ବ୍ରହ୍ମପୁର,୨୪ା୭(ସୁବାସ ଚନ୍ଦ୍ର ପାଢ଼ୀ): ସାଇବର ଠକ ନିଜର ମାୟା ଜାଲରେ ସାଧାରଣ ଲୋକଙ୍କୁ ଫସାଇ ଠକି ଚାଲିଛନ୍ତି। ନୂଆ ନୂଆ ତରିକାରେ ପ୍ରଥମେ ଲୋକଙ୍କ ବିଶ୍ୱାସ ହାସଲ କରି ପରେ ଲୁଟୁଛନ୍ତି। ଗଞ୍ଜାମ ଜିଲା ତଥା ବ୍ରହ୍ମପୁର ସହରରେ ଏଭଳି ଏକାଧିକ ଘଟଣା ନଜରକୁ ଆସୁଛି। ଚଳିତବର୍ଷ ଜୁଲାଇ ୨୨ ତାରିଖ ସୁଦ୍ଧା ସାଇବର୍ ଠକ ୧୯ଟି ଠକେଇ କରି ଜନସାଧାରଣଙ୍କଠାରୁ ଏକ କୋଟିରୁ ଊଦ୍ଧର୍ବ ଟଙ୍କା ଲୁଟି ସାରିଲେଣି। ଯାହାକି ଏବେ ଚିନ୍ତାର ବିଷୟ ହୋଇଛି।
ବିଟ୍ କଏନ୍ ଓ କ୍ରିପ୍ଟୋ କରେନ୍ସିରେ ବିନିଯୋଗ କଲେ ଅଧିକ ଲାଭର ଲୋଭ ଦେଖାଇ ସାଇବର୍ ଠକ ଲକ୍ଷାଧିକ ଟଙ୍କା ଲୁଟି ସାରିଲେଣି। ବ୍ରହ୍ମପୁର ସହରରେ ଚଳିତ ମାସ ଏଭଳି ୩ଟି ବଡ଼ଧରଣର ଠକେଇ ଘଟଣା ସାମ୍ନାକୁ ଆସିଛି। ଗତ ୧୦ ତାରିଖରେ ଗାନ୍ଧୀନଗର ଅଞ୍ଚଳର ଜଣେ ମହିଳା ବିଟ କଏନ ଲୋଭରେ ପଡ଼ି ୨ଲକ୍ଷ ୭୨ହଜାର ଟଙ୍କା ହରାଇଥିଲେ। ସେହିପରି ୧୫ ତାରିଖରେ ବିଟ କଏନ ଲୋଭରେ ପଡ଼ି ଦିଗପହଣ୍ଡି ବ୍ଲକ କୁଶପଡ଼ା ଗ୍ରାମର ଜଣେ ଯୁବକ ୧୧ଲକ୍ଷ ୪ହଜାର ୪୦୧ ଟଙ୍କା ହରାଇଥିଲେ। ୧୭ ତାରିଖରେ ଗୋଷାଣିନୁଆଗାଁ ଥାନା ଅନ୍ତର୍ଗତ ଗଣେଶ ନଗର ଅଞ୍ଚଳର ଜଣେ ବ୍ୟକ୍ତି ବିଦେଶୀ ବନ୍ଧୁ ପାଖରୁ ଉପହାର ପାଇବା ଲାଳସାରେ ୨ଲକ୍ଷ ୫ହଜାର ଟଙ୍କା ହରାଇଛନ୍ତି। ଗତ ଜୁନରେ ଜଣେ ଯୁବତୀ ୧୭ଲକ୍ଷ ଟଙ୍କା ହରାଇଥିବା ବେଳେ ଆଉ ଏକ ମାମଲାରେ ଅନଲାଇନ ରୋଜଗାର ଲୋଭରେ ପଡ଼ି ଜଣେ ଡାକ୍ତର ୧୭ଲକ୍ଷ ୮୨ହଜାର ଟଙ୍କା ହରାଇଥିଲେ। ସାଇବର୍ ଠକ ପ୍ରଥମେ ଫୋନ୍ କରି ଲୋକଙ୍କ ବିଶ୍ୱାସ ହାସଲ କରୁଛନ୍ତି। ନିଜକୁ ବ୍ୟାଙ୍କ ଅଧିକାରୀ, ବିଭିନ୍ନ ସଂସ୍ଥାର ଅଧିକାରୀ ପରିଚୟ ଦେଉଛନ୍ତି। ଅନଲାଇନରେ ରୋଜଗାର ସମ୍ପର୍କିତ ଅଫର୍ ଦେଉଛନ୍ତି। ଅଜଣା