି ସମାଧାନଗୁଡିକ ମଧ୍ୟରୁ ଅନେକ ଆର୍ଟିଫିସିଆଲ ଇଂଟେଲିଜେନ୍ସ ଓ ମେଶିନ୍ ଲର୍ଣ୍ଣିଂ ଭଳି ଟେକ୍ନୋଲୋଜିଗୁଡିକର ବ୍ୟବହାର କରିଛନ୍ତି। ଏପରିକି ଆଗାମୀ ଦିନରେ ଏହା ବେଶ ମୂଲ୍ୟସାପେକ୍ଷ ହେବା ପାଇଁ ମଧ୍ୟ ଲକ୍ଷ୍ୟ ରଖିଛନ୍ତି। ଏ ଗୁଡିକ ଦେଶବ୍ୟାପୀ ଜଳର ଅଭାବ ଥିବା ଘରଗୁଡିକ ପାଇଁ ସମ୍ଭାବ୍ୟ ରୂପେ ଉପଯୋଗୀ ଅଟେ।
ଏ ସମ୍ପର୍କରେ ଦ ନଜ୍ ପ୍ରାଇଜ୍ର ନିର୍ଦ୍ଦେଶିକା କନିଷ୍କା ଚାଟର୍ଜୀ କହିଛନ୍ତି, ଜଳ କ୍ଷେତ୍ରରେ ଥିବା ବୃହତ୍ ଇକୋସିଷ୍ଟମକୁ ଯେଉଁଭଳି ଭାବେ ଦ/ନଜ୍ ଇନ୍ଷ୍ଟିଚ୍ୟୁଟ୍ ସମର୍ଥନ କରିବା ପାଇଁ ଆଗେଇ ଆସିଛି ତାହା ପ୍ରେରଣାଦାୟକ ଓ ଉତ୍ସାହଜନକ ଅଟେ। ସେହିଭଳି ଆଶୀର୍ବାଦ ପାଇପ୍ସର ପରିଚାଳନା ନିର୍ଦ୍ଦେଶକ ଦୀପକ ମେହୋତ୍ରା କହିଛନ୍ତି, ଜଳ ସୁରକ୍ଷା ଆମ ଦେଶ ପାଇଁ ଏକ ପ୍ରମୁଖ ସମସ୍ୟା ଏବଂ ଆଶୀର୍ବାଦ ପାଇପ୍ସ ସ୍ଥାୟୀ ସମାଧାନ ସନ୍ଧାନ କରିବା ଦିଗରେ ପ୍ରତିବଦ୍ଧ ରହିଛି।
