ସଇଁତଳା,୨୫ା୫(ଡି.ଏନ.ଏ.): ବଲାଙ୍ଗୀର ଜିଲା ସଇଁତଳା ବ୍ଲକର ୨୨ପଞ୍ଚାୟତରେ ଗତ ୨୦୨୨-୨୩ ମସିହାରେ ସ୍ବଚ୍ଛ ଭାରତ ମିଶନ (ଗ୍ରାମୀଣ) ଯୋଜନାରେ ୫୦ ଲକ୍ଷ ଟଙ୍କା ବ୍ୟୟରେ କମ୍ୟୁନିଟି କମ୍ପୋଷ୍ଟ ପିଟ୍ କେନ୍ଦ୍ରମାନ ନିର୍ମାଣ ହୋଇଛି । ଯୋଜନାକୁ କାର୍ଯ୍ୟକାରୀ କରିବାପାଇଁ ପଞ୍ଚାୟତମାନଙ୍କୁ ଆବଶ୍ୟକ ପାଣ୍ଠିର ଅଭାବ ଯୋଗୁଁ ଏହି ଯୋଜନା ବାଟବଣା ହୋଇଥିବା ସରପଞ୍ଚମାନେ କହୁଛନ୍ତି। ଗାଁ ପରିବେଶରେ ସ୍ବଚ୍ଛତା ଆଣିବା ପାଇଁ ଏହି ଯୋଜନାରେ ଗ୍ରାମାଞ୍ଚଳରେ ପ୍ରତ୍ୟେକ କେନ୍ଦ୍ର ନିର୍ମାଣ ପାଇଁ ୨୦ହଜାର ଟଙ୍କା ଏବଂ ପଞ୍ଚାୟତ ମୁଖ୍ୟାଳୟରେ ଅଞ୍ଚଳରେ ଏକ ଲକ୍ଷ ୯୫ ହଜାର ଟଙ୍କା ବ୍ୟୟ ହୋଇଛି। ଏହି ପିଟ କେନ୍ଦ୍ରମାନଙ୍କରେ ପଡୁଥିବା ଆବର୍ଜନାକୁ ଅଲଗା ଅଲଗା କରି ବ୍ୟବହାର ଉପଯୋଗୀ କରିବା ପାଇଁ ସ୍ବୟ ସହାୟକ ଗୋଷ୍ଠୀମାନଙ୍କୁ ଦାୟିତ୍ୱ ଦିଆସରିଛି। କିନ୍ତୁ ଏସ୍ଏଚ୍ଜିମାନଙ୍କୁ ପଞ୍ଚାୟତ ତରଫରୁ ଆର୍ଥିକ ରାଶି ପ୍ରଦାନର ବ୍ୟବସ୍ଥା ବର୍ତ୍ତମାନ ପର୍ଯ୍ୟନ୍ତ ହୋଇପାରି ନ ଥିବାରୁ ଏହି ଯୋଜନା କାର୍ଯ୍ୟକାରୀ ହୋଇପାରୁ ନ ଥିବା ଗ୍ରାମ ପଞ୍ଚାୟତ ଅଧିକାରୀ ପଦ୍ମକାନ୍ତ ପାଣିଗ୍ରାହୀ କହିଛନ୍ତି। ଏହି କେନ୍ଦ୍ର ମାନ ନିର୍ମାଣ ସମୟରେ ଅତ୍ୟନ୍ତ ନିମ୍ନମାନର କାମ ହୋଇଥିବା ତଥା କାହାକୁ ଦାୟିତ୍ୱ ହସ୍ତାନ୍ତର କରାଯାଇ ନ ଥିବାରୁ ଅନେକ କେନ୍ଦ୍ରର ଆଜବେଷ୍ଟସ ଚୋରି ହୋଇଯାଇଥିବାବେଳେ କେତେକ ସ୍ଥାନରେ କେନ୍ଦ୍ର ଭାଙ୍ଗିଯାଇଥିବା ସାଧାରଣରେ ଅଭିଯୋଗ ହେଉଛି।