ଲିଙ୍କରେ କ୍ଲିକ୍ କରିବା ଓ ଏନିଡେସ୍କ୍ ଡାଉନ୍ଲୋଡ୍ କଲେ ମଧ୍ୟ ଟଙ୍କା କଟିଯାଉଛି। ଏ ନେଇ ପୋଲିସ ତରଫରୁ ବାରମ୍ବାର ଲୋକଙ୍କୁ ସଚେତନ କରାଯାଉଛି। ହେଲେ ସାଇବର୍ ଠକଙ୍କ ଜାଲରେ ପଡ଼ି ଲୋକେ ଟଙ୍କା ହରାଇ ଚାଲିଛନ୍ତି। ଗତ ଜାନୁୟାରୀରେ ୩ଟି ସାଇବର୍ ଠକେଇ ମାମଲା ରୁଜୁ ହୋଇଥିବା ବେଳେ ଗୋଟିଏ ମାମଲାରେ ସର୍ବାଧିକ ୪ଲକ୍ଷ ୮୨ହଜାର ଟଙ୍କା ଲୁଟେରା ଲୁଟି ନେଇଥିଲେ। ବିଦେଶୀ ମୁଦ୍ରା ଲୋଭରେ ପଡ଼ି ଜଣେ ମହିଳା ଏହି ଠକେଇର ଶିକାର ହୋଇଥିଲେ। ସେହିପରି ମାର୍ଚ୍ଚରେ ଏକ କୋରିଅରରେ ସାମଗ୍ରୀ ପଠାଇବା ବେଳେ ଏକ ଅଜଣା ଲିଙ୍କରେ କ୍ଲିକ୍ କରି ୨ଲକ୍ଷ ୬୭ହଜାର ଟଙ୍କା ଠକେଇ ହୋଇଥିଲେ। ଏପ୍ରିଲରେ ବିଟ କଏନ୍ରେ ବିନିଯୋଗ କରିଥିବା ମାଚ୍ୟୁରିଟି ଟଙ୍କା ଫେରସ୍ତ କରିବା ବାହାନାରେ ସାଇବର୍ ଠକ ଜଣଙ୍କ ଠାରୁ ୮ଲକ୍ଷ ଟଙ୍କା ଠକେଇ କରିଥିଲେ। ମେ’ରେ ମଧ୍ୟ ଦୁଇଟି ଠକେଇ ହୋଇଥିଲା। ଅନଲାଇନରେ ସାମଗ୍ରୀ ମଗାଇ ଜଣେ ବ୍ୟବସାୟୀ ୭ଲକ୍ଷ ୭୫ହଜାର ଟଙ୍କା ଠକେଇର ଶିକାର ହୋଇଥିଲେ। ଛତ୍ରପୁର ଓ ବେଗୁନିଆପଡ଼ାରେ ଅନଲାଇନ୍ ସାମଗ୍ରୀ କ୍ରୟ ଓ ଏନଡେସ୍କ ଡାଉନଲୋଡ୍ କରି ଦୁଇଜଣ ଯୁବକ ପ୍ରାୟ ୧ଲକ୍ଷ ୩୦ହଜାର ଟଙ୍କା ହରାଇଥିଲେ। ସାଇବର୍ ଥାନା ପୋଲିସ ଏଭଳି ମାମଲାର ତଦନ୍ତ କରୁଛି। ଯେଉଁ ଆକାଉଣ୍ଟକୁ ଟଙ୍କା ଯାଇଥିଲା ତାହା ମଧ୍ୟ ଠାବ କରୁଛି। ହେଲେ ଯେଉଁ ବ୍ୟକ୍ତିଙ୍କ ନାମରେ ବ୍ୟାଙ୍କ ଖାତା ରହୁଛି ତାହା ନକଲି ବୋଲି ଜଣାପଡ଼ୁଛି। ଏ ସମ୍ପର୍କରେ ଏଏସପି ରମେଶଚନ୍ଦ୍ର ସେଠୀ କହନ୍ତି, କେତେ କ୍ଷେତ୍ରରେ ଟଙ୍କା ଫେରାଇ ଅଣାଯାଇଛି। ଟଙ୍କା କଟିବାର ୨୪ଘଣ୍ଟା ମଧ୍ୟରେ ଅଭିଯୋଗ ହେଲେ ସମ୍ପୃକ୍ତ ଆକାଉଣ୍ଟକୁ ଫ୍ରିଜ୍ କରି ଟଙ୍କା ଫେରସ୍ତ ହୋଇପାରୁଛି ବୋଲି ସେ କହିଛନ୍ତି।